વિરોધ / બાંધકામ મુદ્દે રાજકોટનું બાલાજી મંદિર વિવાદમાં: કોન્ટ્રાક્ટર-વિરોધ કરનારા વચ્ચે સર્જાયા ઝપાઝપીના દ્રશ્યો, જાણો સમગ્ર વિગત

• બાલાજી મંદિરને લઇ વિવાદ સર્જાયો
• શાળાના મેદાનમાં મંદિરનું બાંધકામ શરૂ
• આસપાસના સ્થાનિકોએ કર્યો વિરોધ
• વકીલ દ્વારા બાંધકામ પર સ્ટે મેળવાયો

રાજકોટમાં બાલાજી મંદિરને લઇને વિવાદ સર્જાયો છે. આજે કરણસિંહજી શાળાના પટાંગણમાં મંદિર પરિસરનું બાંધકામ શરૂ કરાતા સ્થાનિકોના ટોળે ટોળા દોડી આવ્યા હતા અને ઉગ્ર વિરોધ કર્યો હતો. આ દરમિયાન રાજકોટના બાલાજી મંદિરનું નિર્માણ કરનારા કોન્ટ્રાક્ટર અને વિરોધ કરનારા વચ્ચે ઉગ્ર બોલાચાલી પણ થઈ હતી. જેની જાણ થતાં પોલીસની ટીમ તાત્કાલિક કરણસિંહજી હાઈસ્કૂલ ખાતે દોડી આવી હતી અને પોલીસે કોન્ટ્રાક્ટરને રિક્ષામાં મોકલ્યા હતા.

ગેરકાયદેસર રીતે બનાવવામાં આવી રહ્યું છે મંદિરઃ વકીલ
આજે બાલાજી મંદિરમાં ભારે બબાલના દ્રશ્યો જોવા મળ્યા હતા. સ્થાનિકોએ કોન્ટ્રાક્ટરનો ઉગ્ર વિરોધ કર્યો હતો. આ મામલે વકીલે જણાવ્યું હતું કે, કરણસિંહજી સ્કૂલના ગ્રાઉન્ડમાં ગેરકાયદેસર રીતે મંદિર બનાવવામાં આવી રહ્યું છે. તો મંદિર બનાવવા માટે ગ્રાઉન્ડમાં આવેલો ચબૂતરો પણ તોડી નાખવામાં આવ્યો છે. સાથે જ અન્નક્ષેત્ર પણ બંધ કરાવી દેવામાં આવ્યું છે. તેનો સ્થાનિકો વિરોધ કરી રહ્યા છે. 

મને વિવાદ વિશે ખબર નથીઃ રાધારમણ સ્વામી
આ મામલે રાધારમણ સ્વામીએ જણાવ્યું કે, 'બાલાજી મંદિર કોઈ એક વ્યક્તિનું નથી. બાલાજી મંદિર લક્ષ્મીનારાયણ દેવ ટેમ્પલ બોર્ડ વડતાલ નીચેની સંસ્થા છે. તેમના કોઠારી વિવેકસાગરદાસજી સ્વામી છે. તમે તેમને મળો તો જ સમગ્ર વિવાદ શું છે તે સામે આવશે. મેં એમનો કોન્ટેક્ટ કર્યો  પરંતુ તેમનો કોન્ટેક્ટ થઈ શક્યો નથી. ભૂપેન્દ્ર મંદિર અને તે મંદિરનો વહિવટ અલગ છે.'

શું છે સમગ્ર મામલો?
રાજકોટ  શહેરના કરણસિંહજી રોડ ખાતે આવેલી કરણસિંહજી શાળાનું પટાંગણ સ્વામિનારાયણ સંપ્રદાયને સોંપાયું છે. કરણસિંહજી સ્કૂલ ટ્રસ્ટ દ્વારા પટાંગણમાં નાનુ મંદિર બનાવવાની મંજૂરી આપવામાં આવી છે.  સ્વામિનારાયણ સંપ્રદાય દ્વારા અહીં મંદિર બનાવવામાં આવી રહ્યું છે.  જોકે, મોટું મંદિર બનાવવાનું શરૂ કરતા વિવાદ સર્જાયો છે.  

બાંધકામ શરૂ કરાતા વિવાદ
શાળાના ગ્રાઉન્ડમાં મંદિર પરિસરનું બાંધકામ શરૂ કરાતા વિવાદ સર્જાયો છે. બાલાજી મંદિરની પહેલા જગ્યા 20 ચોરસ મીટરની હતી. પરંતુ સ્કૂલની જગ્યામાં 13 હજાર ચોરસ મીટરનું બાંધકામ કરાતા વિવાદ થયો છે. નાનું મંદિર બનાવવાની મંજૂરી આપ્યા બાદ મોટું મંદિર બનાવવાનું શરૂ કરતા વિવાદ વધ્યો છે.  આસપાસના સ્થાનિકો મંદિરના નિર્માણકાર્યનો વિરોધ કરી રહ્યા છે. વકીલે બાંધકામ પર સ્ટે મેળવ્યો છે.  પૂર્વ મંજૂરી વગર બાંધકામ ન કરવું તેવી શરતો હોવા છતાં બાંધકામ શરૂ કરાયું છે.