મહત્વનો નિર્ણય / હવેથી અમદાવાદમાં પાર્કિંગ ચાર્જ લેનારાઓ પાસેથી AMC વસૂલશે ટેક્સ, કરશે મિલકતની આકારણી

• AMCની નવી પાર્કિંગ પોલિસી જાહેર 
• મિલકતધારક પાર્કિંગ ચાર્જ લેશે તો ચૂકવવો પડશે ટેક્સ
• AMC ટેક્સ વિભાગ મિલકતની કરશે આકારણી

Ahmedabad News: અમદાવાદ મ્યુનિસિપલ કોર્પોરેશન દ્વારા નવી પાર્કિંગ પોલિસી જાહેર કરવામાં આવી છે. જે મુજબ પાર્કિંગ ચાર્જ વસુલનાર સિનેમાહોલ અને મોલના માલિકોએ હવે ટેક્સ ભરવો પડશે. એટલે કે જે કોઈ પોતાની મિલકતમાં વાહનના પાર્કિંગ કરવા બદલ ચાર્જ વસુલતા હશે, તેમની પાસેથી ટેક્સ લેવામાં આવશે. કોર્પોરેશનના ટેક્સ વિભાગ દ્વારા મિલકતની આકારણી કરવામાં આવશે. આકારણી મુજબ મિલકતના માલિકોએ ટેક્સ ચૂકવવાનો રહેશે. જોકે, પાર્કિંગ ચાર્જ નહીં લેનાર મિલકત ધારકોએ કોઈ ટેક્સ ભરવો પડશે નહીં. એટલે કે ફ્રી પાર્કિંગને આકારણીથી મુક્તી આપવામાં આવશે. 

ટ્રાફિકની વધી રહી છે સમસ્યા 
આ મામલે અમદાવાદ મ્યુનિસિપલ કોર્પોરેશનના રેવેન્યુ કમિટીના ચેરમેન જૈનિક વકીલે જણાવ્યું કે, અમદાવાદમાં ટ્રાફિકની સમસ્યા વિકટ બની રહી છે. કેટલાક લોકો રોડ પર જ પાર્કિંગ કરી દેતા હોય છે, જેના કારણે ટ્રાફિકની સમસ્યા સર્જાય છે. જેથી પાર્કિંગ એરિયાની આકારણી મુદ્દે મૂંઝવણ દૂર કરવામાં આવી છે. આ મામલે કોર્પોરેશન દ્વારા એક નવી પોલિસી જાહેર તૈયાર કરવામાં આવી છે. 

પાર્સિંગ ચાર્જ લેશે તો ટેક્સ વસુલાશે
તેઓએ જણાવ્યું કે, કોમર્શીયલ મિલકતોમાં પાર્કિંગ માટે કોઈપણ પ્રકારનો ચાર્જ લેવામાં આવે છે, તો તેની આકારણી થશે. કોઇપણ મિલકતના ભોંયરામાં અથવા ખુલ્લી જગ્યામાં ફ્રી પાર્કિંગની વ્યવસ્થા હશે તો તેની આકારણી નહીં થાય. મોલ, સિનેમા અથવા કોમર્શિંયલ પ્રીમાઇસીસમાં પાર્કિંગ ચાર્જ લેવાતો હશે તો તેનો પ્રોપર્ટી ટેક્સ લાગશે.

પાર્કિંગ ચાર્જ નહીં લેનારને નહીં ભરવો પડે ટેક્સ 
આ ઉપરાંત ફ્રી પાર્કિંગવાળી મિલકતમાં ચાર્જ લેવાતો હશે તો મિલકતના માલિકને દંડ ફટકારવામાં આવશે. કોમર્શિયલ મિલકતોમાં કોઈપણ પ્રકારની દૈનિક માસિક/વાર્ષિક ફી ચાર્જ લઈને જો પાર્કિંગ કરવા દેવામાં આવે તો તેની આકરણી થશે તથા હયાત નીતિ-નિયમ મુજબ સદર તેના એરિયાઓનું કુલ ક્ષેત્રફળ ગણી તેના 35 ટકા રન વે બાદ અપાશે.