રાજનીતિ / રાજ્યસભાની ચૂંટણી પહેલા ભાજપ-કોંગ્રેસના કેન્દ્રીય નિરીક્ષકો આવશે ગુજરાત

• કેન્દ્રીય ચૂંટણીપંચના નિરીક્ષકો ગુજરાત આવશે 
• રાષ્ટ્રીય કોંગ્રેસના 3 નેતાઓ ગુજરાત આવશે 
• ભાજપે બે નિરીક્ષકોની નિમણૂંક કરી

કેન્દ્રીય ચૂંટણીપંચના નિરીક્ષકો ગુજરાતમાં ધારાસભ્યો સાથે બેઠક યોજશે. આ દરમિયાન મતદાન અને અગ્રતા મુદ્દે ધારાસભ્યોને માહિતગાર કરાશે. ચૂંટણીને લઈને કોંગ્રેસના તમામ ધારાસભ્યોને અમદાવાદ લવાયા છે. જ્યારે ભાજપના ધારાસભ્યોને ચૂંટણી સુધી ગાંધીનગરમાં રહેવા આદેશ કરાયો છે

રાજ્યસભાની ચૂંટણી માટે ભાજપે નિરીક્ષકો નિમ્યા

રાજ્યસભાની ચૂંટણીને આડે હવે બે દિવસ બાકી છે. ત્યારે રાજ્યસભાની ચૂંટણી માટે ભાજપે બે નિરીક્ષકોની નિમણૂંક કરાઇ છે. ભાજપ દ્વારા ભૂપેન્દ્ર યાદવ અને આશિષ સેલરની કેન્દ્રીય નિરીક્ષક તરીકે નિમણૂંક કરવામાં આવી છે. આ બંને નેતાઓ આજે ગુજરાત આવશે અને ધારાસભ્યો સાથેની આજની બેઠકમાં ઉપસ્થિત રહેશે. તેમજ ધારાસભ્યોને ચૂંટણી સંદર્ભે માર્ગદર્શન આપશે.

રાષ્ટ્રીય કોંગ્રેસના 3 નેતાઓ ગુજરાત આવશે 

રાજ્યસભાની ચૂંટણીને લઇ કોંગ્રેસ હાઇકમાન્ડ નજર રાખી રહ્યાં છે. આ માટે રાષ્ટ્રીય કોંગ્રેસના 3 નેતાઓ ગુજરાત આવશે. આજે 3 નેતાઓ ગુજરાત આવશે. પ્રભારી રાજીવ સાતવ આજે ગુજરાતની મુલાકાત લેશે. તેમજ તેમની સાથે બી.કે. હરિપ્રસાદ અને રજની પાટીલ ગુજરાત આવશે. તેઓ ધારાસભ્યો સાથે ચૂંટણી સંદર્ભે ચર્ચા કરશે.

આપને જણાવી દઈએ કે, રાજ્યસભાની ચૂંટણી માટે ભાજપે 3 અને કોંગ્રેસે 2 ઉમેદવાર ઉતાર્યા છે. ભાજપના 2 અને કોંગ્રેસના 1 ઉમેદવારની જીત નક્કી છે. આથી ભાજપ માટે ત્રીજી અને કોંગ્રેસ માટે બીજી બેઠક એટલે કે રાજ્યસભાની ચોથી બેઠક માટે ભાજપ અને કોંગ્રેસ વચ્ચે ખેંચતાણ રહેશે.