BIG NEWS / ગુજરાતના રાજકારણમાં સોંપો! જાણીતા પાટીદાર અગ્રણી ભાજપમાં નહીં પણ AAPમાં જોડાય તેવી શક્યતા

• વિધાનસભા ચૂંટણી પહેલાં ફરી એકવાર કોંગ્રેસને લાગી શકે છે ઝટકો
• કોંગ્રેસનાં નેતા અને જાણીતા બિલ્ડર કલ્પેશ પટેલ છોડી શકે છે કોંગ્રેસ
• કેજરીવાલ સાથે મુલાકાત બાદ AAPમાં જોડાવાની અટકળો તેજ

વિધાનસભા ચૂંટણી પહેલાં એકવાર ફરી કોંગ્રેસને મોટો ઝટકો લાગી શકે છે. એકવાર ફરી વધુ એક કોંગ્રેસ નેતા અને જાણીતા બિલ્ડર કલ્પેશ પટેલ કોંગ્રેસ છોડીને AAPમાં જોડાઇ શકે છે.
મહત્વનું છે કે, ગઇ કાલે મહેસાણામાં આમ આદમી પાર્ટીની તિરંગા યાત્રા યોજાઇ હતી. દરમ્યાન મહેસાણા સર્કિટ હાઉસ ખાતે ગઇકાલે અરવિંદ કેજરીવાલ સાથે કલ્પેશ પટેલની મુલાકાત થઇ હતી. જ્યાર બાદ કલ્પેશ પટેલની AAPમાં જોડાવાની અટકળો તેજ થઇ ગઇ છે.

હાર્દિક પટેલ સહિત અનેક મોટા દિગ્ગજ નેતાઓએ કોંગ્રેસનો સાથ છોડી દીધો

નોંધનીય બાબત છે કે, વિધાનસભાની ચૂંટણી પહેલાં ભાજપ-કોંગ્રેસમાં આયારામ ગયારામ ચાલી રહ્યું છે. કોંગ્રેસના દિગ્ગજો કાયમની માફક આ વખતે પણ પક્ષ સાથે છેડો ફાડીને ભાજપ કે આપમાં જોડાઇ રહ્યાં છે. ગુજરાતના રાજકારણમાં ચૂંટણી પહેલાં અનેક મોટા ઉલટફેર જોવા મળી રહ્યાં છે. દિવસે ને દિવસે  કોંગ્રેસની હાલત વધારે કથળી રહી છે. કારણ કે ગુજરાતમાં કોંગ્રેસની હાલત એક સાંધે ત્યાં તેર તૂટે જેવી થઇ ગઇ છે. હાર્દિક પટેલ સહિત અનેક મોટા દિગ્ગજ નેતાઓએ કોંગ્રેસનો સાથ છોડી દીધો છે. ત્યારે કોંગ્રેસને વધુ એક ઝટકો લાગી શકે છે.

ગઇકાલે મહેસાણામાં AAPના કાર્યકરો સાથે કેજરીવાલે તિરંગા યાત્રા નીકાળી

ઉલ્લેખનીય છે કે, આગામી વિધાનસભા ચૂંટણીને લઇને તમામ પક્ષો પોતાની પાર્ટીને મજબૂત બનાવવા માટે મહેનત કરી રહ્યાં છે. જેને લઇને તમામ પાર્ટીઓએ બેઠકો, સભા અને રોડ શો શરૂ કરી દીધા છે. ત્યારે ગઇકાલે સોમવારના રોજ મહેસાણા સિવિલથી તોરણવાળી ચોક સુધી દિલ્હીના મુખ્યમંત્રી અને આમ આદમી પાર્ટીના વડા અરવિંદ કેજરીવાલનો ભવ્ય રોડ શો યોજાયો.  જેમાં કેજરીવાલની સાથે આપ પ્રદેશ પ્રમુખ ગોપાલ ઇટાલિયા, આપ નેતા ઇસુદાન ગઢવી અને રાજકોટ આપ નેતા ઇન્દ્રનિલ રાજ્યગુરૂ રોડ શોમાં જોડાયા હતા. ખૂબ મોટી સંખ્યામાં આપના કાર્યકરો અને લોકો આ યાત્રામાં જોડાયા હતા.

મહેસાણામાં રોડ શો દરમિયાન કેજરીવાલે સરકાર પર પ્રહાર કર્યા હતા

સાથે તમને જણાવી દઇએ કે, મહેસાણામાં રોડ શો દરમિયાન દિલ્હીના મુખ્યમંત્રીએ ગુજરાત સરકાર પર પ્રહાર કર્યા હતા. કેજરીવાલે કહ્યું હતું કે, ગુજરાતમાં પૂર્વ સૈનિકો ધરણા કરી રહ્યાં છે, પૂર્વ સૈનિકોએ ધણા કરવા એ દુઃખની વાત છે. આખા ગુજરાતમાં, દરેક બૂથ પર આપનું માળખું તૈયાર થઇ રહ્યું છે. તો અરવિંદ કેજરીવાલે સી.આર.પાટીલના મહાઠગ વાળા નિવેદન પર વળતો જવાબ આપ્યો હતો.