- શિવાલિક, શિલ્પ અને શારદા ગ્રૂપ પર તપાસનો ધમધમાટ
- આવક વેરા વિભાગનું મોટું સર્ચ ઓપરેશન,15થી વધુ લોકર સીલ
- મોટા પ્રમાણમાં દસ્તાવેજો અને ડિજિટલ ડેટા કબજે લેવાયા
દીપાવલીના પર્વ પહેલાથી જ અમદાવાદ,રાજકોટ અને સુરતમાં વ્યાપારીઓ, બિલ્ડર્સ અને નામાંકિત વ્યાવ્સાયિઓને ત્યાં દરોડા પાડતા આવકવેરા વિભાગ બેનામી સંપતિ અંગે તપાસ કરતુ રહ્યું છે. અગાઉ રાજકોટમાં પણ મોટા પાયે દરોડા પાડવામાં આવ્યા બાદ, સુરતમાં પણ પેઢીઓ પર દરોડા પાડ્યા હતા. હવે અમદાવાદમાં નામાંકિત બિલ્ડરોના નિવાસ સ્થાન, ઓફીસ પર દરોડા પાડવામાં આવ્યા છે. શિવાલિક, શિલ્પ અને શારદા ગ્રૂપ પર તપાસનો ધમધમાટ ચાલ્યો છે. આ ત્રણેય ગ્રૂપ વચ્ચે આંતરિક બિઝનેસ સંબંધો અંગે તપાસ ચાલી રહી છે.
આ ત્રણ ગ્રુપ સાથે અલગ-અલગ રીતે સંકાળાયેલા કે વ્યક્તિગત વ્યાવ્સાયીના ઓફીસ અને નિવાસ સ્થાનો પર દરોડા પાડવામાં આવ્યા છે. જેમાં તરલ શાહ, ચિત્રક શાહની ઓફિસો અને નિવાસસ્થાન, ઉપરાંત યશ બ્રહ્મભટ્ટ, દીપક નિમ્બાર્કને ત્યાં પણ તપાસ થઇ રહી છે. આ તમામ જગ્યાએથી બિનહિસાબી રોકડ વ્યવહારોના પૂરાવા હાથ લાગ્યા છે. સાથોસાથ જમીન ખરીદીમાં મોટા પ્રમાણમાં રોકડ વ્યવહારો થયા હોવાની માહિતી પ્રાપ્ત થઇ છે. તો રોકડા રકમ પણ અંદાજે 1 કરોડથી વધુની ઝડપાઈ છે અને વધુ પણ કઈક મોટા વ્યવહારો કે રોકડ હાથ લાગવાની સંભાવનાઓને નકારી શકાતી નથી
અમદાવાદ, સુરત, વડોદરા, રાજકોટના અધિકારીઓની શિવાલિક, શિલ્પ અને શારદા ગ્રૂપ પર તપાસની કાર્યવાહી દરમિયાન મોટા પ્રમાણમાં દસ્તાવેજો અને ડિજિટલ ડેટા કબજે લેવાયા છે તો 15થી વધુ લોકરોને સીલ કરવામાં આવ્યા છે. આ તપાસમાં આવકવેરા વિભાગના 50 અધિકારીઓ સામેલ થયા છે. તો અન્ય સ્ટાફમાં 100 અન્યકર્મી, 70 પોલીસ કર્મચારીઓ કાર્યવાહીમાં જોડાયા છે
