અમદાવાદ / 'I AM LAKHAN' સ્લોગને ઉકેલી કાઢ્યો ઘાટલોડિયાની ચોરીનો ભેદ, સામે આવ્યું ક્રાઇમ પાછળનું ચોંકાવનારું કારણ

• મદદના બહાને વૃદ્ધાને રિક્ષામાં બેસાડ્યા
• નજર ચૂકવી ચોરી લીધો હતો ચેઈન
• પોલીસે આરોપીઓને દબોચી લીધા

ઘાટલોડિયામાં વૃદ્ધ મહિલાના સોનાના ચેઈનની ચોરીનો ભેદ ઉકેલાયો છે. પોલીસે આઈ એમ લખન નામની રિક્ષાના CCTV ફૂટેજથી ચોરીનો ભેદ ઉકેલ્યો છે. ઝોન 1 LCBએ ચોરી કરનાર સગા ભાઈ અને બહેનની ધરપકડ કરી છે. 

મદદના બહાને ચોરી
ઘાટલોડિયા પોલીસ સ્ટેશનના પી.આઈ આર.જે ચૌધરીએ જણાવ્યું કે, વૃદ્ધ મહિલાના સોનાના ચેઇનની ચોરીના કેસમાં ટીમે આરોપી નારાયણ પંડિત અને તેની બહેન નીલમ પંડિતની ધરપકડ કરી છે. આ બંને વાસણાના રહેવાસી છે. ઘાટલોડિયામાં કેકે નગર નજીક પુષ્પાબેન પટેલ નામના વૃદ્ધ મહિલા પોસ્ટ ઓફિસ જઈ રહ્યા હતા. ત્યારે આરોપી ભાઈ અને બહેનએ તડકામાં મહિલાને મદદના બહાને રિક્ષામાં બેસાડ્યા અને નજર ચૂકવીને તેમને પહેરેલો સોનાનો ચેઈન ચોરી લીધો હતો. 

શંકાસ્પદ રિક્ષાના મળ્યા હતા CCTV 
તેઓએ જણાવ્યું કે, મહિલાએ પોલીસ ફરિયાદ કરતા ઝોન 1 LCB અને સ્થાનિક પોલીસે તપાસ શરૂ કરી હતી અને પોલીસે શંકાસ્પદ રિક્ષાના CCTV મળ્યા હતા. આ રિક્ષા પર 'I AM LAKHAN' નામનું સ્લોગન મળી આવ્યું હતું. જેના આધારે પોલીસે તપાસ કરતા રિક્ષા ચાલક નારાયણ પંડિત અને તેની બહેન નીલમ પંડિતની ધરપકડ કરવામાં આવી છે.

દેવું થઈ જતા ભાઈ અને બહેન ચોર બન્યા
PI આર.જે ચૌધરીએ જણાવ્યું કે,  પકડાયેલા ભાઈ અને બહેનની પૂછપરછમાં ખુલ્યું કે લાખો રૂપિયાનું દેવું થઈ જતા ભાઈ અને બહેને ચોરીનુ ષડયંત્ર રચ્યું હતું. મહિલા આરોપી નીલમ અને એક સંબંધી સુમિત્રા મુસાફર બનીને રીક્ષામાં બેઠા હતા. ત્યારે વૃદ્ધ મહિલાને એકલા જોઈને ચોરીનું કાવતરું ઘડીને તેમને રિક્ષામાં બેસાડ્યા અને ચોરી કરીને વૃદ્ધ મહિલાને રિક્ષામાંથી ઉતારીને ફરાર થઇ ગયા હતા. આરોપીના બાળકના ઈલાજમાં દેવું થઈ જતા ચોરી કરી હોવાનું તપાસમાં ખુલ્યું છે. ઘાટલોડિયા પોલીસે ભાઈ અને બહેનની ધરપકડ કરીને વધુ પૂછપરછ શરૂ કરી છે. જોકે, સુરતની સુમિત્રા ફરાર હોવાથી પોલીસે તેની શોધખોળ શરૂ કરી છે. આ આરોપીઓએ અન્ય કોઈ ગુના આચર્યા છે કે નહીં તે મુદ્દે વધુ તપાસ હાથ ધરવામાં આવી રહી છે.