- મધ્યપ્રદેશ, છત્તીસગઢ, રાજસ્થાન સહિતના રાજ્યોમાં આપનું ધોવાણ
- કેજરીવાલ, ભગવત માન સહિતના મોટા નેતાઓના રેલી, રોડ શો ફ્લોપ
- આમ આદમી પાર્ટીનો બરાબરનો સફાયો
મધ્યપ્રદેશ, છત્તીસગઢ, રાજસ્થાન અને તેલંગાણામાં મતગણતરી શરૂ છે. સત્તાના એક જંગમાં ક્યાં પક્ષે કયો ગઢ કબ્જે કર્યો તે લગભગ નક્કી છે. જેમાં મધ્યપ્રદેશ, છત્તીસગઢ અને રાજસ્થાનમાં બીજપીએ શાનદાર પ્રદર્શન કરી જીત પોતાને નામ કરી લીધી હોય તેવી સ્થિતિ છે. બીજી બાજુ તેલંગાણામાં કોંગ્રેસ પહેલીવાર સરકાર બનાવવાની દિશામાં આગળ વધતી હોવાના દ્રશ્યો છે. સાથે જ આ ચૂંટણીમાં દિલ્હી, પંજાબની સત્તાધારી પાર્ટી આમ આદમી પાર્ટીએ દિવસ રાત એક કરીને ચૂંટણીમાં ઝંપલાવ્યું છતાં ખાસ છાપ છોડી શકી નથી.
આપે 200 થી વધુ ઉમેદવાર ચૂંટણીમાં ઉતાર્યા
મધ્યપ્રદેશ, છત્તીસગઢ અને રાજસ્થાનમાં આમ આદમી પાર્ટીએ દમખમથી ચૂંટણી લડી હતી જેમાં આમ આદમી પાર્ટીના સર્વેસર્વા અને દિલ્હીના મુખ્યમંત્રી અરવિંદ કેજરીવાલ તથા ભગવત માન સહિતના મોટા નેતાઓ રેલીઓ અને રોડ શોમાં જોડાયા હતા. જોકે ચૂંટણીના પરિણામો પરથી એ સામે આવી રહ્યું છે કે આમ આદમી પાર્ટીનો બરાબરનો સફાયો થયો છે.
આપના રેલી, રોડ શો ફ્લોપ
દિલ્હી અને પંજાબમાં સરકાર બનાવ્યા બાદ કેજરીવાલ રાજસ્થાન, છત્તીસગઢ અને મધ્યપ્રદેશમાં સત્તાનો સીમાડો લંબાવવા માંગતા હતા. જોકે આ પ્રયાસ નિષફળ રહ્યો છે. નોંધનિય છે કે AAPએ મધ્યપ્રદેશની 70, રાજસ્થાનની 88 બેઠકો અને છત્તીસગઢની 57 બેઠકો પર ઉમેદવારોને ચૂંટણી જંગમાં ઉતાર્યા બાદ કેજરીવાલે મફત વીજળી, પાણી અને શિક્ષણનો દાવો પણ કર્યો હતો. જોકે રેલી, રોડ શો ફ્લોપ ગયા છે.
આપને મળ્યા આટલા વોટ
ખાસ વાત તો એ છે કે 200 થી વધુ ઉમેદવાર ચૂંટણીમાં ઉતાર્યા બાદ પણ આમ આદમી પાર્ટીને એક પણ સીટ પર જીત મળી નથી. એટલું જ નહીં મોટાભાગના ઉમેદવારોની ડિપોઝિટ ડુલ થઈ હોય તેવી સ્થિતિ છે. ચૂંટણી આયોગના સતાવારા આંકડા અનુસાર આમ આદમી પાર્ટીને છત્તીસગઢમાં 0.97 ટકા વોટ મળ્યા છે જ્યારે મધ્યપ્રદેશમાં 0.42 ટકા અને રાજસ્થાનમાં 0.37 ટકા વોટ મળી રહ્યા છે.
