શિખામણ / રાજકીય પક્ષો ચૂંટણીમાં મફત રેવડીનું સાટું વાળી જ લેતા હોય છે લોકો ચેતે, RBI મેમ્બરે આપ્યું મોટું 'જ્ઞાન'

• ચૂંટણીમાં મફતની રેવડીના મુદ્દે હવે RBIના સભ્યે કરી કોમેન્ટ 
• આશિમા ગોયલે કહ્યું- મફતની ભેટ કદી પણ મફતની હોતી નથી
• લોકોએ સમજી વિચારીને ચાલવું જોઈએ 
• રાજકીય પક્ષોએ મતદાતાઓને બધી બાબતોથી વાકેફ કરવું જોઈએ 

ભારતીય રિઝર્વ બેન્કની  મોનિટરી પોલિસી સમિતીના સભ્ય આશિમા ગોયલે કહ્યું કે મફત ભેટ ક્યારેય પણ મફત હોતી નથી. તેમણે કહ્યું કે જ્યારે રાજકીય દળ આવી યોજનાઓની ઓફર કરે ત્યારે તેમણે મતદાતાઓને તેમના નાણાકીય ભંડોળ અને બીજા મુદ્દાઓથી વાકેફ કરવા જોઈએ. 

ભંડોળની જાહેરાતથી લોકોની લાલચ ઓછી થઈ જશે
આશિમા ગોયલે કહ્યું કે મફત ભેટની જાહેરાતની સાથે આવું જાહેર કરવાથી લોકોની લાલચ ઓછી થઈ જશે. તેમણે કહ્યું કે જ્યારે સરકાર મફતની સુવિધા આપતી હોય તો ક્યાંને ક્યાંય ખર્ચની ભરપાઈ થતી જ હોય છે. તેના દ્વારા એવી જાહેર વસ્તુઓ અને સેવાઓમાં રોકાણ કરી શકાય, જે ક્ષમતા નિર્માણ કરતી હોય. આશિમા ગોયલની આ કોમેન્ટને આમ આદમી પાર્ટી સાથે જોડીને જોવાઈ રહી છે. આમ આદમી પાર્ટી ચૂંટણીમાં મોટી મોટી ભેટની જાહેરાત કરતી હોય છે. તાજતરમાં પીએમ મોદીએ પણ ચૂંટણીઓમાં મફતની રેવડીઓ પર નિવેદન આપ્યું હતું. 

રાજકીય પક્ષોની ઓફર ગરીબોને સૌથી વધારે નુકશાન કરે છે 
ગોયલે કહ્યું કે, સ્વાસ્થ્ય, શિક્ષણ, હવા અને પાણીની નબળી ગુણવત્તાના ભોગે આવી મફત સુવિધાઓ ઉપલબ્ધ છે, જે ગરીબોને સૌથી વધુ નુકસાન પહોંચાડે છે. "જ્યારે રાજકીય પક્ષો આવી યોજનાઓ ઓફર કરે છે, ત્યારે તેઓએ મતદારોને તેમના માટે ધિરાણ અને અન્ય પાસાઓ વિશે જણાવવું જોઈએ. આનાથી સ્પર્ધાત્મક લોકપ્રિયતા તરફની લાલચમાં ઘટાડો થશે. 

વૈશ્વિક આંચકાની વચ્ચે જળવાઈ રહ્યો ભારતનો વિકાસ દર
આશિમા ગોયલે જણાવ્યું હતું કે વૈશ્વિક આંચકા અને વ્યાજદરમાં વધારો થવા છતાં ભારતીય વિકાસ જળવાઈ રહ્યો છે અને ભારતનો દેખાવ અપેક્ષા કરતાં સારો રહ્યો છે. તેમણે કહ્યું કે સ્થાનિક માંગ વૈશ્વિક મંદીને ઓછી કરી શકે છે. તેમણે એવી આશા પણ વ્યક્ત કરી હતી કે, ભારતની નિકાસમાં વધારો થશે.