- CM ફેસને લઈને કેજરીવાલે લૉન્ચ કર્યું AAPનો CM કેમ્પેન
- કોઈ પણ વ્યક્તિ SMS, કોલ કે વોઇસ મેસેજ મોકલી શકે છે
- ચોથી નવેમ્બરે CMનો ફેસ જાહેર થઈ જશેઃ કેજરીવાલ
નજીકના સમયમાં જ્યારે ગુજરાત વિધાનસભાની ચૂંટણી જાહેર થવા જઇ રહી છે. ત્યારે કોંગ્રેસ અને ભાજપની સાથે આ વખતે આમ આદમી પાર્ટી પણ કમરકસીને મેદાનમાં ઉતરી છે. સામાન્ય રીતે ગુજરાતમાં કોંગ્રેસ અને ભાજપ વચ્ચે મહત્વનો જંગ જોવા મળતો હતો, પરંતુ આ વખતે AAP પુરતી તૈયારી સાથે મેદાનમાં છે. આમ આદમી પાર્ટીએ ગુજરાતમાં ખૂબ જોરશોરથી પ્રચાર શરૂ કરી દીધો છે. તેમજ પાર્ટીએ અત્યાર સુધીમાં ઉમેદવારોની સાત યાદી પણ જાહેર કરી દીધી છે. હવે આમ આદમી પાર્ટીના મુખ્યમંત્રી પદના ચહેરાને લઈને મોટા સમચાર સામે આવ્યા છે. આ માટે પાર્ટી દ્વારા એક કેમ્પેન શરૂ કરવામાં આવ્યો છે. જેમાં મુખ્યમંત્રીના ચહેરા માટે લોકો પાસેથી સૂચનો માંગવામાં આવ્યા છે.
તમે કોને મુખ્યમંત્રી તરીકે જોવા માંગો છોઃ અરવિંદ કેજરીવાલ
આજે સુરત ખાતે આમ આદમી પાર્ટીની રાષ્ટ્રીય સંયોજક અને દિલ્હીના મુખ્યમંત્રી અરવિંદ કેજરીવાલે પત્રકાર પરિષદ યોજી હતી. જેમાં સીએમ કેજરીવાલે કહ્યું હતું કે, ગુજરાતમાં ભારતીય જનતા પાર્ટીએ વિજય રૂપાણીને મુખ્યમંત્રી બનાવ્યા ત્યારે કોઈને પૂછવામાં આવ્યું નહીં કે તેમને બનાવીએ કે નહીં, ભૂપેન્દ્ર પટેલને બનાવ્યા ત્યારે પણ પૂછવામાં આવ્યું નહીં પણ અમે આવા નથી અમે જનતાને પૂછીએ છીએ કે તમે કોને મુખ્યમંત્રી તરીકે જોવા માંગો છો.
AAPનો CM કેમ્પેન
CM કેજરીવાલે કેમ્પેનની શરૂઆત કરતાંની સાથે નંબરની જાહેરાત કરી જેના પર કોઈ પણ વ્યક્તિ SMS, કોલ જે વોઇસ મેસેજ મોકલી શકે છે અને નેતાનું નામ જણાવી શકે છે. આ સિવાય એક વેબસાઇટની પણ જાહેરાત કરવામાં આવી છે. આગામી ત્રણ નવેમ્બર સુધી AAP દ્વારા આ કેમ્પેન ચલાવવામાં આવશે અને તે બાદ ચોથી નવેમ્બરે CMનો ફેસ જાહેર થઈ જશે.
આ નંબર પર મોકલી શકે છે મેસેજ
અરવિંદ કેજરીવાલે કહ્યું કે, '6357000360' નંબર પર જનતા SMS, વોટ્સએપ મેસેજ, વોઈસ મેસેજ મોકલીને નેતાનું નામ જાણાવી શકે છે. આ ઉપરાંત લોકો [email protected] પર ઈમેલ મોકલીને પણ સૂચન આપી શકે છે. ત્રણ નવેમ્બર સુધી AAP દ્વારા આ કેમ્પેન ચલાવવામાં આવશે અને 4 નવેમ્બરના રોજ જે પરિણામ આવશે તે ગુજરાતના લોકોની સામે રાખવામાં આવશે.
લોકો પાસેથી માંગવામાં આવ્યા સૂચનો
વાસ્તવમાં પંજાબ વિધાનસભાની ચૂંટણી દરમિયાન તારીખોની જાહેરાત બાદ આમ આદમી પાર્ટીએ મુખ્યમંત્રી પદ માટે ચહેરાની જાહેરાત કરી હતી. હવે એવું પાર્ટી ગુજરાતમાં કરવા જઈ રહી છે. આમ આદમી પાર્ટી દ્વારા લોકો પાસેથી સૂચનો માંગવામાં આવ્યા છે.
ગોપાલ ઈટાલીયા અને ઈસુદાન ગઢવી પાર્ટીના બે મોટા ચહેરા
ગુજરાત ભાજપનો સૌથી મોટો ગઢ છે તેમાં ગાબડું પાડવા માટે આમ આદમી પાર્ટી દ્વારા જો CM ફેસનું એલાન કરવામાં આવે તો તેમાં હાલ જોવા જઈએ તો બે નામો સૌથી વધારે આગળ દેખાઈ રહ્યા છે, ગોપાલ ઈટાલીયા અને ઈસુદાન ગઢવી. એવામાં કેજરીવાલ લોકોને કહી શકે છે કે AAPમાં તમને જે નેતા સૌથી વધુ પસંદ છે તેમનું નામ જણાવો અને સ્પેશ્યલ કેમ્પેન બાદ નામનું એલાન કરવામાં આવી શકે છે.
વારંવાર IB રિપોર્ટનો દાવો
બીજી તરફ કેજરીવાલ દ્વારા વારંવાર IB ના રિપોર્ટને લઈને દાવો કરવામાં આવી રહ્યો છે કે IBના રિપોર્ટ અનુસાર ગુજરાતમાં AAP ની સરકાર બનવા જઈ રહી છે તથા સ 90થી 93 બેઠકો આવી શકે છે.
કેજરીવાલે કર્યો હતો દાવો
તો બીજી બાજુ ગુજરાતના પંચમહાલમાં જનસભા દરમિયાન આમ આદમી પાર્ટીના સંયોજક અને દિલ્હીના મુખ્યમંત્રી અરવિંદ કેજરીવાલે દાવો કર્યો હતો કે આ ચૂંટણીમાં આમ આદમી પાર્ટીને 90થી 93 સીટો મળી શકે છે. કેજરીવાલે આ ચૂંટણી રેલીમાં ભાજપ પર પ્રહારો કર્યા હતા. સાથે જ એમ પણ કહ્યું હતું કે, 'આમ આદમી પાર્ટી આ ચૂંટણીમાં 90થી 93 સીટો જીતશે, પરંતુ આ આંકડો 150 સુધી પહોંચાડવાની જવાબદારી તમારી છે.'
