સુરત / ગુજરાતમાં બાળકોને ગાડી આપતા માતા-પિતા ચેતજો, જો ઝડપાયા તો થશે કડક કાર્યવાહી, ગૃહરાજ્યમંત્રી સંઘવીએ પણ આપી ચેતવણી

• અકસ્માત મુદ્દે  ગૃહ રાજ્યમંત્રી હર્ષ સંઘવીનું નિવેદન
• સ્ટંટ કરતાં બાળકોનાં પિતા પણ જવાબદારઃ હર્ષ સંઘવી
• 'ભલામણ કે છૂટ નહી આપવામાં આવે'

20 જુલાઈની સવાર અમદાવાદ માટે 'ગોઝારો ગુરુવાર' લઈને આવી. બુધવારે રાત્રે આખું અમદાવાદ જ્યારે ગાઢ નિંદ્રા માણી રહ્યું હતું. એ વખતે શહેરના ધબકતા વિસ્તારમાં આવેલો ઇસ્કોનબ્રિજ ઇતિહાસમાં સૌથી ભયાનક અને ગમખ્વાર અકસ્માતનો સાક્ષી બન્યો. એક નબીરાએ બેફામ ઝડપે લક્ઝુરિયસ કાર દોડાવી અને તેના ખપ્પરમાં નવ કોડભરી જિંદગી હોમાઈ ગઈ. ગત બુધવારે રાત્રે ઇસ્કોન બ્રિજ પર સર્જાયેલા અકસ્માતથી આખું ગુજરાત હચમચી ગયું છે. 

હર્ષ સંઘવીએ આપી માતા-પિતાને ચેતવણી
અમદાવાદમાં ઇસ્કોન બ્રિજ અકસ્માત બાદ તંત્ર સફાળું જાગ્યું છે. રાજ્યમાં હવે ઓવર સ્પીડિંગ સામે કાર્યવાહી કરવા ખાસ ડ્રાઈવ શરું કરવામાં આવશે. આ ખાસ ડ્રાઇવ યોજવા માટે સરકાર દ્વારા સૂચના આપી દેવામાં આવી છે. આ સાથે ટ્રાફિક પોલીસ અને RTOને પણ સૂચના આપવામાં આવી છે. આ તરફ હાઇવે પર લાઇટોના પોલને લઇ માર્ગ મકાન વિભાગને નિર્દેશ અપાયા છે તો સ્ટંન્ટ કરનારાઓ સામે પોલીસને કાર્યવાહી કરવાની સૂચના આપવામાં આવી છે. ગૃહ રાજ્યમંત્રી હર્ષ સંઘવીએ પણ માતા-પિતાને બાળકોને સમજી-વિચારીને વાહન આપવાની ચેતવણી આપી છે.

કોઈ ભલામણ કે છૂટ નહીં અપાયઃ હર્ષ સંઘવી
આ અંગે ગૃહરાજ્ય મંત્રી હર્ષ સંઘવીએ જણાવ્યું કે, 'સ્ટંટ કરતાં બાળકોના પિતા પણ જવાબદાર છે. જો કોઈ બાળક સ્ટંટ કરતા ઝડપાશે તો કોઈ ભલામણ કે છૂટ આપવામાં આવશે નહીં. આવા કિસ્સામાં માતા અને પિતા સામે પણ કાર્યવાહી કરવામાં આવશે. ગુજરાતના રોડ-રસ્તાને રેસિંગ ટ્રેક બનાવાશે તો કાર્યવાહી કરાશે.' 

તથ્ય પટેલના જૂના વીડિયો મુદ્દે પણ હર્ષ સંઘવીનું નિવેદન 
ઇસ્કોનબ્રિજ અકસ્માત કેસ પર તેઓએ જણાવ્યું કે, તથ્ય પટેલે અગાઉ પણ અકસ્માત સર્જ્યો હોવાનું તપાસમાં સામે આવ્યું છે. જેનો વીડિયો પણ વાયરલ થયો છે. તેણે થાર કારને એક રેસ્ટોરન્ટમાં ઘુસાડી દીધી હતી. રેસ્ટોરેન્ટ માલિકની અરજી લઈ તથ્ય પટેલ વિરુદ્ધ FIR કરવામાં આવી છે.