કોરોના સંકટ વધ્યું / અમદાવાદમાં એક સાથે 21 વિસ્તારોને માઇક્રો કન્ટેઇનમેન્ટમાં મૂકી દેવાયા, આ વિસ્તારમાં જાઓ તો જાળવજો

•  અમદાવાદમાં  માઈક્રો કન્ટેઇનમેન્ટ ઝોન વધ્યા 
• પશ્ચિમના પોશ વિસ્તારો  માઈક્રો કન્ટેઇનમેન્ટમાં 
• માઈક્રો કન્ટેઇનમેન્ટ ઝોનની સંખ્યા  65 પર પહોચી 

અમદાવાદમાં વધતા કોરોના કેસ સાથે  માઈક્રો કન્ટેઇનમેન્ટ ઝોનમાં પણ વધારો થયો છે. શહેરમાં એક સાથે 21 વિસ્તાર માઇક્રો કન્ટેઇનમેન્ટ ઝોનમાં મુકાતા ફફડાટ ફેલાયો છે. અમદાવાદના બોડકદેવ, પાલડી, થલતેજ, નિકોલ, ઘોડાસર, વસ્ત્રાપુરના વિસ્તાર માઈક્રો કન્ટેઇનમેન્ટ ઝોનમાં મુકાયા છે. આ સાથે જ શહેરમાં માઈક્રો કન્ટેઇનમેન્ટ ઝોનની સંખ્યા  65 પર પહોંચી છે.

અમદાવાદમાં 644 કેસથી હાહાકાર  

ગુજરાતમાં કોરોનાનો ચોંકાવનારો આંકડો સામે આવ્યો છે. છેલ્લા 24 કલાકમાં 1259 કેસ સામે આવતા તંત્ર અને લોકોએ હવે સાવચેત થઈ જવાની જરૂર છે. આજ સૌથી વધુ અમદાવાદમાં 644 કેસ સામે આવ્યા છે જ્યારે સુરતમાં 225 કેસ તો વડોદરામાં 75 અને રાજકોટમાં 61 કેસ સામે આવ્યા છે. એક્ટિવ કેસની સંખ્યા 5858 સુધી પહોંચી ગઈ છે.રાજ્યભરમાં કોરોનાને કારણે 3 મૃત્યુ થયા જ્યારે કુલ 16 દર્દીઓ વેન્ટિલેટર પર સારવાર હેઠળ છે. કોરોનાને માત આપીને કુલ 151 દર્દી ઘેર પરત ફરતા હવે એક્ટિવ કેસની સંખ્યાં  5858 પહોચી ગઈ છે. આજે કુલ 7.46 લાખથી વધુ લોકોનું રસીકરણ થયું છે. જ્યારે અત્યાર સુધી કુલ 9.04 કરોડ રસીના ડોઝ આપી દેવાયા છે. કોરોનાથી સાજા થવાનો દર 98.09 ટકા જોવા મળ્યો છે.આજે 7,46,445 લોકોનું રસીકરણ કરવામાં આવ્યું છે. આ સાથે જ આજથી 15-18 વર્ષના લોકોનું રસીકરણ પણ શરુ થયું હતું. આજે પહેલા દિવસે 4,94,317 લોકોનું રસીકરણ કરવામાં આવ્યું હતું. 

ઓમિક્રોનના 16 નવા કેસ 
 
ગુજરાતમાં કોરોનાના ફૂંફાડા સાથે જ  ઓમિક્રોનના વધુ 16 કેસ નવા આવ્યા છે. અમદાવાદમાં ઓમિક્રોનના 7 કેસ, વડોદરામાં 2 કેસ, કચ્છ અને ખેડામાં ઓમિક્રોનના એક-એક કેસ, જામનગર, આણંદ જિલ્લામાં ઓમિક્રોનના 2-2 કેસ, તો સુરતમાં આજે એક મહિલાને પણ ઓમિક્રોનની પુષ્ટી થઇ  છે. અત્યાર સુધી રાજ્યમાં ઓમિક્રોન વેરિયન્ટના કુલ 152 કેસ નોંધાયા છે જેમાંથી ઓમિક્રોનને માત આપીને કુલ 85 દર્દીઓ  ડિસ્ચાર્જ થયા છે. અત્યાર સુધી ગુજરાતમાં ઓમિક્રોનને કારણે એકપણ મૃત્યુ નોંધાયું નથી