અમદાવાદ / 'માત્ર સોગંદનામા નહીં હકીકત માં દેખાય એવું કામ થવું જોઈએ', સાબરમતી નદીમાં વધતા પ્રદૂષણ મુદ્દે ગુજરાત HCના ચાબખા

• સાબરમતી નદીમાં વધતા પ્રદૂષણ મુદ્દે હાઇકોર્ટ આકરા પાણીએ 
• "AMC અને GPCBએ કોંક્રિટ પગલાં નથી લીધા"
• કોઈ વિઝન વગરની કામગીરી ચાલી શકે નહિ: HC

Sabarmati river pollution : સાબરમતી નદીમાં વધતા પ્રદૂષણ મામલે હાઈકોર્ટમાં સુનાવણી હાથ ધરવામાં આવી હતી. નદીમાં વધી રહેલા પ્રદૂષણ મામલે હાઇકોર્ટે આકરું વલણ આપનાવ્યું  છે. કોર્ટે અમદાવાદ મ્યુનિસિપલ કોર્પોરેશનનો ઉધડો લીધો હતો. 

'કોઈ પ્લાનિંગ નથી, કોઈ રોડ મેપ નથી, કોઈ ટાઈમ લાઈન નથી'
કોર્ટે કહ્યું કે કોર્પોરેશન અને GPCB કોઈ કોંક્રિટ પગલાં લઈ રહ્યા નથી. કોઈ પ્લાનિંગ નથી, કોઈ રોડ મેપ નથી, કોઈ ટાઈમ લાઈન નથી. માત્ર સોગંદનામા નહીં હકીકતમાં દેખાય એવું કામ થવું જોઈએ. કોઈ વિઝન વગરની કામગીરી ચાલી શકે નહિ. તો હાઈકોર્ટે વધુમાં કહ્યું કે, મ્યુનિસિપલ કમિશનરનું વિઝન સ્પષ્ટ હોવું જોઈએ. તમારા પ્રશ્નોનું સમાધાન તમારે જ કરવાનું છે. તમારા પ્રહસનો બતાવીને કામગીરી ન બતાવો તે ચલાવી શકાય નહી. 

કામગીર મામલે અસંતોષ ?
કોર્ટે કામગીરી મામલે અસંતોષ વ્યક્ત કરતા કહ્યું કે, તમે કોઈ કામગીરી નથી કરી એવું નથી પણ જે કર્યું છે એ પર્યાપ્ત નથી. જાહેર હિતમાં જે રીતે કામ થવું જોઈએ એ દેખાતું નથી. તો હાઈકોર્ટે પ્રદૂષણ નિયંત્રણ બોર્ડની પણ ઝાટકણી કાઢી હતી. કોર્ટ કહ્યું કે માત્ર આંખમાં ધૂળ નાખવાનું કામ ના કરો. તમને તમારી સત્તાઓ અને જવાબદારીઓ ખબર છે?