નિવેદન / કોરોનાની બીજી લહેર વચ્ચે બંગાળમાં રાજકીય પાર્ટીઓને લીલાલહેર, રાહુલ ગાંધીએ PM મોદી પર કર્યો કટાક્ષ

• પીએમ મોદીએ કહ્યું હતું આટલી ભીડ પહેલીવાર જોઈ 
• રાહુલ ગાંધીએ કર્યા આટલા મૃતકો પણ પહેલીવાર જ જોયા છે 
• રાહુલ ગાંધીએ પશ્ચિમ બંગાળની બધી જ જનસભાઓ રદ્દ કરી 

દેશમાં કોરોના વાયરસ મહામારી ખૂબ જ વિકરાળ રૂપ ધારણ કરી રહી છે અને કોરોના વાયરસના દૈનિક કેસ ત્રણ લાખની નજીક પહોંચી રહ્યા છે ત્યારે રાહુલ ગાંધીએ પશ્ચિમ બંગાળમાં પીએમ મોદીની રેલી મુદ્દે કટાક્ષ કર્યો છે. 

રાહુલ ગાંધીએ કર્યો કટાક્ષ 

પશ્ચિમ બંગાળમાં એક રેલીમાં વડાપ્રધાન મોદીએ કહ્યું હતું કે મેં આજે આટલી બધી ભીડ પહેલી વાર જોઈ છે. તેના પર રવિવારે રાહુલ ગાંધીએ તેના પર કટાક્ષ કરતાં કહ્યું કે બિમારો અને મૃતકોની આવી ભીડ પણ પહેલીવાર જોઈ છે. 

શું કહ્યું હતું પીએમ મોદીએ 

આસનસોલમાં ચૂંટણી રેલીમાં પીએમ મોદીએ કહ્યું હતું કે હું લોકસભા ચૂંટણીમાં બંગાળમાં આવ્યો હતો ત્યારે પા ભાગની ભીડ પણ નહોતી આવી. આજે તો દૂર સુધી માત્ર લોકો જ દેખાઈ રહ્યા છે, શું કમાલ કરી દીધો તમે લોકોએ! 

રાહુલ ગાંધીનો મોટો નિર્ણય 

દેશભરમાં સોશ્યલ મીડિયામાં લોકો આ રેલીઓ સામે અવાજ ઉઠાવી રહ્યા છે ત્યારે કોંગ્રેસ નેતા રાહુલ ગાંધીએ પોતાની આગામી બધી જ રેલીઓને રદ્દ કરવાનો નિર્ણય કર્યો છે. રાહુલ ગાંધીએ ટ્વિટ કરીને કહ્યું કે કોરોના વાયરસની પરિસ્થિતિને જોતાં, હું બંગાળમાં આગામી બધી જ રેલીઓને રદ્દ કરું છું. બધી જ રાજકીય પાર્ટીઓના નેતાઑને પણ વર્તમાન પરિસ્થિતિને જોતાં અપીલ કરું છું કે મોટી જાહેરસભાઑ ન કરે. 

કોરોના વાયરસ કેસ અપડેટ (18 એપ્રિલ, 2021)

ભારતમાં આજે કોરોના વાયરસના નવા 2,61,500 કેસ સામે આવ્યા છે જ્યારે 1,501 લોકોને પોતાના જીવ ગુમાવ્યા છે. આ સાથે જ એક દિવસમાં 1,38,423 લોકો સાજા પણ થયા છે. ભારતમાં એક્ટિવ કેસનો આંકડો 18 લાખને પાર થઈ ગયો છે.