રાહત / આનંદો! હવાઈ મુસાફરી સસ્તી થવાના એંધાણ, ATFના કિંમતમાં ફરી એકવાર થયો ઘટાડો

•  આ વર્ષે માત્ર બીજી વખત ATFની કિંમતમાં ઘટાડો કરાયો 
• એરક્રાફ્ટના સંચાલનમાં ATF પર ખર્ચનો હિસ્સો 40 ટકા રહે છે
• ATFની કિંમતમાં ઘટાડો  થતાં  હવાઈ યાત્રા પણ થઈ શકે છે સસ્તી 

આ ઘટાડો આંતરરાષ્ટ્રીય તેલના ભાવમાં ઘટાડાને કારણે થયો છે. જાહેર ક્ષેત્રની પેટ્રોલિયમ કંપનીઓની પ્રાઇસ નોટિફિકેશન અનુસાર, ATFની કિંમત 3,084.94 રૂપિયા પ્રતિ કિલોલીટર અથવા 2.2 ટકા ઘટીને 1,38,147.93 રૂપિયા પ્રતિ કિલોલીટર કરવામાં આવી છે.

આ વર્ષે માત્ર બીજી વખત ATFની કિંમતમાં ઘટાડો કરાયો

ગયા મહિને તેની કિંમત 1,41,232.87 રૂપિયા પ્રતિ કિલોલીટર (141.23 રૂપિયા પ્રતિ લિટર)ની ટોચે પહોંચી હતી. છેલ્લા પખવાડિયાના આંતરરાષ્ટ્રીય તેલના ભાવના આધારે દર મહિનાની 1લી અને 16મી તારીખે ATFના ભાવમાં સુધારો કરવામાં આવે છે. આ પહેલા 1 જુલાઈએ કિંમતમાં કોઈ ફેરફાર કરવામાં આવ્યો ન હતો.

ક્રૂડ ઓઈલના ભાવમાં આવેલી નરમાઈના કારણે આ ઘટાડો આવ્યો

માનવામાં આવી રહ્યુ છે કે, ક્રૂડ ઓઈલના ભાવમાં આવેલી નરમાઈના કારણે આ ઘટાડો આવ્યો છે. છેલ્લા એકાદ અઠવાડિયાથી ક્રૂડ 100 ડોલરની આસપાસ ટ્રેડ કરી રહ્યું છે. છેલ્લા દિવસોમાં તે 120 ડોલરની નજીક હતો. હવે ભાવ નીચે આવ્યા છે અને ક્રૂડમાં વધુ ઘટાડાની અનુમાન લગાવવામાં આવી રહી છે. તેથી ATF પણ સસ્તું થયું છે.વર્ષ 2022માં જ એર ફ્યુઅલની કિંમતોમાં સતત 10 વખત વધારો કરવામાં આવ્યો છે. આ પછી, 1 જૂને, તેની કિંમતોમાં 1.3 ટકાનો નજીવો ઘટાડો કરવામાં આવ્યો હતો. જે બાદ ફરી તેમાં જોરદાર વધારો થયો હતો. આ બીજી વખત કિંમતોમાં ઘટાડો કરવામાં આવ્યો છે.

હવાઈ યાત્રા પણ સસ્તી થઈ શકે છે 

એરક્રાફ્ટના સંચાલનમાં ATF પર ખર્ચનો હિસ્સો 40 ટકા રહે છે. આ જ કારણ છે કે હવાઈ ઈંધણના ભાવમાં વધારાની સીધી અસર મુસાફરો પર પડે છે. આ વર્ષે 16 માર્ચે કંપનીઓએ ATFમાં સૌથી મોટો વધારો કર્યો હતો. ત્યારબાદ કિંમતમાં 18.3 ટકાનો વધારો કરવામાં આવ્યો હતો. આ પછી, 1 એપ્રિલે પણ કિંમતોમાં 2 ટકાનો વધારો કરવામાં આવ્યો હતો, જ્યારે 16 એપ્રિલે તે 0.2 ટકા અને 1 મેના રોજ 3.22 ટકા વધ્યો હતો. હવે જ્યારે કિંમતો ઘટાડવામાં આવી રહી છે ત્યારે માનવામાં આવી રહ્યું છે કે હવાઈ મુસાફરી પણ સસ્તી થઈ શકે છે.