રાજકારણ / સંગઠનને મજબૂત કરવા ભાજપનો એક્શન પ્લાન, એકસાથે પાંચ રાજ્યોમાં ગુજરાતના ધારાસભ્યોને ઉતારશે મેદાનમાં

• પાંચ રાજ્યોની યોજાનાર ચૂંટણીને લઇ ભાજપ એક્ટિવ
• પાંચેય રાજ્યમાં ભાજપ ગુજરાતના ધારાસભ્યોને મેદાને ઉતારશે 
• જમીન લેવલે સંગઠનને મજબૂત કરવા સોપાઈ જવાબદારી

ભારતમાં વર્ષ 2023માં અત્યાર સુધીમાં ચાર રાજ્યોમાં વિધાનસભાની ચૂંટણી યોજાઈ ચૂકી છે. હજુ પાંચ રાજ્યોમાં (મધ્યપ્રદેશ, રાજસ્થાન, છત્તીસગઢ, તેલંગાણા અને મિઝોરમ) વિધાનસભાની ચૂંટણી યોજાવાની છે. આ સાથે આગામી વર્ષે 2024માં લોકસભાની ચૂંટણી યોજાવાની છે. લોકસભાની સાથે 5 રાજ્યોની વિધાનસભાની ચૂંટણી પણ ખૂબ મહત્વની છે. આ અંગે તૈયારીઓ અને બેઠકોનો દોર ચાલી રહ્યો છે. પાંચ રાજ્યોમાં યોજાનાર વિધાનસભાની ચૂંટણીને લઇ મોટા સમાચાર સામે આવી રહ્યા છે. 

ભારતીય જનતા પાર્ટી એક્શન મોડમાં 
આ વર્ષે મધ્યપ્રદેશ, રાજસ્થાન, છત્તીસગઢ, તેલંગાણા અને મિઝોરમમાં યોજાનારી વિધાનસભાની ચૂંટણીને લઈને ભારતીય જનતા પાર્ટી એક્શન મોડમાં આવી ગઈ છે. ભારતીય જનતા પાર્ટી આ પાંચ રાજ્યોમાં જમીન લેવલે સંગઠનને મજબૂત કરવા માટે ગુજરાતના ધારાસભ્યોને મેદાનમાં ઉતારશે. દરેક ધારાસભ્યને જે તે બેઠક પર જઈ કામગીરી કરવાની જવાબદારી સોંપવામાં આવી છે.  

18 ઓગસ્ટે યોજાશે બેઠક 
ગુજરાતના ભાજપના તમામ ધારાસભ્યો મધ્યપ્રદેશ, રાજસ્થાન, છત્તીસગઢ, તેલંગાણા અને મિઝોરમ જઈને ચૂંટણીને લઈને કામગીરી કરશે. આગામી 18 ઓગસ્ટે આ મામલે બેઠક યોજાશે. આ બેઠકમાં ધારાસભ્યોએ કઈ રીતે કામગીરી કરવી તે મામલે સૂચના આપવામાં આવશે. 

આ 5 રાજ્યોમાં યોજાશે વિધાનસભાની ચૂંટણી 
વર્ષ 2023માં આ 5 રાજ્યોમાં વિધાનસભાની ચૂંટણી યોજાવા જઈ રહી છે- મિઝોરમ, મધ્યપ્રદેશ, રાજસ્થાન, છત્તીસગઢ અને તેલંગાણા. મિઝોરમમાં વિધાનસભાની કુલ 40 સીટો છે. અહીં લોકસભાની 1 સીટ અને રાજ્યસભાની 1 સીટ છે. મધ્યપ્રદેશમાં વિધાનસભાની કુલ 230 સીટો છે. અહીં લોકસભાની 29 અને રાજ્યસભાની 11 સીટો છે. 

રાજસ્થાનમાં લોકસભાની કુલ 25 સીટો
રાજસ્થાનમાં વિધાનસભાની કુલ 200 સીટો છે. અહીં લોકસભાની 25 અને રાજ્યસભાની 10 સીટો છે. છત્તીસગઢમાં કુલ 90 વિધાનસભા સીટો છે. અહીં લોકસભાની 11 અને રાજ્યસભાની 5 સીટો છે. તો તેલંગાણામાં કુલ 119 વિધાનસભા સીટો છે. અહીં લોકસભાની 17 અને રાજ્યસભાની 7 સીટો છે.