- ઓસ્ટ્રેલિયા અને પાકિસ્તાન વચ્ચે વર્લ્ડ કપ 2023 ની 18મી મેચ રમાઈ હતી
- આ મેચ દરમિયાન એક દર્શકે 'પાકિસ્તાન ઝિંદાબાદ'ના નારા લગાવ્યા હતા
- 'ભારત માતા કી જય'ના નારા લગાવી શકો તો 'પાકિસ્તાન ઝિંદાબાદ' કેમ નહીં?
શુક્રવારે રાત્રે બેંગલુરુના એમ ચિન્નાસ્વામી સ્ટેડિયમમાં ઓસ્ટ્રેલિયા અને પાકિસ્તાન વચ્ચે વર્લ્ડ કપ 2023 ની 18મી મેચ રમાઈ હતી.આ મેચમાં ઘણા રન થયા હતા અને 5 વખતની ચેમ્પિયન ઓસ્ટ્રેલિયાએ પાકિસ્તાન સામે 62 રને શાનદાર જીત નોંધાવી હતી. આ મેચ દરમિયાન પાકિસ્તાન હાર્યું હતું પરંતુ તેના એક પ્રશંસકે સોશિયલ મીડિયા પર હેડલાઇન્સ બનાવી છે.
મેચ દરમિયાન એક દર્શકે 'પાકિસ્તાન ઝિંદાબાદ'ના નારા લગાવ્યા
વાસ્તવમાં ઓસ્ટ્રેલિયા-પાકિસ્તાન મેચ દરમિયાન એક ફેન 'પાકિસ્તાન ઝિંદાબાદ'ના નારા લગાવી રહ્યો હતો.જ્યારે એક પોલીસકર્મીએ તેને આમ કરતા અટકાવ્યો ત્યારે હોબાળો મચી ગયો હતો.આ ઘટનાનો વીડિયો સોશિયલ મીડિયા પર વાયરલ થઈ રહ્યો છે. 43 સેકન્ડના વીડિયોમાં પાકિસ્તાની જર્સી પહેરેલ એક વ્યક્તિ પોલીસ અધિકારી સાથે દલીલ કરતો જોઈ શકાય છે. ચાહકે કહ્યું, 'હું પાકિસ્તાનથી છું, જો હું 'પાકિસ્તાન ઝિંદાબાદ' નહીં બોલું તો શું બોલીશ?'
'ભારત માતા કી જય'ના નારા લગાવી શકો તો 'પાકિસ્તાન ઝિંદાબાદ' કેમ નહીં?
ચાહકે એમ પણ પૂછ્યું કે જ્યારે લોકો 'ભારત માતા કી જય'ના નારા લગાવી રહ્યા છે તો પછી તેઓ 'પાકિસ્તાન ઝિંદાબાદ'ના નારા કેમ નથી લગાવી શકતા?જવાબમાં અધિકારી કહે છે કે 'ઝિંદાબાદ નહીં' બોલવાનું. ચાહક પછી પોલીસ અધિકારી એ વાક્યનું પુનરાવર્તન કરવા કહે છે કારણ કે તે તેને તેના ફોન પર રેકોર્ડ કરવાનો પ્રયાસ કરે છે.
કોઈપણ અપ્રિય ઘટનાને ટાળવા પોલીસકર્મીઓએ લીધા કડક પગલાં
સોશિયલ મીડિયા પર ફેન્સ આ ઘટના પર અલગ-અલગ પ્રકારની પ્રતિક્રિયા આપી રહ્યા છે. પરંતુ હવે આ ઘટનાનું સમગ્ર સત્ય સામે આવ્યું છે. હકીકતમાં, ઓસ્ટ્રેલિયા અને પાકિસ્તાન વચ્ચે વર્લ્ડ કપ મેચ દરમિયાન, શુક્રવારે એમ ચિન્નાસ્વામી સ્ટેડિયમ સંકુલમાં તૈનાત પોલીસકર્મીઓએ કોઈપણ અપ્રિય ઘટનાને ટાળવા માટે ચાહકોને નિયંત્રિત કરવા માટે કેટલાક કડક પગલાં લીધા હતા.પોલીસે ચાહકોને વિરોધ રૂપે કાળા કપડાં ન પહેરવાની સલાહ આપી હતી.જો કે આ સ્ટેડિયમમાં પ્રવેશતી વખતે તેમને ચોક્કસ રંગ અથવા ટીમની જર્સી પહેરવાથી નહતા રોકવામાં આવ્યા.
પોલીસે ચાહકોને ઉશ્કેરણીજનક સૂત્રો સાથે પ્લેકાર્ડનો ઉપયોગ ન કરવા જણાવ્યું હતું.સ્ટેડિયમની સુરક્ષા સંભાળતા અધિકારીએ જણાવ્યું હતું કે, 'અમને સ્ટેડિયમમાં પ્રવેશતા પહેલા ચાહકોના પ્લેકાર્ડ અને બેનરો તપાસવાની સૂચના આપવામાં આવી હતી, જેથી કોઈ અપ્રિય ઘટના ન બને.'
કેવી રહી ઓસ્ટ્રેલિયા અને પાકિસ્તાન મેચ?
ટોસ હાર્યા બાદ પ્રથમ બેટિંગ કરવા આવેલી ઓસ્ટ્રેલિયન ટીમે શરૂઆતથી જ પાકિસ્તાનીઓ પર પોતાની પકડ મજબૂત કરી લીધી હતી.ડેવિડ વોર્નર (163) અને મિશેલ માર્શ (121)ની ઓપનિંગ જોડીએ પ્રથમ વિકેટ માટે 259 રનની ભાગીદારી કરી હતી.આ દરમિયાન બંને બેટ્સમેનોએ સદી ફટકારી હતી.જો કે આ પછી ઓસ્ટ્રેલિયાનો કોઈ બેટ્સમેન લાંબો સમય સુધી ક્રિઝ પર ટકી શક્યો નહોતો પરંતુ કાંગારૂ ટીમ 367ના સ્કોર સુધી પહોંચાડવામાં સફળ રહી હતી.
શાહીન આફ્રિદીએ આ સમયગાળા દરમિયાન પાકિસ્તાન માટે પોતાનો પંજો ખોલ્યો હતો.આ સ્કોરનો પીછો કરવા ઉતરેલી પાકિસ્તાની ટીમને પણ તેના ઓપનિંગ બેટ્સમેનોએ સારી શરૂઆત આપી હતી અને પ્રથમ વિકેટ માટે 134 રન જોડ્યા હતા, પરંતુ નબળા મિડલ ઓર્ડરને કારણે ટીમ 45.3 ઓવરમાં 302 રન પર સમેટાઈ ગઈ હતી.ઓપનર સિવાય કોઈ પાકિસ્તાની બેટ્સમેન 50 રનનો આંકડો પાર કરી શક્યો નહોતો.ઓસ્ટ્રેલિયા તરફથી એડમ ઝમ્પાએ સૌથી વધુ 4 વિકેટ લીધી હતી.
