કરાર / અમદાવાદીઓમાં રિ-ડેવલપમેન્ટને લઈને ઉત્સાહ, આ વિસ્તારમાં સંપૂર્ણ સોસાયટીના થયા સોદા

• અમદાવાદીઓમાં રિ-ડેવલપમેન્ટને લઈને ઉત્સાહ
• અમદાવાદમાં રિ-ડેવલપમેન્ટમાં વધારો
• 500થી વધુ સોસાયટીઓમાં થશે રિ-ડેવલપમેન્ટ

અમદાવાદનો સતત વિકાસ થઇ રહ્યો છે. શહેરના મધ્ય વિસ્તારોમાં રિ-ડેવલપમેન્ટના સોદા પણ સતત વધી રહ્યા છે. શહેરના હાર્દ સમા વિસ્તારોમાં આવેલી જૂની સોસાયટીઓમાં દાયકાઓથી વસવાટ કરતા રહિશો પોતાનો વિસ્તાર છોડવા માંગતા નથી તેથી રિ-ડેવલપમેન્ટ માટે બિલ્ડરોનો સંપર્ક કરી રહ્યા છે. 

અમદાવાદીઓમાં રિ-ડેવલપમેન્ટને લઈને ઉત્સાહ

એક અંદાજ મુજબ, અમદાવાદમાં હાલમાં 500 જેટલી જૂની સોસાયટીઓના રિ-ડેવલપમેન્ટ અથવા તો સંપૂર્ણ વેચાણની વાટાઘાટો ચાલી રહી છે. જોકે, રિ-ડેવલપમેન્ટમાં અનેક પડકારો પણ આવી રહ્યા છે અને તેથી જ રિડેવલપમેન્ટ સોદામાં ઘણો સમય લાગે છે. 

રિ-ડેવલપમેન્ટ અથવા સંપૂર્ણ સોસાયટીના વેચાણના સોદા થયા

તાજેતરમાં જ અમદાવાદમાં નવરંગપુરા, સીજી રોડ, સેટેલાઇટ સહિતના વિસ્તારોમાં રિ-ડેવલપમેન્ટ અથવા તો સંપૂર્ણ સોસાયટીના વેચાણના સોદા થયાં છે. શહેરમાં ઉપલબ્ધ ઇન્ફ્રાસ્ટ્રક્ચરનો મહત્તમ ઉપયોગ થઇ શકે અને જૂની સોસાયટીઓમાં વસવાટ કરતા લોકોને નવા અને વધારે સારાં મકાનો મળી શકે તે હેતુથી રિડેવલપમેન્ટ માટે સરકારે ખાસ પોલિસી બનાવી છે. અમદાવાદ આજે એસપી રિંગરોડ સુધી વિસ્તરી ચૂક્યું છે અને શહેરના દૂર-દૂરના વિસ્તારોમાં સતત નવા મકાનો વેચાઇ રહ્યા છે.

ગુજરાત ઓનરશીપ ફ્લેટ એક્ટ 1973માં સુધારો કરાયો હતો

અત્રે ઉલ્લેખનીય છે કે, વર્ષ 2019માં ગુજરાત સરકારે વર્ષો જૂની ઇમારતોના રિ-ડેવલપમેન્ટ માટે પ્રક્રિયા સરળ બનાવવાની નીતિ જાહેર કરી હતી. ગુજરાત ઓનરશીપ ફ્લેટ એક્ટ 1973માં સુધારો કરવામાં આવ્યો હતો. જે સુધારા અંતર્ગત પઝેશનની તારીખથી 25 વર્ષ જૂની ઇમારતોને રી-ડેવલોપ કરાશે. જોકે રી-ડેવલપમેન્ટ સ્કીમ હેઠળ જમીન માલિકોના કુલ 75 ટકા માલિકોની સંમતિ ફરજિયાત રહેશે. તેમજ હાઉસિંગ કોલોની રી-ડેવલપમેન્ટ કરવા માટે સંબંધિત સત્તાવાળાઓ પાસેથી ઈમારત જર્જરીત અને જોખમી હોવાનું પ્રમાણપત્ર મેળવવું પડશે.