- ગુજરાત પબ્લિક સર્વિસ કમિશનનો અમનાવીય ચહેરો
- તાજી મા બનેલ મહિલા ઉમેદવારને 300 કિમી દૂરથી ઈન્ટરવ્યૂમાં બોલાવી
- ઈન્ટરવ્યૂનો બીજો વિકલ્પ આપવાની અરજી ફગાવતાં હાઈકોર્ટ લાલઘુમ
- GPSCને આસી.મેનેજર ક્લાસ-2નું રિઝલ્ટ જાહેર ન કરવાનો ઓર્ડર
ગુજરાત પબ્લિક સર્વિસ કમિશનનો એક અમનાવીય ચહેરો સામે આવ્યો છે. બાળ જન્મના બે જ દિવસમાં મહિલા ઉમેદવારને ઈન્ટરવ્યુમાં બોલાવવાનો આગ્રહ રાખવા બદલ ગુજરાત હાઈકોર્ટે જીપીએસસીની આકરી ઝાટકણી કાઢીને મહિલા ઉમેદવાર જે પરીક્ષાનું ઈન્ટરવ્યુ આપી શકી નહોતી કે પરીક્ષાનું રિઝલ્ટ અટકાવી દેવાનો આદેશ આપ્યો છે.
શું હતો મામલો
GPSCએ મહિલા ઉમેદવારની ઈન્ટરવ્યૂ મુલતવી રાખવા અથવા કોઈ વિકલ્પ પૂરો પાડવાની વિનંતીને નકારી કાઢી હતી. મહિલાએ કહ્યું હતું કે ડિલિવરીના બે દિવસ પછી તે ઈન્ટરવ્યૂ માટે હાજર થવાની સ્થિતિમાં નથી. હકીકતમાં મહિલાની બે દિવસ પહેલા જ ડિલિવરી થઈ હતી અને બાળ જન્મના બે દિવસમાં તે આસિ.મેનેજર (ફાઈનાન્સ એન્ડ એકાઉન્ટસ)ની જગ્યા માટે ઈન્ટરવ્યુમાં આવી શકે તેવી સ્થિતિમાં નહોતી. તેથી તેણે કમિશનને ઈન્ટરવ્યૂ મુલતવી રાખવા અથવા કોઈ વિકલ્પ પૂરો પાડવાની વિનંતી કરી હતી. જોકે કમિશને તે નકારી કાઢીને નિયત તારીખે ઈન્ટરવ્યુમાં હાજર રહેવાનો આગ્રહ રાખ્યો હતો. હવે સ્વાભાવિક રીતે મહિલા ઉમેદવાર આવી શકે તેવી સ્થિતિમાં નહોતી અને આ દરમિયાન ઈન્ટરવ્યુ પણ થઈ ગયા હતા.
હાઈકોર્ટે કહ્યું કે ઈન્ટરવ્યુના રીઝલ્ટ જાહેર ન કરતાં
મહિલા ઉમેદવારે જીપીએસસીના આ અસંવેદનશીલ વલણની સામે ગુજરાત હાઈકોર્ટમાં અરજી કરી હતી જેની આજે સુનાવણી યોજાઈ હતી. હાઈકોર્ટને મહિલા ઉમેદવારની વાતમાં દમ લાગ્યો અને તે પ્રમાણે હાઈકોર્ટે જીપીએસસીને આસિ.મેનેજર (ફાઈનાન્સ એન્ડ એકાઉન્ટસ)ના ઈન્ટરવ્યુના રિઝલ્ટ અટકાવી દેવાનો ઓર્ડર કર્યો હતો.
