આવ રે વરસાદ / અપૂરતા વરસાદ ઉપરથી પાકમાં જીવાતનો ઉપદ્રવ, 10 કલાકની કાપવાળી વીજળી, ગુજરાતના ખેડૂતોની હાલત દયનીય

• માંગરોળમાં વરસાદ ખેંચાતા ખેડૂતોની હાલત કફોડી
• અપૂરતા વરસાદને લઇ ખેડૂતોનો પાક સુકાયો
• પાકમાં જીવાત અને ઉપદ્વવ પડતા પાક નષ્ટ

રાજ્યમાં વરસાદ ખેંચાતા ખેડૂતોની હાલત કફોડી બની છે. બનાસકાંઠા, સુરત, જામનગર સહિતના વિવિધ વિસ્તારોમાં વરસાદી પાક નષ્ટ થવાને આરે આવ્યા છે. માંગરોળમાં સોયાબીનની ખેતી કરતા ખેડૂતો મૂશ્કેલીમાં મુકાયા છે. હાલ ખેડૂતોનો પાક તૈયાર છે અને પાકમાં ઉપદ્રવ અને જીવાત પડવાથી ખેડૂતોના તમામ પાક નષ્ટ થયા છે.

પાક સુકાવાને આરે
ઓછા અને અપૂરતા વરસાદના લીધે એરંડા, કપાસ, જુવાર, સોયાબીન સહિત ઘાસચારાના પાક સુકાવાને આરે ઉભા છે. છેલ્લા એક મહિનાથી છુટોછવાયો વરસાદ પણ ન વરસતાં રાજ્યમાં ખેડૂતોના પાક બળી રહ્યા છે. હાલ ચોમાસું પાકની ગંભીર સ્થિતિને કારણે ખેડૂતો ચિંતામાં મુકાયા છે. મોંઘા બિયારણો અને ખાતર સાથે સારા પાકની આશા સેવી રહેલા ખેડૂતોના પાકને વરસાદ વિના મોટા નુકસાનનો અંદાજ છે. ત્યારે ખેડૂતોઓએ સરકાર ખેતીવાડી વિભાગના અધિકારીઓ પાસે તાત્કાલિક સર્વે કરાવી વળતર આપવા માગ કરી છે.

પાકમાં ઉપદ્રવ અને જીવાત પણ વધ્યો
વરસાદ ન વરસતા ખેડૂતોની ચિંતામાં વધારો થયો છે. પિયત વિના પાક નાશ થઈ રહ્યો છે તો બીજી તરફ પાકમાં ઉપદ્રવ અને જીવાત પણ વધ્યો છે. મગફળી, સોયાબીન અને કપાસના પાકને નુકસાન થયો છે. વરસાદ ખેંચાતા પાકમાં જંતુઓનો ઉપદ્રવ વધ્યો છે. રાજ્યના કેટલાક જિલ્લામાં સરકારે 10 કલાક વીજળી આપવાનો નિર્ણય લીધો છે જ્યારે હજુ પણ જામનગરમાં 10 કલાક વીજળી આપવાની વાતો વચ્ચે ખેડૂતોની માગ વધી છે. વારંવાર વીજ કાપ આપતા હોવાથી ખેડૂતો પરેશાન થઇ રહ્યાં છે. ખેડૂતો જણાવી રહ્યાં છે કે, 10 કલાકને બદલે માત્ર 6 કલાક સતત વીજળી આપો તેવી માગ કરી છે.