વિવાદ / રાજકોટ સિવિલ હોસ્પિટલમાં સ્ટ્રેચરને લાગ્યો ભગવો રંગ, મચી ગયો હોબાળો, કોંગ્રેસે કહ્યું- આવતા દિવસોમાં દર્દીના પાટા પણ આ કલરના હશે

• રાજકોટ સિવિલ હોસ્પિટલમાં ભગવાકરણ
• સિવિલના સ્ટ્રેચર પર કેસરી કલર કરાયો
• સ્ટ્રેચર પર કેસરી કલર કરાતા વિવાદ

રાજકોટ સિવિલ હોસ્પિટલ સ્ટ્રેચરના કલરને લઈને વિવાદ સર્જાયો છે. રાજકોટ સિવિલના સ્ટ્રેચર પર અચાનક સફેદને બદલે ભગવો કલર કરવામાં આવતા વિવાદ સર્જાયો છે. હોસ્પિટલના 150 જેટલા સ્ટ્રેચરમાં અચાનક કેસરી કલર કરાતા મામલો ગરમાયો છે. 150 જેટલાં સ્ટ્રેચરમાં એકાએક કેસરી કલર લગાવવામાં આવતા પરિવર્તનની લહેર જોવા મળી છે. ત્યારે આ મામલો સામે આવતા રાજકારણમાં પણ ગરમાવો આવ્યો છે.

વિવાદ સર્જાતા ઈન્ચાર્જ સુપરિટેન્ડેટે કર્યો બચાવ
સિવિલ હોસ્પિટલના સ્ટ્રેચરને લઈને વિવાદ સર્જાયા બાદ સિવિલના ઈન્ચાર્જ સુપરિટેન્ડેટે બચાવ કરતા કહ્યું હતું કે, આ પ્રાઇમર કલર છે ઉપર સફેદ કલર કરવામાં આવશે. તો આ મામલે મેડિકલ ઓફિસરે બચાવ કરતા કહ્યું હતું કે, વારંવાર સ્ટ્રેચર ગુમ થઇ જતાં હોય છે, જેની અવારનવાર અમને ફરિયાદ કરી છે. જેથી અમારા સિનિયર નર્સે કલર બદલવાનો નિર્ણય કર્યો હતો. નર્સિંગ સ્ટાફ દ્વારા સ્ટ્રેચરની ઓળખ માટે કલર બદલવામાં આવ્યો છે. જોકે, કેસરી કલર યોગ્ય નથી, માટે અમે ફરી સફેદ કલર સ્ટ્રેચર પર કરવા સૂચના આપી છે.

સિવિલમાં સ્ટ્રેચર ભગવા રંગને લઈને રાજકારણ ગરમાયુ
આ મામલે કોંગ્રેસ નેતા મહેશ રાજપૂતનું પણ નિવેદન સામે આવ્યું છે. તેમણે કહ્યું કે, મધ્યમ વર્ગના લોકોને દેવાતી સાયકલ પણ ભગવા રંગની હતી. આવતા દિવસોની અંદર દર્દીઓને લગાવવાના પાટા અને દવા પણ ભગવા કલરની હશે. આ સમગ્ર મામલે વિવાદ વધતા સિવિલ તંત્રએ ફરી સ્ટ્રેચર પર સફેદ કલર કર્યો છે.