- સાસરિયાઓએ પુત્રવધૂને 'અઘોરી પૂજા' માટે બાંધી રાખી તેને ભૂખી રાખી
- બળજબરીથી માસિક ધર્મનું (પિરિયડનું) લોહી એકઠું કરી 50,000 રૂપિયામાં વેચ્યું
- પરિણીતાએ પતિ સહિત 7 સાસરિયાઓ સામે પોલીસ ફરિયાદ નોંધાવી
મહારાષ્ટ્રના પુણેથી એક ચોંકાવનારા સમાચાર સામે આવ્યા છે. વાત જાણે એમ છે કે, સાસરિયાઓએ 27 વર્ષની પુત્રવધૂને 'અઘોરી પૂજા' માટે બાંધી રાખી તેને ભૂખી રાખી હતી. જે બાદમાં બળજબરીથી તેનું માસિક ધર્મનું (પિરિયડનું) લોહી એકઠું કર્યું અને 50,000 રૂપિયામાં વેચી દીધું હતું. આ તરફ જ્યારે મહિલા પુણેમાં તેના મામાના ઘરે ગઈ ત્યારે તેણે ફરિયાદ નોંધાવી. સમગ્ર મામલે વિશ્રાંતવાણી પોલીસે મહિલાના પતિ સહિત 7 સાસરિયાઓ સામે ગુનો નોંધી વધુ તપાસ માટે બીડ પોલીસને કેસ ટ્રાન્સફર કર્યો છે.
શું છે સમગ્ર મામલો ?
મીડિયા રિપોર્ટ્સ અનુસાર આ મામલો વર્ષ 2019નો છે. મહારાષ્ટ્રના બીડના સૌંદાના ગામની 27 વર્ષીય પરિણીત મહિલાએ પોતાની ફરિયાદમાં આરોપ લગાવ્યો છે કે, તેની સાથે બળાત્કાર ગુજારવામાં આવ્યો હતો. તેણીને માસિક ધર્મના સમયગાળા દરમિયાન બાંધવામાં આવી હતી. આ સાથે ત્રણ દિવસના ભૂકી રાખવામાં આવી હતી. આ સાથે તેણીનું માસિક ધર્મનું (પિરિયડનું) લોહી એકત્ર કરવામાં આવ્યું અને તે લોહી આરોપી દિયરે 'અઘોરી પૂજા' માટે રૂ. 50,000માં વેચ્યું હતું. પરણિત મહિલા સાથે તેના સાસરે ગયેલી ક્રૂરતા તેની સહનશક્તિ બહાર થઈ ગઈ હતી. ત્યારબાદ પરણિત મહિલા બીડ જિલ્લામાં તેના સાસરેથી પુણેમાં તેના મામાના ઘરે પહોંચી અને કેસ દાખલ કર્યો.
કાળા જાદુ એક્ટ હેઠળ કેસ
હાલ તો સમગ્ર મામલે પોલીસે આરોપીઓ વિરુદ્ધ અકુદરતી ગુનાઓ, છેડતી અને અઘોરી પ્રથા અને કાળા જાદુ એક્ટ હેઠળ કેસ નોંધ્યો છે. પોલીસનું કહેવું છે કે, મહિલાનું પિયર પુણેમાં છે, આ ગુનાની ફરિયાદ અહીંના વિશ્રાંતવાણી પોલીસ સ્ટેશનમાં નોંધવામાં આવી છે. પરંતુ આ કેસ બીડ પોલીસને તપાસ માટે ટ્રાન્સફર કરવામાં આવ્યો છે.
રાજ્ય મહિલા આયોગે આ મામલાની નોંધ લીધી
મહત્વનું છે કે, રાજ્ય મહિલા આયોગે પણ આ મામલાની નોંધ લીધી છે. નોંધનીય છે કે, આ પહેલો કિસ્સો નથી, જ્યારે મહારાષ્ટ્રમાં અઘોરી પૂજાને લઈને આવો વિચિત્ર કિસ્સો સામે આવ્યો છે. આ પહેલા પણ એક ઘટનામાં પીડિતાએ તેના સાસરિયાઓ પર આરોપ લગાવ્યો હતો કે, તેને બાળક માટે માનવ અને જાનવરના હાડકા ખાવા માટે મજબૂર કરવામાં આવી હતી. પુણેમાં છેલ્લા બે મહિનામાં આ બીજો કિસ્સો છે, જ્યારે તંત્ર-મંત્રની આડમાં પરિણીત મહિલાઓ સાથે બર્બરતાની હદ વટાવી દેવામાં આવી હોય.
