ચિંતા / કોરોના પર કેન્દ્રએ અપનાવ્યું કડક વલણ, આ 8 રાજ્યોને લખી ચિઠ્ઠી, કહ્યું ભૂલો નહીં મહામારી ગઈ નથી..

• મહારાષ્ટ્ર, રાજસ્થાન સહિત દેશના 8 રાજ્યોમા કોરોના કહેર
• વધતા સંક્રમણથી આરોગ્ય તંત્રમાં પણ ચિંતામાં
• કેન્દ્ર સરકારે આઠ રાજ્યોને પત્ર પાઠવી સતર્ક રહેવા સૂચના આપી

ઉત્તર પ્રદેશ, મહારાષ્ટ્ર, રાજસ્થાન સહિત દેશના આઠ રાજ્યોમાં કોરોનાએ રીતસરનો કોહરમ મચાવ્યો છે. જેને લઈને આરોગ્ય તંત્ર પણ ચિંતામાં મુકાયું છે. આ મામલે શુક્રવારે કેન્દ્ર સરકારે આ આઠ રાજ્યોને પત્ર પાઠવી હંગામો મચાવતા કોરોનાને અટકાવવા સતર્ક રહેવા સૂચના આપી છે. તમિલનાડુ, કેરળ, કર્ણાટક, હરિયાણા, રાજસ્થાન અને મહારાષ્ટ્રમાં વર્તમાન પરિસ્થિતિ અત્યંત ખરાબ છે. જેને લઈને સરકાર પણ એલર્ટ મોડમાં કામ કરી રહી છે.કોરોના વાયરસના કેસને લઈને દિલ્હી સહિત ઘણા રાજ્યોમાં માસ્ક ફરજિયાત કરાયું છે. હાલમાં મોતએ ચિંતાનો વિષય છે, કારણ કે છેલ્લા 24 કલાકમાં 28 લોકો કોરોના ખપ્પરમાં હોમાયા છે. 

 ગાઈડલાઈનનું પાલન કરવું પણ આવશ્યક
કોરોના કહેરને લઈને કેન્દ્રીય સ્વાસ્થ્ય સચિવ રાજેશ ભૂષણે સબંધિત રાજ્યોને પત્ર પાઠવ્યો છે.જેમાં ચેતવણી આપતા કહ્યું છે કે કોરોના હજુ અટક્યો નથી. ઉલટાની ગંભીર સ્થિતિનું નિર્માણ થઇ રહ્યું છે. ત્યારે કોવિડ-19ની હાલની સ્થિતિ પર નજર રાખવી જરૂરી બની છે. વધુમાં જણાવ્યું કે હોસ્પિટલમાં દાખલ થનારા દર્દીઓનો આંકડો હાલ રાહતરૂપ છે. પરંતુ અમુક રાજ્યો અને તેમના જિલ્લાઓમાં કોરોનાના વધુ કેસ સામે આવી રહ્યા છે. જે ચિંતાજનક સ્થિતિ છે. વધુમાં કોરોના ગાઈડલાઈનનું પાલન કરવું પણ આવશ્યક હોવાનું જણાવ્યું હતું.

કોરોનાથી 28 મોત નોંધાયા 
આ રાજ્યોના જિલ્લાઓમાં પોઝિટિવિટી દર જાણીએ તો, યુપીમાં એક, રાજસ્થાન 6 તમિલનાડુ 11, મહારાષ્ટ્ર 8,  કેરળ 14, હરિયાણા 12 અને દિલ્હીમાં સકારાત્મકતા દર 10 ટકાથી વધુ છે. જે ચિંતા જન્માવી શકે છે. વધુમાં હવામાનમાં ફેરફારને કારણે દેશમાં ઈન્ફલ્યુએન્ઝા ફેલાઈ રહ્યો હોવાથી ઈન્ફલ્યુએન્ઝા જેવી ગંભીર બીમારી પર પણ નજર રાખવાની જરૂર બની છે. શુક્રવારે (તા.21, 4)ના રોજ છેલ્લા 24 કલાકમાં કોરોના વાયરસના 11,692 નવા કેસ સામે આવ્યા છે. એક્ટીવ કેસોની સંખ્યા 66,170 પર પહોંચી ગઈ છે. ચોંકાવનારી વાત એ છે કે કોરોનાના કેસ કરતા મૃત્યુઆંક ઝડપથી વધી રહ્યો છે. 24 કલાકમાં દેશભરમાં કોરોનાથી 28 મોત નોંધાયા હોવાનું પણ સામે આવ્યું છે.