BIG BREAKING / પૂર્વ IPS સંજીવ ભટ્ટને ગુજરાત HC તરફથી ઝટકો: કોર્ટે ફગાવી અરજી, નીચલી કોર્ટના આદેશને રાખ્યો માન્ય

• પૂર્વ IPS સંજીવ ભટ્ટને હાઈકોર્ટમાંથી ઝટકો
• હાઈકોર્ટે પૂર્વ IPS સંજીવ ભટ્ટની અરજી ફગાવી
• નીચલી કોર્ટના આદેશને રાખ્યો માન્ય 

પૂર્વ IPS સંજીવ ભટ્ટને હાઈકોર્ટમાંથી ઝટકો મળ્યો છે. ગુજરાત હાઈકોર્ટે સંજીવ ભટ્ટની અરજીને ફગાવી દીધી છે. ગુજરાત હાઈકોર્ટે નીચલી કોર્ટના ઓર્ડરમાં કોઈ ખામી ન હોવાનું અવલોકન કર્યું છે. HCએ નીચલી કોર્ટના આદેશને માન્ય રાખી સંજીવ ભટ્ટની અરજી ફગાવી છે. 

સંજીવ ભટ્ટ પર છે આ આરોપ
સંજીવ ભટ્ટ વર્ષ 1996માં બનાસકાંઠાના જિલ્લા પોલીસ વડા હતા અને સંજીવ ભટ્ટ પર તેમના કાર્યકાળ દરમિયાન ખોટો નાર્કોટિક્સ કેસ ઉભો કરવાનો આરોપ છે. આ કેસમાં સંજીવ ભટ્ટે પોતાના તરફે અમુક સાક્ષીઓ બોલાવવાની મજૂરી માંગતી અરજી કરી હતી. જે અરજીને હાઈકોર્ટે ફગાવી દીધી છે. 

અગાઉ 2021માં પણ ગુજરાત હાઈકોર્ટે  ફગાવી હતી અરજી 
આપને જણાવી દઈએ કે, આ પહેલા પણ ગુજરાત હાઈકોર્ટ સંજીવ ભટ્ટની અરજીને ફગાવી ચૂકી છે. ગુજરાત હાઈકોર્ટે ઓગસ્ટ 2021માં સંજીવ ભટ્ટની અરજીને ફગાવી હતી. સંજીવ ભટ્ટની અરજી પર સુનાવણી કરતી વખતે હાઈકોર્ટે કહ્યું હતું કે, કાયદાનો દુરુપ્રયોગ કરનારાની અરજી સ્વીકારવા પાત્ર નથી. મહત્વનું છે કે, પાલનપુર કોર્ટે ડ્રગ્સ કેસમાં નિવૃત્ત DySP આઈ.બી.વ્યાજને છૂટકારો આપ્યો હતો. સરકારી સાક્ષી બનાવીને પાલનપુર કોર્ટે ડ્રગ્સ કેસમાં નિવૃત્ત DySP આઈ.બી.વ્યાજને છૂટકારો આપતા સંજીવ ભટ્ટે હાઈકોર્ટમાં અરજી કરી હતી.

શું હતો કેસ
1996માં પાલનપુરની હોટેલમાં રાજસ્થાનના વકીલની રૂમમાં ખોટી રીતે ડ્રગ્સ પ્લાન્ટ કરી, દુકાન ખાલી કરવા ધમકી આપી વકીલને ફસાવવાનો આરોપ સંજીવ ભટ્ટ પર લાગ્યો હતો. આ મામલે વર્ષ 2018માં પૂર્વ IPS સંજીવ ભટ્ટની સીઆઈડી ક્રાઈમે ધરપકડ કરી હતી. CID ક્રાઈમે પાલનપુરની એક હોટલના રૂમમાં અફીણનો જથ્થો મુકાવી રાજસ્થાન પાલીના એક વકીલને ખોટા કેસમાં ફસાવી દેવાના કેસમાં ધરપકડ કરી હતી. આ ઉપરાંત સીઆઈડી ક્રાઈમે પાલનપુરના તત્કાલીન પીઆઈ વ્યાસની પણ ધરપકડ કરી હતી. જે બાદ પાલનપુર કોર્ટ દ્વારા વ્યાસને સરકારી સાક્ષી બનાવીને 1996ના ડ્રગ કેસમાં છૂટકારો આપવાની મંજૂરી આપી હતી.