નિવેદન / '..તો તો મારી જનેતાનું ધાવણ લાજે', લલિત વસોયાએ કેમ કહ્યું આવું? 'ઓપરેશન લોટસ' ફેલ

• કોંગ્રેસ પક્ષ છોડવાની અટકળો વચ્ચે લલિત વસોયાની સ્પષ્ટતા 
• કોંગ્રેસ પાર્ટીનું મારા પર ઋણ રહ્યું છે: વસોયા 
• "મારા દાદાએ કોઈનું ઋણ નહીં રાખવું એવી સલાહ આપી હતી" 

politics news: લોકસભાની ચૂંટણીને લઇ ગુજરાત કોંગ્રેસ એકશનમાં આવી છે.  ત્યારે ચૂંટણી અનુસંધાને કોંગ્રેસની મહત્વની બેઠક મળશે. રાજીવ ગાંધી ભવન ખાતે પ્રદેશ ઈલેકશન કમિટીની ગુજરાત કોંગ્રેસ પ્રભારી મુકુલ વાસનિકની આગેવાનીમાં આ ખાસ બેઠકનું આયોજન કરાયું છે.  જે બેઠકમાં કોંગ્રેસ પ્રદેશ અધ્યક્ષ, સ્ક્રીનીંગ કમિટીના સભ્યો હાજર રહેશે. કોંગ્રેસની લોકસભા ચૂંટણીને લઈ યોજાનારી આ બેઠકમાં સિનિયર નેતાઓ અને ધારાસભ્યો પણ હાજર રહેશે. ત્યારે આ બધાની વચ્ચે કોંગ્રેસના કેટલાક નેતાઓની પક્ષપલટાને લઈ થઈ રહેલી ચર્ચા મુદ્દે વિમલ ચૂડાસમાં અને લલિત વસોયાનું નિવેદન સામે આવ્યું છે. 

વિમલ ચૂડાસમા શુ કહ્યું ?
કોંગ્રેસ નેતા વિમલ ચૂડાસમાએ જણાવ્યું કે, કોંગ્રેસના ધારાસભ્યો નારાજ નથી, જેમને જવું છે એ જશે. ભાજપ દ્વારા ડરાવી ધમકાવી દબાણ કરવામાં આવે છે. ધારાસભ્યો ભાજપમાં જશે એવી ખોટી રીતે વાતો ફેલાવાય છે. તેમણે કહ્યું કે,  દબાણ બધા પર થાય છે, નબળા દિલના લોકો જતા રહે છે, કોઇ પક્ષ કાયમી સાશનમાં રહેતો નથી

વાંચવા જેવું: વધુ એક ધારાસભ્યનું રાજીનામું: લોકસભા પહેલા ગુજરાતમાં ઓપરેશન લોટસ!

હું કોંગ્રેસ છોડું તો મારી જનેતાનું ધાવણ લાજે:  લલિત વસોયા
કોંગ્રેસ પક્ષ છોડવાની અટકળો વચ્ચે લલિત વસોયાની સ્પષ્ટતા સામે આવી છે. તેમણે કહ્યું કે, હું કોંગ્રેસ છોડું તો મારી જનેતાનું ધાવણ લાજે, કોંગ્રેસ પાર્ટીનું મારા પર ઋણ રહ્યું છે. વસોયાએ ઉમેર્યું કે, મારા દાદાએ કોઈનું ઋણ નહીં રાખવું એવી સલાહ આપી હતી. પક્ષનું ઋણ અદા કરવા માટે જ મેં જિલ્લા કોંગ્રેસની જવાબદારી સ્વીકારી અને કોંગ્રેસે મને 2017, 2022ની વિધાનસભા અને 2019ની લોકસભાની ટિકિટ આપી છે. મને રાજકોટ જિલ્લા કોંગ્રેસનો પ્રમુખ બનાવ્યો તેમજ કોંગ્રેસના નબળા સમયમાં હું પક્ષની સાથે ઉભો રહીશ