ડિલિવરીના બે દિવસમાં મહિલાને 300 કિમી દૂરથી આવવાનું કહેવાયું
મહિલા અરજદારે 2020માં જીપીએસસી દ્વારા જાહેરાત કરાયેલી પોસ્ટ પર પસંદગી માટે લેખિત પરીક્ષા પાસ કરી હતી. તેને 1 જાન્યુઆરી, 2024, 18 ડિસેમ્બર, 2023 ના રોજ ઇન્ટરવ્યુની તારીખો વિશે માહિતી આપવામાં આવી હતી. અરજદારે તે જ દિવસે જીપીએસસીને એક ઇમેઇલ લખીને જાણ કરી હતી કે તે ગર્ભવતી છે અને તેની ડિલિવરીની તારીખ જાન્યુઆરી 2024 ના પહેલા અઠવાડિયામાં છે અને ગર્ભાવસ્થાના અંતિમ તબક્કામાં લગભગ 300 કિમી દૂર ગાંધીનગર જવું તેના માટે અશક્ય હશે. અરજદાર મહિલાએ 31 ડિસેમ્બર, 2023 ના રોજ બાળકને જન્મ આપ્યો હતો અને જીપીએસસીને એક ઇમેઇલ દ્વારા જાણ કરી હતી કે તેણે હમણાં જ એક બાળકને જન્મ આપ્યો છે અને વિનંતી કરી હતી કે ઇન્ટરવ્યુ કાં તો મુલતવી રાખવામાં આવે અથવા તેને તેના માટે વૈકલ્પિક સમાધાન આપવામાં આવે. જીપીએસસીએ તેના જવાબમાં અરજદારને 2 જાન્યુઆરીએ ઇન્ટરવ્યૂ માટે હાજર રહેવા જણાવ્યું હતું. તેમણે કહ્યું કે તે તારીખ પછી ઉમેદવારને વધુ સમય આપવામાં આવશે નહીં.
હાઈકોર્ટે શું ચુકાદો આવ્યો
હાઈકોર્ટે એક આદેશમાં નોંધ્યું હતું કે અરજદારે આ પદ માટે અરજી કર્યાના ત્રણ વર્ષ પછી, લેખિત પરીક્ષાના પરિણામો 8 ડિસેમ્બર, 2023 ના રોજ જાહેર કરવામાં આવ્યા હતા. મહિલાને લેખિત પરીક્ષા પાસ કર્યા બાદ ઇન્ટરવ્યુ માટે બોલાવવામાં આવી હતી. કોર્ટે તેના આદેશમાં જણાવ્યું હતું કે, "આ કોર્ટના વિચારેલા અભિપ્રાયમાં, ઉત્તરદાતાઓ દ્વારા આ પ્રકારનો જવાબ સંપૂર્ણ લિંગ અસંવેદનશીલતા દર્શાવે છે, ખાસ કરીને જ્યારે તે સ્પષ્ટ હતું કે અરજદાર જે એક પ્રતિભાશાળી ઉમેદવાર હતા બાળકને જન્મ આપ્યા પછી ત્રીજા દિવસે ઈન્ટરવ્યુમાં ન આવી શકે. કોર્ટે કહ્યું કે જ્યારે આવી સ્થિતિમાં ઉમેદવાર દ્વારા વાજબી વિનંતી કરવામાં આવી હતી, ત્યારે જીપીએસસી પર નિર્ભર છે કે તેઓ કાં તો ઇન્ટરવ્યુ પ્રક્રિયા મુલતવી રાખે અથવા નિયમો અનુસાર સ્વીકાર્ય હોય તો ઓનલાઇન ઇન્ટરવ્યૂ જેવા વૈકલ્પિક સમાધાન પ્રદાન કરે.
આસિ.મેનેજર (ફાઈનાન્સ એન્ડ એકાઉન્ટસ) ક્લાસ-2ના રિઝલ્ટ જાહેર નહીં થાય
હાઈકોર્ટે જીપીએસસીને ઓર્ડર કર્યો હોવાથી વધારે નોટીસ સુધી આસિ.મેનેજર (ફાઈનાન્સ એન્ડ એકાઉન્ટસ) ક્લાસ-2ના રિઝલ્ટ જાહેર નહીં થાય.
