કોરોના સંકટ / એક સપ્તાહ સુધી રાજકોટથી અમદાવાદ જતા વાહનો પર પ્રતિબંધ, ગુડ્સ વ્હીકલ અને ઍમ્બ્યુલન્સને છૂટ

• રાજ્યમાં કોરોનાને કહેર વધ્યો
• રાજકોટ કલેક્ટરનો મોટો નિર્ણય
• રાજકોટથી અમદાવાદ જવા પર લાદ્યો પ્રતિબંધ

કલેક્ટર રેમ્યા મોહનના આદેશ મુજબ રાજકોટથી અમદાવાદ જવા પર પ્રતિબંધ મૂકવામાં આવ્યો છે. આ દરમિયાન માત્ર મેડિકલ સેવા અને સામાન લઈ જતા વાહનોને છૂટ આપવામાં આવી છે. એટલે કે એમ્બ્યુલન્સને ચાલવાની છૂટ આપવામાં આવી છે. જો કે તેમણે એ બાબતે પણ સ્પષ્ટતા કરી હતી કે કોઈ પણ પ્રકારનો રોડ બ્લોક કરવામાં આવ્યો નથી પરંતુ આ પ્રતિબંધ મૂકવામાં આવ્યો છે. જ્યારે અમદાવાદથી પરમિશન લઈને જો કોઈ રાજકોટ આવશે તો તેમની પ્રોટોકોલ પ્રમાણે તપાસ થશે અને હોમ ક્વૉરન્ટીન કરવામાં આવશે. આ સાથે સુરતથી પણ આવતા લોકોને હોમ ક્વોરન્ટીન કરવામાં આવશે તેમ જણાવ્યું હતું.

શા માટે લેવાયો નિર્ણય

નોંધનીય છે કે, રાજકોટમાં ખાસ કરીને જંગલેશ્વર વિસ્તારમાં કોરોના વાયરસના સૌથી વધુ કેસ નોંધાયા છે. આ સાથે જ કેટલાક સોશિયલ ટ્રાન્સમિશનના કેસ પણ નોંધાયા છે. આ તમામ સોશિયલ ટ્રાન્સમિશનના કેસની હિસ્ટ્રી તપાસતા દર્દી અમદાવાદથી આવ્યો હોવાનું જાણવા મળ્યું છે. ત્યારે હાલ આ સમગ્ર વિસ્તારને ક્વોરેન્ટાઇન કરવામાં આવ્યો છે અને દર્દીને સારવાર અર્થે ખસેડવામાં આવ્યો છે. આ તમામ બાબતોને જોતા રાજકોટ કલેક્ટર રેમ્યા મોહને આજરોજ આ નિર્ણય લીધો હતો. 

અમદાવાદમાં બેકાબૂ બન્યો કોરોના 

ઉલ્લેખનીય છે કે, અમદાવાદમાં કોરોના વાયરસ બેકાબૂ બન્યો છે. સમગ્ર ગુજરાતના સૌથી વધુ કેસ અમદાવાદમાં નોંધાયા છે ત્યારે ગઇકાલે અમદાવાદ મહાનગર પાલિકાએ પણ લૉકડાઉનનો સજ્જડ અમલ કરાવવા માટે 15 મે સુધી શહેરમાં માત્ર દૂધ અને દવા સિવાયની તમામ સેવાઓ બંધ રાખવાનો આદેશ આપ્યો છે.