ફરિયાદ / કીર્તિ પટેલે તો હદ વટાવી! મહિલા સાથે બબાલ કરવા સાથીદારોને લઈને અમદાવાદ પહોંચી, પોલીસની હાજરીમાં ઝીંક્યા લાફા

• વસ્ત્રાપુરમાં ટિકટોક સ્ટાર કીર્તિ પટેલ સામે ફરિયાદ
• ઘરમાં ઘુસી પોલીસની હાજરીમાં કરી મારમારી 
• વીડિયો સોશિયલ મીડિયા પર થયો વાયરલ

Ahmedabad News: ટિકટોક સ્ટાર કીર્તિ પટેલ ફરી એકવાર વિવાદમાં સપડાઈ છે. અમદાવાદની મહિલાને ઘરમાં ઘુસીને માર મારવા મામલે કીર્તિ પટેલ સહિત ચાર લોકો વિરુદ્ધ વસ્ત્રાપુર પોલીસ સ્ટેશનમાં ફરિયાદ નોંધાઈ છે. હાલ વસ્ત્રાપુર પોલીસે સમગ્ર મામલે વધુ તપાસ હાથ ધરી છે. 

2014માં લગ્ન અને 2019માં  છૂટાછેડા
મળતી માહિતી અનુસાર,  અમદાવાદના વસ્ત્રાપુરમાં આવેલા ગોયલ પાર્કમાં રહેતા રમીલાબેન મકવાણાના લગ્ન રામનિવાસ અગ્રવાલ સાથે વર્ષ 2014માં થયા હતા. જોકે, પતિ સાથે મનમેળ ન રહેતા તેઓએ 2019માં છૂટાછેડા લઈ લીધા હતા. જોકે, છૂટાછેડા બાદ પતિ એકલો રહેતો હોવાથી રમીલાબેન તેમની સાથે રહીને તેમની સેવા કરતા હતા. 

બે યુવતીઓએ આવીને માર્યો માર
ચારેક દિવસ રમીલાબેન ઘરમાં હાજર હતા, ત્યારે કીર્તિ પટેલ અને ગુડ્ડી પટેલ નામની યુવતીઓ સહિત 4 લોકો તેમના ઘરે આવ્યા હતા  અને તેમને ઘરમાંથી બહાર નીકળી જવાની ધમકી આપી હતી. જે બાદ કીર્તિ પટેલ અને ગુડ્ડી પટેલ સહિત તેમના મિત્રોએ રમીલાબેનને માર માર્યો હતો. જેથી મહિલાએ તાત્કાલિક પોલીસને ફોન કરીને બોલાવી લીધી હતી. 

પોલીસની હાજરીમાં કરી મારામારી
જેથી પોલીસની ટીમ ત્યાં દોડી આવી હતી. વસ્ત્રાપુર ગોયલ પાર્કના એક ફ્લેટમાં પોલીસની હાજરીમાં આ તમામે રમીલાબેન સાથે મારામારી કરી હતી. જેનો વીડિયો પણ સામે આવ્યો છે. જેમાં જોઈ શકાય છે કે કીર્તિ પટેલે પોલીસની હાજરીમાં જ મહિલાને લાફો ઝીંકી દીધો. 

મહિલાએ ચારેય વિરુદ્ધ નોંધાવી ફરિયાદ 
મારામારી કર્યા બાદ આ તમામ ત્યાંથી ચાલ્યા ગયા હતા. જે બાદ મહિલા સીધી વસ્ત્રાપુર પોલીસ સ્ટેશન ખાતે પહોંચી હતી. આ મામલે કીર્તી પટેલ, ગુડ્ડી પટેલ, વિરમ ભરવાડ અને મુકેશ ચૌધરી સામે ફરિયાદ નોંધાવી હતી. 

અગાઉ પણ નોંધાઈ ચૂકી છે ફરિયાદ
આપને જણાવી ધઈએ કે, આ પહેલી વખત નથી જ્યારે કીર્તિ પટેલ સામે ફરિયાદ નોંધાઈ હોય, આ પહેલા પણ તેની સામે સુરત અને અમદાવાદના પોલીસ સ્ટેશનમાં ફરિયાદ નોંધાઈ ચૂકી છે. કીર્તિ પટેલ સતત વિવાદોમાં રહેવા ટેવાયેલી છે. અગાઉ સુરતની પુણા પોલીસે ત્રણ વર્ષ પહેલા હત્યાના પ્રયાસ મામલે કીર્તિ પટેલની ધરપકડ પણ કરી હતી.