હાહાકાર / ફટકડા ફોડવા બાબતે ઉગ્ર ગાળાગાળી થઈ, સમજાવટ માટે રાજેશભાઈ વચ્ચે પડ્યા તો છરી હુલાવતા મોત, મોરબીનો લોહિયાળ કિસ્સો

• ફટાકડા જેવી બાબતમાં હત્યા
• સમજાવવા ગયેલા યુવકની હત્યા
• રાજેશ ગઢવી નામના યુવકની હત્યા

દિવાળીના તહેવાર ઉપર ફટાકડા ફોડવાની વાતને લઈને ઘણી વખત મારા મારીની ઘટનાઓ બનતી હોય તેવું સામે આવતું હોય છે. દરમિયાન મોરબી શહેરના સામાકાંઠા વિસ્તારમાં આવેલ લાભનગર-૨ માં રહેતા લાખાભાઈ ગઢવીના ઘર પાસે ફટાકડા ફોડવા બાબતે બોલાચાલી અને માથાકૂટ થઈ હતી જેની સ્થાનિક લોકો પાસેથી જાણવા મળતી પ્રમાણે લાખાભાઈ ગઢવીના ઘર પાસે વલીમામદ જામ નામનો મોરબી શહેરના સામાકાંઠા વિસ્તારમાં ઉમા ટાઉનશિપની સામેના ભાગમાં રહેતો શખ્સ ફટાકડા ફોડી રહ્યો હતો અને ફટાકડા ફોડવા બાબતે ત્યાં બોલાચાલી થઈ હતી.

આરોપી વલીમામદ જામ સામે ગુનો

જેથી લાભનગર -1 માં રહેતા લાખભાઇ ગઢવીના સબંધી રાજેશભાઈ અમરસંગ નાંધુ (ઉ.વ.48) નામનો યુવાન ત્યાં ગયો હતો અને ત્યારે વલીમામદ જામને તે ફટાકડા ન ફોડવા બાબતે સમજાવતો હતો દરમિયાન વલીમામદ જામે તેની પાસે રહેલ છરી રાજેશભાઈ ગઢવીને છાતીના ભાગે ઝીંકી દીધી હતી. જેથી યુવાનને ગંભીર ઇજા થઈ હોવાથી તાત્કાલિક સારવાર માટે પ્રથમ મોરબી અને ત્યાંથી વધુ સારવાર માટે બેભાન હાલતમાં રાજકોટની સિવિલ હોસ્પિટલ ખાતે લઈ જવામાં આવ્યો હતો જો કે, ટૂંકી સારવાર દરમિયાન રાજેશભાઈ ગઢવીનું રાજકોટ ખાતે મોત નીપજયું છે.

પરિવારજનની ફરિયાદ લેવા તજવીજ

જેથી મોરબીમાં ફટાકડા ફોડવા બાબતે શરૂ થયેલ માથાકૂટનો બનાવ હત્યામાં પલટયો છે અને આ બનાવની મોરબી સીટી બી ડિવિઝન પોલીસને જાણ કરવામાં આવતા પોલીસે બનાવની નોંધ કરી આગળની રાબેતા મુજબની કાર્યવાહી હાથ ધરી છે. આ બનાવમાં મૃતકના પરિવારજનની ફરિયાદ લેવા માટે થઈને પોલીસ દ્વારા હાલમાં તજવીજ શરૂ કરવામાં આવી છે.