રાજકારણ / જૂનાગઢમાં જૂથવાદ નહીં ચાલે: JP નડ્ડાએ પાટણ બાદ હવે સૌરાષ્ટ્રની લોકસભા બેઠક માટે તૈયાર કરી રણનીતિ

• જૂનાગઢ બેઠક પર ભાજપ એક્શનમાં 
• પાર્ટીના હોદ્દેદારો સાથે રાષ્ટ્રીય અધ્યક્ષની બેઠક
• જૂથવાદ દૂર કરવા જે.પી.નડ્ડાનો આદેશ

લોકસભાની 2024ની ચૂંટણીને લઈને ભારતીય જનતા પાર્ટી દ્વારા તડામાર તૈયારીઓ કરવામાં આવી રહી છે. ગુજરાતની તમામ 26 બેઠકો જંગી માર્જિન સાથે જીતવા ભાજપે તૈયારીઓ આરંભી દીધી છે અને રણનીતિઓ બનાવવાની શરૂ કરી દીધી છે. આ તમામ બેઠકોને જીતવા વિશેષ અભિયાનના શ્રીગણેશ ભાજપના રાષ્ટ્રીય અધ્યક્ષ જે.પી નડ્ડાએ મધ્ય ગુજરાતથી કરી દીધા છે. તાજેતરમાં જ તેઓએ વડોદરા ખાતે ભાજપના હોદ્દેદારો સાથે બંધ બારણે વિશેષ બેઠક કરી હતી. 

જે.પી.નડ્ડાએ આપ્યો છે આ આદેશ
આ દરમિયાન જૂનાગઢ બેઠકને લઈને પણ ચર્ચા કરવામાં આવી હતી. જૂનાગઢ ભાજપમાં જૂથવાદ દૂર કરવા રાષ્ટ્રીય અધ્યક્ષ જે.પી નડ્ડાએ આદેશ કર્યો છે. નબળી બેઠકની સમીક્ષામાં જૂનાગઢ બેઠકનો પણ સમાવેશ થતો હોવાથી જૂનાગઢના હોદ્દેદારોને પણ વડોદરા બોલાવવામાં આવ્યા હતાં. વિધાનસભાના ચૂંટણી પરિણામ, જ્ઞાતિ આધારિત સમીકરણના આધારે બેઠકમાં ચર્ચા કરવામાં આવી હતી. મહત્વનું છે કે, બેઠકમાં જૂનાગઢ, પાટણ, સાબરકાંઠા, આણંદ અને બનાસકાંઠાનાં હોદેદ્દારો સામેલ થયા હતા.

વડોદરા ખાતે યોજી હતી બંધ બારણે બેઠક 
ગુજરાત એ ભાજપનો ગઢ હવા છતાં ભાજપનું રાષ્ટ્રીય નેતૃત્વ આગામી લોકસભાની ચૂંટણીમાં ગુજરાતને જરાય અતિવિશ્વાસમાં લેવા માંગતું નથી. જેથી તાજેતરમાં ભાજપના રાષ્ટ્રીય અધ્યક્ષ જે.પી નડ્ડા ગુજરાતના પ્રવાસે આવ્યા હતા. આ દરમિયાન તેમણે વડોદરા ખાતે હોદ્દેદારો સાથે બંધ બારણે બેઠક યોજી હતી. આ બેઠકમાં પાટણ, સાબરકાંઠા, જૂનાગઢ, આણંદ અને બનાસકાંઠાના હોદ્દેદારોને હાજર રહેવાની સૂચના આપવામાં આવી હતી. 

પાટણના હોદ્દેદારોને અપાઈ હતી સૂચના 
આ બેઠકમાં સૌથી વધારે ચર્ચા પાટણ બેઠકને લઈને કરવામાં આવી હતી. કારણે કે છેલ્લી વિધાનસભા ચૂંટણીઓમાં ભાજપે 156 બેઠકો મેળવી પરંતુ પાટણ લોકસભા બેઠકની 7 બેઠકો પૈકી 4 બેઠકો હારી છે માત્ર ત્રણ બેઠકો જીતી છે, પાટણ લોકસભા મતવિસ્તારમાં ભાજપના થયેલા રકાસને ભાજપના રાષ્ટ્રીય નેતૃત્વ દ્વારા ગંભીરતાથી લેવામાં આવ્યું છે. આગામી લોકસભાની ચૂંટણીમાં વિધાનસભાની પરિસ્થિતિનું પુનરાવર્તન ન થાય તે માટે તાકીદ પણ કરવામાં આવી.