ટકોર / છોકરીઓ યૌન ઈચ્છાઓ કાબુમાં રાખે', કલકત્તા હાઇકોર્ટની ટિપ્પણી વિવાદમાં! મામલો પહોંચ્યો સુપ્રીમ કોર્ટ

• સગીરાના યૌન ઉત્પીડનને લઈને કલકત્તા હાઈકોર્ટની ટીપ્પણીનો મામલો
• સુપ્રીમ કોર્ટે ફરી એક વખત કરી સુનાવણી

સુપ્રીમ કોર્ટે ગુરૂવારે સગીરાના યૌન ઉત્પીડનને લઈને કલકત્તા હાઈકોર્ટની ટીપ્પણી પર ફરી એક વખત સુનાવણી કરી છે. આ દરમિયાન પશ્ચિમ બંગાળ સરકારે સુપ્રિમ કોર્ટને કહ્યું અમે આ મામલે આવેલા નિર્ણય વિરૂદ્ધ અપિલ દાખલ કરી છે. હવે આ મામલે ચીફ જસ્ટિસ (CJI)નક્કી કરશે કે આગામી સુનાવણી કઈ બેંચ કરશે. નોંધનીય છે કે કલકત્તા હાઈકોર્ટે ઓક્ટોબરમાં એક કેસની સુનાવણી દરમિયાન કહ્યું હતું કે સગીર દિકરીઓએ પોતાની યૌન ઈચ્છાઓ પર કંટ્રોલ કરવો જોઈએ અને સગીર છોકરાઓએ છોકરીઓ અને સ્ત્રીઓના ગૌરવનું સન્માન કરવું જોઈએ. 

દોષિતોને નિર્દોષ જાહેર કરવા માટે પણ આ યોગ્ય નથી

આ મામલે સુપ્રીમ કોર્ટે સ્વત:સંજ્ઞાન લીધી અને સુનાવણીની શરૂઆત કરી હતી. સુપ્રીમ કોર્ટે કહ્યું હતું કે ન્યાયાધીશોએ તેમના અંગત મંતવ્યો વ્યક્ત ન કરવા જોઈએ. આ પ્રકારનો આદેશ કિશોર અધિકારોનું ઉલ્લંઘન કરે છે. સુપ્રીમ કોર્ટે કહ્યું હતું કે દોષિતોને નિર્દોષ જાહેર કરવા માટે પણ આ યોગ્ય નથી..

સુપ્રિમ કોર્ટે ગુરવારે જસ્ટિસ અભય એસ ઓકની અધ્યક્ષતાવાળી બેંચે આ મામલે સુનાવણી કરી હતી. આ દરમિયાન પશ્ચિમ બંગાળ સરકારે  સુપ્રિમ કોર્ટને જણાવ્યું કે  અમે આ મામલે અપિલ દાખલ કરી છે. છેલ્લી સુનાવણીમાં સુપ્રીમ કોર્ટે રાજ્ય સરકારના વકીલને આ કેસમાં અપીલ દાખલ કરવા અંગેના તેમના વલણ વિશે પણ પૂછ્યું હતું.

'હવે CJI બેંચ નક્કી કરશે'
પશ્ચિમ બંગાળ સરકારે કહ્યું કે તેમણે કલકત્તા હાઈકોર્ટના નિર્ણય સામે અપીલ દાખલ કરી છે. જસ્ટિસ અભય એસ ઓકની અધ્યક્ષતાવાળી બેંચે  અત્યારે આ મામલે મુખ્ય ચીફ જસ્ટિસ ડીવાય ચંદ્રચુડ પાસે મોકલતા કહ્યું કે હવે CJI નક્કી કરશે કે કઈ બેંચ કેસની આગળ સુનાવણી કરશે.છેલ્લી સુનાવણીમાં સુપ્રીમ કોર્ટે કલકત્તા હાઈકોર્ટના નિર્ણયમાં કરવામાં આવેલી ટિપ્પણીઓ પર  પોતાની નારાજગી વ્યક્ત  કરતા કહ્યું કે આ ટિપ્પણીઓ ખુબ જ આપતિજનક અને બિનજરૂરી છે. આ કલમ 21 હેઠળના મૂળભૂત અધિકારોનું ઉલ્લંઘન છે. અદાલતે કોઈપણ કેસમાં નિર્ણય આપતી વખતે તેમનો અંગત સૂચન આપવાનું ટાળવું જોઈએ.. 

શું હતું સમગ્ર મામલો?
કલકત્તા હાઈકોર્ટે  સગીર દિકરીના યૌન ઉત્પીડન કેસના ચુકાદામાં કહ્યું હતું કે સગીર દિકરીએ તેમની જાતિય ઈચ્છાઓ પર નિયંત્રણ રાખવું જોઈએ. 2 મિનિટની મજા માટે પોતાની યૌન ઈચ્છાઓ પર કંટ્રોલ કરવો જોઈએ. સાથે જ સલાહ છોકરાઓને પણ સલાહ આપતા કહ્યું કે તેઓએ પણ છોકરીઓની ગરિમાનું સન્માન કરવું જોઈએ.  ત્યારે આ મામલે સુપ્રિમ કોર્ટે કલકત્તા હાઈકોર્ટના નિર્ણય પર નારાજગી વ્યક્ત કરી હતી. સુપ્રીમ કોર્ટે કહ્યું કે બધી જ અદાલતોએ કોઈ કેસમાં પોતાનો અંગત અભિપ્રાય આપવો જોઈએ નહીં સુપ્રીમ કોર્ટે કહ્યું કે કલકતા હાઈકોર્ટની આ ટિપ્પણી  ખુબ જ વાંધાજનક છે.