- બુલેટ ટ્રેનને કારણે રહીશો મુશ્કેલીમાં મુકાયા
- નિલમબાગ સોસાયટીની મુશ્કેલીઓ વધી
- સુપરફાસ્ટ ટ્રેન નીકળતા ઇમારત ધ્રુજે છેઃ સ્થાનિક
- દુર્ઘટના બને તો કોણ જવાબદારઃ સ્થાનિક
Ahmedabad News: અમદાવાદથી મુંબઈ વચ્ચે દોડનારી દેશની પ્રથમ એવી બુલેટ ટ્રેનના પ્રોજેક્ટને કારણે શાહીબાગની નિલમબાગ સોસાયટીના રહીશો મુશ્કેલીમાં મુકાયા છે. સોસાયટીના રહીશો છેલ્લા ત્રણ વર્ષ કરતા વધુ સમયથી બુલેટ ટ્રેન પ્રોજેક્ટનો વિરોધ કરી રહ્યા છે. સોસાયટીના રહીશોને ડર સતાવી રહ્યો છે કે તેમની સોસાયટી 40 વર્ષ જૂની છે, બુલેટ ટ્રેન માટે જે રીતે પિલરનું કામકાજ ચાલી રહ્યું છે તેનાથી તેમની સોસાયટી વધુ નબળી પડી જશે. જો સાવધાની રાખવામાં નહીં આવે તો તે ધ્વસ્ત પણ થઈ શકે છે.
નિલમબાગ સોસાયટીના રહીશો ચિંતામાં
શાહીબાગના ગિરધરનગર વિસ્તારની નિલમબાગ સોસાયટીના રહીશો બુલેટ ટ્રેન પ્રોજેક્ટની કામગીરીને લઈ નારાજ છે. શાહીબાગમાં ચંદ્રમણી હોસ્પિટલની પાછળ આવેલી નિલમબાગ સોસાયટીમાં 48 યુનિટ છે અને તે રેલવે ટ્રેકથી માત્ર 1.25 મીટર દૂર છે. આ ઈમારત એટલી જૂની છે કે તે ધ્રુજારી સહન કરી શકે તેમ નથી. સ્થાનિકો જણાવી રહ્યા છે કે, ટ્રેન નીકળતા ઇમારત ધ્રુજે છે. જો કોઈ દુર્ઘટના બને તો કોણ જવાબદાર?
'શું અમે અમારી આહુતી આપીએ તેમાં તમને રસ છે'
શ્યામભાઈ શાહ નામના રહીશે જણાવ્યું કે,'અમે આ પ્રોજેક્ટનો વિરોધ નથી કરી રહ્યા, અમે આ પ્રોજેક્ટને આવકારીએ છીએ. અમે નજીકમાં રહીએ છીએ તેના કારણે અમારા મકાનો પડી જાય શું તમે અમારી આહુતી લેવામાં માનો છો, શું અમે અમારી આહુતી આપીએ તેમાં તમને રસ છે.'
સુપરફાસ્ટ ટ્રેન નીકળે તો પણ ધ્રુજારી થાય છેઃ સ્થાનિક
અન્ય એક રહીશે જણાવ્યું કે, અત્યારે માલગાડી કે સુપરફાસ્ટ ટ્રેન નીકળે તો પણ ધ્રુજારી થાય છે. બુલેટ ટ્રેનવાળા તો કંઈ માનવા તૈયાર જ નથી. તેઓ તો સ્પષ્ટ શબ્દોમાં કહે છે કે અમારે તમારી સાથે કોઈ લેવા દેવા જ નથી. અમે અમારું કામ કરીશું તેમાં તમારી સોસાયટીને કઈ નુકસાન નહીં થાય. પરંતુ નુકસાન થશે તો જવાબદારી તમે લેશો, તેનું અમને લેખિતમાં આપો.
અમારું સાંભળવામાં આવતું નથીઃ સ્થાનિક મહિલા
નિલમબાગ સોસાયટીની મહિલાએ જણાવ્યું કે, અમે નિલમબાગ સોસાયટીના રહીશો બુલેટ ટ્રેન પ્રોજેક્ટને આવકારીએ છીએ. અમે ત્રણ વર્ષથી વારંવાર આજ રજૂઆત લેખિતમાં કરી રહ્યા છીએ, છતાં અમારું કંઈ સાંભળવામાં આવતું નથી. અમે સ્ટ્રક્ચર રિપોર્ટ પણ રજૂ કર્યો છે, સ્ટ્રક્ચર રિપોર્ટમાં એવું કહેવામાં આવ્યું છે કે અહીં બુલેટ ટ્રેનનો પ્રોજેક્ટ જ નહીં, અન્ય કોઈ બાંધકામ કરવામાં આવશે તો પણ તમારો ફ્લેટ ધરાશાયી થવાની પૂરેપૂરી સંભાવના છે. અમારો ફ્લેટ રહેવા લાય છે.
