કબૂલાત / 'કાશ્મીર હવે ભારતનું અભિન્ન અંગ', પાકિસ્તાની સેના પર કાળઝાળ આતંકી સંગઠનનું મોટું નિવેદન

• અલકાયદાએ સ્વીકાર્યું કાશ્મીર હવે ભારતનું અભિન્ન અંગ
• કલમ 370 હટાવ્યા બાદ ભારત સરકારને કાશ્મીરમાં સફળતા મળી: અલકાયદા
• અલકાયદાએ પાકિસ્તાની સેનાને કાયર ગણાવી 

વિશ્વના ખતરનાક આતંકવાદી સંગઠનોમાંના એક અલકાયદાએ સ્વીકાર્યું છે કે કાશ્મીર હવે ભારતનું અભિન્ન અંગ છે. અલકાયદાએ સ્વીકાર્યું છે કે, કલમ 370 હટાવ્યા બાદ ભારત સરકારને કાશ્મીરમાં સફળતા મળી છે. અલકાયદાએ પાકિસ્તાની સેના પર પોતાનો ગુસ્સો ઠાલવતા આ નિવેદન આપ્યું છે. અલકાયદાએ પાકિસ્તાની સેનાને કાયર ગણાવતા કહ્યું કે, તેના કારણે કાશ્મીરમાં આતંકવાદીઓ ઓછા થઈ રહ્યા છે. આ સાથે તેમણે એમ પણ કહ્યું કે, ભારતને હવે કાશ્મીરમાં સફળતા મળી રહી છે.

AQISના અધિકૃત મેગેઝિન અનુસાર ભારત સરકારની કાશ્મીર નીતિ સફળ રહી છે અને આ માટે અલ કાયદાએ પાકિસ્તાનને સખત શબ્દોમાં કોસ્યું છે. આતંકવાદી સંગઠનનું કહેવું છે કે, પાક આર્મી કાયર છે અને તે કાશ્મીરમાં આતંકવાદીઓને મોકલવામાં સક્ષમ નથી. હકીકતમાં વર્ષ 2019માં નરેન્દ્ર મોદી સરકારે કલમ 370ને બિનઅસરકારક બનાવી દીધી હતી. આ પછી અલ કાયદાએ કાશ્મીર પર ધ્યાન કેન્દ્રિત કર્યું છે અને તે અફઘાનિસ્તાન દ્વારા ઘાટીમાં આતંકવાદને વધુ વધારવા માંગે છે. પરંતુ ભારતીય સુરક્ષા દળો સતત કાશ્મીરમાંથી આતંકવાદીઓને ખતમ કરી રહ્યા છે. નિષ્ફળતાથી કંટાળીને અલ કાયદાએ હવે પાકિસ્તાન પર પોતાનો ગુસ્સો ઠાલવ્યો છે.

મેગેઝિનમાં કહેવામાં આવ્યું હતું કે, પાકિસ્તાની સેના તે આતંકવાદીઓને ખતમ કરી રહી છે જેઓ કાશ્મીર માટે તૈયાર હતા. આ રીતે તે ભારતને જ ફાયદો કરાવી રહી છે. ખતરનાક આતંકવાદી સંગઠન અલ કાયદાએ પણ કારગિલ યુદ્ધમાં મળેલી હાર માટે પાકિસ્તાની સેનાની મજાક ઉડાવી છે. મેગેઝીનમાં અલકાયદાએ મુસ્લિમોને કાશ્મીરમાં એક થવા અને સમર્થન આપવાનું કહ્યું છે. અલકાયદાએ કાશ્મીરમાં અંસાર ગઝાવત-ઉલ-હિંદને એકમાત્ર સાચા આતંકવાદી સંગઠન તરીકે ગણાવ્યું છે. નોંધનીય છે કે, કાશ્મીરમાં સુરક્ષા દળો અલકાયદા અને તેની સાથે સંકળાયેલા આતંકવાદી સંગઠનોની દરેક નાપાક યોજનાને નિષ્ફળ બનાવી રહ્યા છે.