કેમ્પ / ધો. 10-12ના વિદ્યાર્થીઓ ફોર્મ ભરતા પહેલાં પોતાના નામ-અટકમાં કરાવી શકશે સુધારો, અમદાવાદમાં યોજાશે 4 કેમ્પ, ફટાફટ નોટ કરી લો આ તારીખ

• વિદ્યાર્થીઓના નામ-અટકમાં સુધારા માટે યોજાશે કેમ્પ
• નામ, અટકમાં કોઈ ભૂલ હશે તો થઈ શકશે સુધારા
• ડીઈઓ દ્વારા અમદાવાદની સ્કૂલોમાં યોજવામાં આવશે કેમ્પ

Ahmedabad News: અમદાવાદમાં આગામી 16 ઓક્ટોબરથી વિદ્યાર્થીઓના નામ, જાતિ અને અટકમાં ભૂલ હોય તો સુધારો થઈ શકશે. અમદાવાદમાં આગામી 16થી 19 ઓક્ટોબર સુધી 4 સ્થળોએ વિદ્યાર્થીઓના નામ-અટકમાં સુધારા માટે કેમ્પ યોજાશે. જ્યાં જઈને વિદ્યાર્થીઓ પોતાના નામ અને અટકમાં સુધારા કરાવી શકશે.

વિદ્યાર્થીઓને થાય છે મોટી મુશ્કેલી
ધોરણ 10 અને ધોરણ 12ની બોર્ડની પરીક્ષા માટે ફોર્મ ભરાવવાની પ્રક્રિયા ટૂંક સમયમાં જ શરૂ થવા જઈ રહી છે. બોર્ડની પરીક્ષાના ફોર્મમાં વિદ્યાર્થીઓના નામ, પિતાનું નામ, અટક, જાતિ વગેરે વિગતો લખવામાં આવે છે. તેમાં જો કોઈ ભૂલ હોય તો પરીક્ષાની હોલ ટિકિટ અને માર્કશીટ પણ તે જ ખોટા નામ કે અટક સાથે આવે છે, જેના કારણે વિદ્યાર્થીઓને મોટી મુશ્કેલી થાય છે. 
 
DEO કચેરી ખાતે આવી છે અનેક અરજી
સ્કૂલના રજિસ્ટરમાં ચડી ગયેલા નામ કે અટકમાં સુધારો કરવા માટેની ઘણી અરજીઓ DEO કચેરી ખાતે આવતા ડીઈઓ દ્વારા વિદ્યાર્થીઓના નામ કે જાતિ કે અટકમાં સુધારા  માટે કેમ્પ યોજવામાં આવશે. આ કેમ્પ 4 દિવસ માટે અમદાવાદની ચાર સ્કૂલોમાં યોજાશે. 

કઈ સ્કૂલોમાં યોજાશે કેમ્પ?
- 16 ઓક્ટોબરે નરોડાની એન.વી.પટેલ સ્કૂલમાં કેમ્પ યોજાશે
- 17 ઓક્ટોબરે સેન્ટ ઝેવિયર્સ લોયેલા સ્કૂલમાં યોજાશે કેમ્પ 
- 18 ઓક્ટોબરે સેન્ટ ઝેવિયર્સ મિરઝાપુર સ્કૂલમાં કેમ્પ થશે 
- 19 ઓક્ટોબરે મણિનગરની બેસ્ટ સ્કૂલમાં કેમ્પ યોજાશે