- દિલ્લીના CM અરવિંદ કેજરીવાલનો ગુજરાત પ્રવાસ નક્કી
- AAPના મિશન 2022 અભિયાન અંતર્ગત ગુજરાત આવશે
- 6 જૂને અરવિંદ કેજરીવાલ ગુજરાત આવશે
ગુજરાત વિધાનસભાની ચૂંટણીને લઇને તમામ રાજકીય પાર્ટીઓએ તૈયારી શરૂ કરી છે.ત્યારે આમ આદમી પાર્ટી દ્વારા સમગ્ર ગુજરાતમાં 6 ઝોનમાં પરિવર્તન યાત્રા શરૂ કરવામાં આવી છે. જેના પૂર્ણાહુતિ કાર્યક્રમમાં દિલ્લીના CM અને આમ આદમી પાર્ટીના સંયોજક કેજરીવાલ હાજર રહેશે. ગુજરાતમાં છેલ્લા 2 મહીનામાં કેજરીવાલનો આ ચોથો પ્રવાસ હશે. ચૂંટણીની વ્યુહરચનાના ભાગ રૂપે AAPના મિશન 2022 અભિયાન અંતર્ગત કેજરીવાલ AAPની પરિવર્તન યાત્રાના સમાપન કાર્યક્રમમાં હાજરી આપશે.6 જૂને કેજરીવાલ ઉત્તર ગુજરાતમાં ચૂંટણી પ્રચાર કરશે આ રણનીતિ પાટીદારો મતોને પ્રભાવિત કરશે. સીએમ કેજરીવાલ અહીં જંગી જાહેરસભાને પણ સંબોધન કરશે.
AAP પરિવર્તન યાત્રા
15 મેથી AAP પરિવર્તન યાત્રાની શરૂઆત કરવામાં આવી છે. જેમાં ગુજરાતની તમામ 182 વિધાનસભા બેઠકને આવરી લેવામાં આવી છે. સોમનાથ, દ્વારકા, દાંડી, અબડાસા અને ઉમરગામથી પરિવર્તન યાત્રાની શરૂઆત કરી ગુજરાતભરમાં પ્રદેશ નેતાઓ આપ પાર્ટીનો પ્રચાર કરી રહ્યા છે. 20 દિવસ સુધી ચાલેલી આ યાત્રા મોટા ગામમાં જઈ પ્રભાતફેરી, નુક્કડ નાટકો થકી લોકોને જોડી રહી છે. આપના દાવા અનુસાર ગુજરાતના 10 લાખ લોકો સુધી પરિવર્તન યાત્રા પહોંચી છે. બેરોજગારી, ખેડૂત, શિક્ષણ, મહિલાઓના મુદ્દાઓ લઈ આપ પાર્ટી ગુજરાતમાં પરિવર્તન યાત્રા કાઢી છે જેના સમાપન કાર્યક્રમમાં 6 જૂને કેજરીવાલ પણ હાજર રહેશે.
કેજરીવાલના ગુજરાત પ્રવાસ
1 એપ્રિલથી 2 દિવસ
- AAPના સંયોજક અરવિંદ કેજરીવાલ અને પંજાબના CM ભગવંત માનનો ગુજરાત પ્રવાસ, કેજરીવાલ અને ભગવંત માન ગાંધી આશ્રમમાં અડધો કલાક જેટલું રોકાયા હતાં. ત્યારબાદ અમદાવાદમાં રોડ શોનુ આયોજન કર્યુ હતુ. જેમાં રાજ્યભરમાંથી આમ આદમી પાર્ટીના કાર્યકર્તાઓ મોટી સંખ્યામાં જોડાયા હતા. અમદાવાદના નિકોલથી ઠક્કરબાપા નગર સુધી યોજાયેલ તિરંગા યાત્રામાં અરવિંદ કેજરીવાલે આમ આદમી પાર્ટીને એક મોકો આપવા અપીલ પણ કરી હતી.
1 મે
- ભરૂચમાં AAP-BTP ગઠબંધનની મહાસભા યોજી હતી. BTPના અધ્યક્ષ છોટુ વસાવા સાથે ગઠબંધનનું આધિકારિક એલાન કર્યું હતું
6 મે
- દિલ્હીના મુખ્યમંત્રી અને આમ આદમી પાર્ટીના રાષ્ટ્રીય સંયોજક અરવિંદ કેજરીવાલ પ્રથમ વખત રાજકોટ આવ્યાં હતા જ્યાં તેમણે એક જનસભાને સંબોધન કર્યું હતું. જેમાં તેમણે ગુજરાતની પ્રજાના વખાણ કર્યા હતા. જનસભાને સંબોધન કરતા કેજરીવાલે જણાવ્યું હતું કે, પહેલા મને દિલ્હી અને પંજાબની જનતા પ્રેમ કરતી હતી. હવે ગુજરાતના લોકો પણ ખૂબ જ પ્રેમ કરવા લાગ્યા છે.
ગુજરાત વિધાનસભાની ચૂંટણી પહેલા કેજરીવાલના ગુજરાત પ્રવાસ સતત વધી રહ્યા છે. છેલ્લા 60 દિવસમાં કેજરીવાલનો આ ચોથો ગુજરાત પ્રવાસ છે.આ પરથી જ કહી શકાય છે કેજરીવાલ આ વખતે ગુજરાતની ચૂંટણીને વધુ પ્રાધાન્ય આપી રહ્યા છે. બીજી તરફ જોઈએ તો ભાજપના રાષ્ટ્રીય નેતાઓ પણ ગુજરાત આવી રહ્યા છે અને ચૂંટણી થકી અલગ અલગ રીતે પ્રચારમા જોતરાઈ ગયા છે. પણ કોંગ્રેસ હજુ વેઇટ એન્ડ વોચ મોડમાં દેખાઈ રહી છે.
