VTV Impact / અહેવાલ બાદ સુરતની નવી સિવિલમાં ધૂળ ખાતા વેન્ટિલેટરને લઇ તંત્ર હરકતમાં, સત્તાધીશો પાસે માંગ્યો ખુલાસો

• સુરતમાં VTV NEWSના અહેવાલની અસર 
• VTV NEWS ફરી બન્યું લોકોનો અવાજ
• વેન્ટિલેટરની સાફ સફાઈ કરવામાં આવી

સામાજિક જવાબદારી નિભાવવામાં હંમેશા અગ્રેસર રહેતા VTV NEWSના સચોટ અને અસરદાર અહેવાલનો ફરી એક વખત પડઘો પડ્યો છે. VTV NEWSએ સુરતની નવી સિવિલ હોસ્પિટલ ખાતે ધૂળ ખાતા વેન્ટિલેટર મામલે અહેવાલ પ્રસારિત કર્યો હતો. VTV NEWSના અહેવાલ બાદ સિવિલ તંત્ર હરકતમાં આવ્યું છે. 

અહેવાલ બાદ વેન્ટિલેટરની કરાઈ સાફ સફાઈ 
નવી સિવિલમાં ધૂળ ખાતા વેન્ટિલેટર મામલે તંત્ર હરકતમાં આવ્યું છે. વહીવટી તંત્ર દ્વારા વેન્ટિલેટરની સાફ સફાઈ કરાવવામાં આવી છે. જે વેન્ટિલેટરો પર ધૂળના થર જામી ગયા હતા, તે વેન્ટિલેટરોની યોગ્ય રીતે સાફ સફાઈ કરવામાં આવી છે.  ફક્ત એટલું જ નહીં વેન્ટિલેટરની સાફ સફાઈ કરીને તેની ઉપર કવર ઢાંકી દેવામાં આવ્યા છે. મામલો ઉજાગર થયા બાદ તાબડતોબ વેન્ટિલેટર માટે કવર બનાવડાવવામાં આવ્યા છે. 

વેન્ટિલેટર પર ઢાંકી દેવામાં આવ્યા કવર
લગભગ 30થી 40 જેટલા વેન્ટિલેટરની ઉપર કવર ઢાંકી દેવામાં આવ્યા છે. જોકે, હજુ પણ 50 જેટલા વેન્ટિલેટર પર કવર ઢાંકવામાં આવ્યા નથી. આ કવર બનાવવા માટે ઓર્ડર આપી દેવામાં આવ્યો છે. આજ સાંજ સુધીમાં આ તમામ વેન્ટિલટરને  કવર કરી દેવામાં આવશે.

શું છે સમગ્ર મામલો?
તાજેતરમાં જ વીટીવી ન્યૂઝની ટીમ સુરત નવી સિવિલમાં હોસ્પિટલ ખાતે પહોંચી હતી. આ દરમિયાન સુરત સિવિલ હોસ્પિટલની મોટી બેદરકારી સામે આવી હતી. VTV NEWSની તપાસમાં સિવિલ હોસ્પિટલ ખાતે વેન્ટિલેટર ધૂળ ખાતા જોવા મળ્યા હતા. નવી સિવિલમાં પ્રથમ માળે PM કેરમાંથી મળેલા 100થી વધુ વેન્ટિલેટર ધૂળ ખાઈ રહ્યા હતા. VTV NEWSએ ધૂળ ખાતા વેન્ટિલેટરનો અહેવાલ પ્રસારિત કર્યો હતો.

સિવિલ સત્તાધીશો પાસે માંગવામાં આવ્યો હતો ખુલાસો
VTV NEWSના અહેવાલ બાદ ગાંધીનગરથી સિવિલ સત્તાધીશો પાસે ખુલાસો પણ માંગવામાં આવ્યો હતો. જે બાદ સિવિલ હોસ્પિટલનું વહીવટી તંત્ર દોડતું થયું હતું. તંત્રએ તાત્કાલિક વેન્ટિલેટરની સાફ સફાઈ કરાવી હતી.