દુર્ઘટના / અમદાવાદના SG હાઇવે પર વધુ એક અકસ્માત, બીજી બાજુ ભાવનગરમાં પણ રખડતા ઢોરના કારણે 1નું મોત, એક ઇજાગ્રસ્ત

• અમદાવાદના SG હાઈવે પર વધુ એક અકસ્માત 
• પકવાન બ્રિજ પર ટ્રક અને ટ્રાવેલ્સ વચ્ચે અકસ્માત
• ટ્રકનું ટાયર ફાટતા ટ્રાવેલ્સ સાથે અકસ્માત 
• સિહોરમાં બાઇક વચ્ચે ઢોર આવી જતાં અકસ્માત 

Accident News: રાજ્યમાં અકસ્માતનો સિલસિલો યથાવત છે. આજે જ ગુજરાતમાં બે અકસ્માતના બનાવો સામે આવ્યા છે. જેમાં એક વ્યક્તિનું મોત થયું છે, જ્યારે એકને ગંભીર ઈજા થતાં હોસ્પિટલમાં દાખલ કરાયા છે. આજે અમદાવાદના એસ.જી હાઈવે પર અને ભાવનગરના શિહોરમાં અકસ્માત સર્જાયો છે.

પકવાન બ્રિજ પર ટ્રક અને ટ્રાવેલ્સ વચ્ચે અકસ્માત
પ્રાપ્ત વિગતો અનુસાર, અમદાવાદના એસ.જી હાઈવે પર આવેલા પકવાન બ્રિજ પર આઈસર ટ્રક અને ટ્રાવેલ્સ વચ્ચે અકસ્માત સર્જાયો છે. જેમાં આઈસર ટ્રકનું ટાયર ફાટતા રોડની એક તરફ લઈ જતી વખતે ટ્રાવેલ્સ બસ ધડાકાભેર અથડાઈ હતી. અકસ્માતને કારણે ડિવાઈડર પર આવેલા લાઈટનો થાંભલો ધરાશાયી થયો છે. 

ટ્રાફિક પોલીસ દોડી આવી ઘટના સ્થળે
આ અકસ્માતમાં સદનસીબે કોઈ જાનહાનિ થઈ નથી. આ અંગેની માહિતી મળતાની સાથે જ પોલીસ કાફલો ઘટના સ્થળે દોડી આવ્યો હતો. હાલ SG-2 ટ્રાફિક પોલીસે અકસ્માતની ફરિયાદ નોંધી તપાસ શરૂ કરી છે. 

સિહોર પંથકમાં રખડતા ઢોરનો આંતક 
તો ભાવનગર જિલ્લામાંથી પણ અકસ્માતનો બનાવ સામે આવ્યો છે. ભાવનગરમાં રખડતા ઢોરને કારણે ફરીવાર એક વ્યક્તિનું મોત થયું છે. ભાવનગરના સિહોરના સણોસરા-નોઘણવદર રોડ પર બાઇક વચ્ચે ઢોર આવી જતાં અકસ્માત સર્જાયો હતો. 

બાઈકસવારનું ઘટનાસ્થળે જ મૃત્યુ
આ અકસ્માતમાં એટલો ભયાનક હતો કે બાઈક સવારનું અનીશભાઈ મોતિયાભાઈનું ઘટના સ્થળે જ મૃત્યુ નિપજ્યું હતું. જ્યારે તેમના પિતરાઈ ભાઈ ગંભીર રીતે ઈજાગ્રસ્ત થયા હતા. જેઓને તાત્કાલિક નજીકની હોસ્પિટલમાં સારવાર અર્થે ખસેડાયા હતા. બાઈકસવાર અનીશભાઈનું અકાળે મૃત્યુ થતાં પરિવારમાં શોકનો માહોલ છવાયો છે.