- હિમાચલ પ્રદેશમાં વરસાદ-ભૂસ્ખલનથી અત્યાર સુધીમાં 51 લોકોના મોત
- શિમલામાં ભૂસ્ખલનને કારણે 14 લોકોના મોત, મૃત્યુઆંક હજુ વધી શકે
- રાજ્યમાં ઘણા મોટા રસ્તાઓ બંધ થઈ ગયા, ઘરોને નુકસાન થયું
- શિમલામાં ભૂસ્ખલનની બે જગ્યાએથી 14 મૃતદેહો મળી આવ્યા
હિમાચલ પ્રદેશ વરસાદ: હિમાચલ પ્રદેશમાં ખૂબ જ ભારે વરસાદ અને ભૂસ્ખલનથી સર્જાયેલી વિનાશમાં અત્યાર સુધીમાં 51 લોકોના મોત થયા છે. પ્રાથમિક વિગતો મુજબ શિમલામાં ભૂસ્ખલનને કારણે 14 લોકોના મોત થયા છે. આ તરફ રાજ્યમાં કુદરતી આફતના કારણે મૃત્યુઆંક હજુ વધી શકે છે. ભૂસ્ખલનને કારણે રાજ્યમાં ઘણા મોટા રસ્તાઓ બંધ થઈ ગયા, ઘરોને નુકસાન થયું અને શિમલાના મંદિરમાં ઘણા ભક્તો દટાઈ ગયા. એકલા શિમલામાં ભૂસ્ખલનની બે જગ્યાએથી 14 મૃતદેહો મળી આવ્યા હતા. સમર હિલ વિસ્તારમાં આવેલા શિવ મંદિરના કાટમાળ નીચે વધુ લોકો ફસાયા હોવાની આશંકા છે.
મંદિરમાં ભક્તોની ભીડ વચ્ચે ભૂસ્ખલન
શિમલામાં જ્યારે ભૂસ્ખલન થયું ત્યારે મંદિરમાં ભક્તોની ભીડ હતી. આ ભક્તો સોમવારે ભગવાન શિવના દર્શન કરવા આવ્યા હતા. જ્યારે મંડી જિલ્લામાં વરસાદ સંબંધિત ઘટનાઓમાં ઓછામાં ઓછા 19 લોકોના મોત થયા છે. હિમાચલ પ્રદેશમાં, સ્થાનિક હવામાન વિભાગે 17 ઓગસ્ટ સુધી વિવિધ સ્થળોએ ભારે વરસાદ, તોફાન અને વીજળી માટે યલો એલર્ટ જારી કર્યું છે. હિમાચલ પ્રદેશમાં 19 ઓગસ્ટ સુધી વરસાદની આગાહી કરવામાં આવી છે.
પરીક્ષાઓ રદ, શાળા-કોલેજો બંધ
અવિરત વરસાદ વચ્ચે રાજ્ય સરકારે પણ પરીક્ષાઓ રદ કરી છે અને શાળા-કોલેજો બંધ રહેશે. સોમવારે હિમાચલ પ્રદેશમાં વરસાદને કારણે થયેલી ભારે તબાહી અંગે રાજ્યના સીએમ સુખવિંદર સિંહ સુખુએ કહ્યું કે, છેલ્લા 24 કલાકમાં 50 થી વધુ લોકોના મોત થયા છે. 20થી વધુ લોકો હજુ પણ ફસાયેલા છે, મૃત્યુઆંક વધી શકે છે. શોધ અને બચાવ કામગીરી ચાલુ છે. રાજ્યમાં સ્વતંત્રતા દિવસ પર કોઈ સાંસ્કૃતિક કાર્યક્રમનું આયોજન નહીં કરવાનો નિર્ણય લેવામાં આવ્યો છે.
ઉત્તરાખંડમાં ઓરેન્જ એલર્ટ જાહેર
ભારત હવામાન વિભાગ (IMD) એ આજે પણ ઉત્તરાખંડમાં ભારે વરસાદની સંભાવના વ્યક્ત કરી છે અને ઓરેન્જ એલર્ટ જાહેર કર્યું છે. હવામાન વિભાગે જણાવ્યું કે, દેહરાદૂન, પૌરી, ટિહરી, નૈનીતાલ, ચંપાવત અને ઉધમ સિંહ નગરમાં વિવિધ સ્થળોએ ભારે વરસાદની સંભાવના છે. ભારે વરસાદને કારણે ઋષિકેશની આસપાસના વિસ્તારોમાં ઘણી જગ્યાએ પાણી ભરાઈ ગયા છે અને ગંગા નદીના જળસ્તરમાં વધારો થયો છે.
રાહત અને બચાવ કાર્ય યથાવત
SDRFની ટીમો તમામ જગ્યાએ બચાવ કાર્યમાં લાગેલી છે. ચમોલીના પીપલકોટી નગર પંચાયતના માયાપુરમાં ભારે વરસાદને કારણે ઘણું નુકસાન થયું છે. પીપલકોટીમાં પહાડ પરથી ભારે કાટમાળના કારણે અનેક વાહનો કાટમાળ નીચે દબાઈ ગયા હતા અને રસ્તાઓ બંધ થઈ ગયા હતા.
સીએમ ધામીએ ઋષિકેશમાં પૂરગ્રસ્ત વિસ્તારોનું કર્યું નિરીક્ષણ
ઉત્તરાખંડના મુખ્યમંત્રી પુષ્કર સિંહ ધામીએ ઋષિકેશમાં પૂર પ્રભાવિત વિસ્તારો અને ગંગા નદીના વધતા જળ સ્તરનું હવાઈ સર્વેક્ષણ કર્યું. પૌરી ગઢવાલમાં સતત વરસાદ થઈ રહ્યો છે. જેના કારણે અલકનંદા નદીમાં ઉછાળો આવ્યો છે. જ્યારે ચમોલીમાં સતત ભારે વરસાદને કારણે બદ્રીનાથ હાઈવે પર માયાપુરમાં પહાડ પરથી ઘણા વાહનો કાટમાળ નીચે દટાઈ ગયા હતા. પૌડી જિલ્લાના મોહનચટ્ટીમાં ભારે વરસાદને કારણે એક રિસોર્ટ ધરાશાયી થયો હતો, જેમાં 5 લોકો દટાયા હતા. આ તમામ લોકો હરિયાણાના કુરુક્ષેત્રના રહેવાસી છે. પોલીસ અને SDRFએ સ્થળ પર સર્ચ ઓપરેશન હાથ ધર્યું હતું.
