Punjab News: ખાલિસ્તાની સમર્થક અમૃતપાલસિંહ લોકસભા ચૂંટણી લડશે. પંજાબની સીટ પરથી અપક્ષ ઉમેદવાર બનશે. અમૃતપાલના પિતા તરસેમસિંહે કહ્યું કે તેઓ ગુરુવારે તેમના પુત્રને મળ્યા પછી જ આ મામલે જણાવશે. તે પંજાબની ખદુર સાહિબ બેઠક પરથી અપક્ષ ઉમેદવાર તરીકે ચૂંટણી લડી શકે છે.
ગયા વર્ષે એપ્રિલમાં ધરપકડ કરવામાં આવી
આસામની જેલમાં બંધ ખાલિસ્તાની સમર્થક અમૃતપાલસિંહ હવે લોકસભા ચૂંટણી લડવાની તૈયારી કરી રહ્યો છે. હાલમાં જ તેના વકીલે આવો દાવો કર્યો છે. 'વારિસ પંજાબ દે' સંગઠનના વડા અમૃતપાલ સિંહની ગયા વર્ષે એપ્રિલમાં ધરપકડ કરવામાં આવી હતી અને તેની સામે કડક રાષ્ટ્રીય સુરક્ષા કાયદો લાગુ કરવામાં આવ્યો હતો. અમૃતપાલ તેના નવ સાથીઓ સાથે હાલમાં ડિબ્રુગઢ જેલમાં બંધ છે.
ખડુર સાહિબ સીટ પરથી ઉમેદવારી કરી શકે
એવી શક્યતાઓ છે કે અમૃતપાલ ખડુર સાહિબ સીટ પરથી અપક્ષ ઉમેદવાર તરીકે ચૂંટણી લડશે. જો કે, અમૃતપાલના પિતા તરસેમસિંહએ કહ્યુ કે ગુરુવારે તેમના દિકરીને મળવાના છે અને ચુંટણી લડવા મામલે ત્યારબાદ કોઇ ટિપ્પણી કરી શકશે. જો કે તેમણે ભારપૂર્વક જણાવ્યું હતું કે અમૃતપાલસિંહે શરૂઆતમાં રાજકારણમાં જોડાવામાં કોઈ રસ દાખવ્યો ન હતો.
ભાઈ સાહેબે વિનંતી સ્વીકારીઃ વકીલનો દાવો
એડવોકેટ રાજદેવસિંહ ખાલસાએ દાવો કર્યો હતો કે તેઓ બુધવારે ડિબ્રુગઢ જેલમાં ઉપદેશકને મળ્યા હતા અને તેમને ચૂંટણી લડવા વિનંતી કરી હતી. ખાલસાએ કહ્યું, હું આજે ડિબ્રુગઢ સેન્ટ્રલ જેલમાં અમૃતપાલને મળ્યો હતો અને મીટિંગ દરમિયાન મેં તેમને વિનંતી કરી હતી કે 'ખાલસા પંથ'ના હિતમાં તેમણે આ વખતે સંસદ સભ્ય બનવા માટે ખડૂર સાહિબથી ચૂંટણી લડવી જોઈએ. ખાલસાએ દાવો કર્યો, 'ભાઈ સાહેબે પંથના હિતમાં મારી વિનંતી સ્વીકારી તેઓ અપક્ષ ઉમેદવાર તરીકે ચૂંટણી લડશે.'
પોલીસ સાથે ઘર્ષણ થયું હતું
ગયા વર્ષે 23 ફેબ્રુઆરીએ અમૃતપાલ અને તેના સમર્થકો બેરિકેડ તોડીને અજનલા પોલીસ સ્ટેશનમાં ઘૂસ્યા હતા. તે દરમિયાન સહયોગી લવપ્રીતસિંહ તુફાનને છોડાવવા બાબતે પોલીસ સાથે ઘર્ષણ થયું હતું. આ પછી પંજાબ પોલીસ એક્શનમાં આવી અને અમૃતપાલ અને તેના સહયોગીઓ સામે કાર્યવાહી કરી. તે ગયા વર્ષે માર્ચમાં જલંધર જિલ્લામાં પોલીસથી બચી નાસી છુટ્યો હતો. પરંતુ લાંબી શોધખોળ બાદ 23 એપ્રિલે તેની ધરપકડ કરવામાં આવી હતી.
