કાળો કારોબાર / કચ્છના સફેદ રણમાં કાળું કૌભાંડ : ભાજપ નેતા સહિત મોટા માથાના નામ સામે સરકાર અને તંત્રનું મોઢું સિવાઈ ગયું

• ગેરકાયદેસર દબાણ કરનારા લોકોના નામ સામે આવ્યા 
• ઉદ્યોગપતિ અને નેતાઓના સગા નિકળ્યા અગર માફિયા 
• સરકારી જમીન પર અગર બનાવીને કમાય છે લાખો રૂપિયા 

કચ્છના કાળા કોરોબારનો વધુ એક પર્દાફાશ VTV Newsએ કર્યો છે. જેમાં કચ્છના અભ્યારણ્યમાં ગેરકાયદે મીઠાના લીઝના નામો સામે આવ્યા છે. લીઝ સિવાય હજારો એકર જમીન પર ગેરકાયદે દબાણ કરવામાં આવ્યુ છે. જેમાં તેજા મેમા આહીરની ટી.એમ. સોલ્ટ કંપનીનું જમીન પર દબાણ કર્યું છે. ભાજપ નેતા બાબુ ભીમા હુંબલની કંપનીએ પણ દબાણ કર્યુ છે. સામજી કાનગડની નિલકંઠ ગ્રુપે પણ હજારો એકર જમીન દબાવી છે. વાઘુભા જાડેજાની મોટી ચીરઈમાં કાયદેસરની જમીન પર દબાણ કર્યુ છે. તો ભગવાનભાઈ ગઢવીની માણાબા વિસ્તારમાં લીઝના નામે ગેરકાયદે દબાણ કર્યુ છે. આમ રાજનેતાઓ-વગદારોનું કચ્છના રણના અભ્યારણ્યમાં ગેરકાયદે દબાણ કર્યુ છે.

નેતાઓના સગાઓ બન્યા માફિયા

સરકારની જમીનો પર ઉદ્યોગપતિ અને નેતાઓના સગાઓ અગરના માફિયા બનીને અડિંગો જમાવીને બેઠા છે અને સરકારની નજર સામે જ આ બધો કાળો કારોબાર ચાલી રહ્યો છે. કચ્છનાં મુંદ્રા, કંડલા અને અંજારમાં વન વિભાગ તથા રેવન્યુ વિભાગની જમીનો પર ગેરકાયદે અગર બનાવી દેવામાં આવ્યા છે. આ સિવાય રાપર, આદેસરના પટ્ટામાં આખે આખા ગામે ગામ ગેરકાયદેસર અગર બનાવી દેવાયા છે.

મોટા નેતાઓના તાર પણ અડતા હોવાના સમાચાર

મીઠા માફિયાઓ કચ્છમાં ખૂલેઆમ અભયારણ્ય અને સરકારી જમીનો પર અગર બનાવીને પૈસા કમાઈ રહ્યા છે ત્યારે અધિકારીઓનાં પાપે મીઠા માફિયાઓને ખુલ્લુ મેદાન આપી દેવામાં આવ્યું છે. જોકે માત્ર અધિકારીઓ જ નહીં આ કૌભાંડમાં કેટલાય મોટા નેતાઓના તાર પણ અડતા હોવાના સમાચાર છે. 

મીઠાનાં કાળા કારોબારનો પર્દાફાશ

VTV Newsએ કચ્છમાં મીઠાનાં કાળા કારોબારનો પર્દાફાશ કર્યો છે. કચ્છમાં મીઠું પકવવાનું ખૂબ મોટા પાયે બિઝનેસ ચાલે છે પરંતુ અધિકારીઓ અને નેતાઓ ભેગા થઈને હવે લાખો એકર જમીનમાં ગેરકાયદેસર મીઠું પકવીને મબલખ પૈસા ઘરભેગા કરી રહ્યા છે. VTV News દ્વારા કરવામાં આવેલ તપાસમાં જાણવા મળ્યું કે કચ્છમાં આડેસરથી મુન્દ્રા, સુરજબારીથી નવલખીમાં લાખો એકર જમીન પર અગર માફિયાઓ અડ્ડો જમાવીને બેઠા છે. સરકારની જમીનો પર તો ઠીક કચ્છનો કાળો કારોબાર તો ઘૂડખર માટે ફાળવવામાં આવેલ અભ્યારણ્યમાં પણ માફિયાઓ ખૂલેઆમ કરોડો રૂપિયાનો ધંધો કરી રહ્યા છે. 

એક વીજ કનેકશન માટે 10 થી 30 લાખ રૂપિયા સુધીનો ભાવ

VTV જ્યારે કચ્છના નાના રણ વિસ્તારમાં પહોંચ્યું તો જોવા મળ્યું કે જે અભયારણ્યમાં દાખલ થવા માટે પણ સામાન્ય નાગરિકોએ જાતજાતની પરવાનગી લેવી પડે તે અભ્યારણ્યની અંદર જ માફિયાઓનું રાજ ચાલી રહ્યું છે. આટલું જ નહીં આ માફિયાઓ પર એવા આશીર્વાદ છે કે ખોટી રીતે મીઠું પક્વતા લોકોને સરકાર જ એટલે કે PGVCL દ્વારા વીજકનેક્શન આપી દેવામાં આવ્યા છે. એક વીજ કનેકશન માટે 10 થી 30 લાખ રૂપિયા સુધીનો ભાવ બોલવામાં આવે છે અને PGVCLના ઉચ્ચ અધિકારીઓ હપ્તા પણ પહોંચાડવામાં આવે છે. આ કૌભાંડ બાદ ઘૂડખરને લઈને પણ સવાલ ઊભા થાય છે કે પ્રવાસનને વધારવા તથા આપણાં વન્ય જીવનને વધારવા માટે બનાવવામાં આવેલ અભ્યારણ્ય પર સરકારનો કોઈ કંટ્રોલ જ નથી.