'વિકાસ'માં અંધારું / આઝાદીના 76 વર્ષ પછી પણ ગુજરાતનાં આ ગામના ઘરમાં અંધારું થતાં દીવા પ્રગટે છે, અહીં હજુ અંધારા નથી ઉલેચાયા

 

• જમ્બેરા ગામ વીજળીથી વંચિત
• 76 વર્ષ બાદ પણ ગામમાં ન પહોંચી વીજળી
• જમ્બેરાનો ક્યારે થશે વિકાસ?

અંતરિયાળ વિસ્તારોની સમસ્યા એ છે કે આજે પણ લોકો વીજળીથી વંચિત છે દાંતા તાલુકામાં મોટેભાગે અંતરિયાળ ગામડાઓમાં લોકોના મકાનમાં વીજળીની સુવિધા પહોંચી નથી. જોકે, ગુજરાત વિદ્યુત બોર્ડ દ્વારા લાઈટના થાંભલા તો દરેક ગામોમાં નખાયા છે, પરંતુ તેને કનેક્શન અપાયા નથી અને જેને લઈને અંતરિયાળ વિસ્તારના લોકો મુશ્કેલી ભોગવી રહ્યા છે.

3 વખત સર્વે કર્યા બાદ પણ ગામમાં ન મળી વીજળી
વાત છે બનાસકાંઠા જિલ્લાના દાંતા તાલુકાના જમ્બેરા ગામની, જે શક્તિપીઠ અંબાજીથી માત્ર 10 કિલોમીટર દૂર આવેલું છે અને દાયકાઓ બાદ પણ જમ્બેરા ગામના લોકો વીજળીથી વંચિત છે. GEB દ્વારા ત્રણ-ત્રણ વખત સર્વે કર્યા છતાં અંતરિયાળ વિસ્તારના આદિવાસી લોકોના મકાનોમાં વીજળી પહોંચી નથી. એક તો આ જંગલ વિસ્તાર છે અને તેમાં પણ વીજળીની સુવિધા ન હોય એટલે રાત્રિના સમયે જંગલી જાનવરોનો ભય રહે છે. આવી સ્થિતિમાં આ અંતરિયાળ વિસ્તારના લોકોની માંગ છે કે તાત્કાલિક વીજળી આપવામાં આવે.

બાળકોના અભ્યાસમાં પડી રહી છે અસર
અનેકવાર ગ્રામજનોએ વીજળી માટે રજૂઆતો કરી છે પરંતુ હજી સુધી તંત્ર અથવા જીઈબી દ્વારા લોકોના મકાનમાં વીજળી પહોંચે એવી કોઈ સુવિધા ગોઠવાઈ નથી. આ આદિવાસી વિસ્તારના લોકોના બાળકો પણ અભ્યાસ કરે છે ત્યારે રાત્રિના સમયે અભ્યાસ કેવી રીતે કરવો એ પણ મુશ્કેલી છે.

ગ્રામજનોએ તાત્કાલિક વીજળી આપવા કરી માગ
આ શ્રમિક આદિવાસી હોય દિવસભરની મજૂરી કરીને રાત્રે આવે ત્યારે ખાસ કરીને વીજળીની જરૂર પડતી હોય છે. આ ગામમાં પાણીની પણ સુવિધા નથી અને રોડ રસ્તાની પણ સુવિધા નથી. ત્યારે ગ્રામજનોની માગણી છે કે અમને સરકાર વીજળી આપે તો અમે અમારા બાળકોને અભ્યાસ કરાવી શકીએ અને રાત્રિના સમયે જંગલી પ્રાણીઓનો પણ ડર ન લાગે.

 

સળગતા સવાલ
- જમ્બેરાનો ક્યારે થશે વિકાસ?
- ગામમાં વીજળી ક્યારે મળશે?
- સર્વે કર્યા બાદ પણ કેમ નથી મળી વીજળી?
- ગામના લોકોની સમસ્યા ક્યારે સમજશે તંત્ર?
- કેટલાય સમયથી સમસ્યા છતા નિરાકરણ કેમ નહી?
- રજૂઆત બાદ પણ કેમ નથી દૂર થઈ સમસ્યા?
- શું દાંતા વિસ્તારના નેતાઓને આ સમસ્યા નથી દેખાતી?