અમદાવાદ / ઈસ્કોન બ્રિજ અકસ્માત અંગે ટ્રાફિક DCP સફિન હસનનું લૂલું રટણ, કાર્યવાહીના નિવેદન બાદ ઉઠ્યા અનેક સવાલ

• ઈસ્કોન બ્રિજ પર અકસ્માત બાદ જાગી ટ્રાફિક પોલીસ
• રોડ પર ગતિથી વાહન ચાલવનારા સામે કાર્યવાહીનું DCPનું રટણ
• 'SG હાઈવે પર પૂર ઝડપે ગાડી ચલાવતા ચાલકો સામે કાર્યવાહી ચાલુ'

અમદાવાદ શહેરના ઇસ્કોન બ્રિજ પર ગત મોડી રાત્રે સર્જાયેલા અકસ્માત મામલે કાર્યવાહીનો ધમધમાટ ચાલી રહ્યો છે. તો બીજી તરફ આ અકસ્માત બાદ ટ્રાફિક પોલીસ પણ જાગી છે. રોડ પર ગતિથી વાહન ચાલવનારા સામે કાર્યવાહીનું DCPનું રટણ સામે આવ્યું છે.

DCP સફિન હસનનું નિવેદન 
ટ્રાફિક DCP સફિન હસનએ જણાવ્યું કે, SG હાઈવે પર પૂર ઝડપે ગાડી ચલાવતા ચાલકો સામે કાર્યવાહી ચાલુ છે, આ ઘટના બની છે તે દુ:ખદ છે અને આમાં ભારેમાં ભારે સજા થાય તે માટે ટ્રાફિક પોલીસ પ્રયત્નશીલ છે. વધુમાં જણાવ્યું કે, જ્યાં વધુ સ્પિડના ઈશ્યું છે તે બાબતે પણ કામગીરી કરવામાં આવશે. ટ્રાફિક ડ્રાઈવ ચાલી રહી છે તેને વધુ સઘન કરવામાં આવશે. 

સવાલ ઉઠી રહ્યાં
સફિન હસનના નિવેદન બાદ અનેક સવાલ ઉઠી રહ્યાં છે કે, ગઈકાલે અકસ્માત થયો ત્યારે ટ્રાફિક પોલીસ ક્યાં હતી? અને 2 અકસ્માત થયા છતા હજુ સુધી કેમ કંઈ મોટી કાર્યવાહી નહી?. 9 નિર્દોષના મૃત્યુ છતા પોલીસ માત્ર દાવા કરી રહી છે. 

શું હતી સમગ્ર ઘટના ? 
ગઈકાલે રાત્રે શહેરના ઇસ્કોન બ્રિજ પર ડમ્પરની પાછળ મહેન્દ્રા થાર ઘૂસી જતા અકસ્માત સર્જાયો હતો. અકસ્માતને જોવા માટે મોટી સંખ્યામાં લોકો એકઠા થયા હતા. અકસ્માત બાદ પોલીસ તપાસ કરવા માટે બ્રિજ પર પહોંચી હતી. આ દરમિયાન કર્ણાવતી ક્લબ પાસે પૂર ઝડપે આવતી લક્ઝ્યૂરિયસ કારે અકસ્માત જોવા ઉભેલા લોકોને અડફેટે લીધા હતા. 160થી વધુની સ્પીડમાં આવેલા કાર ચાલકે ટોળા પર કાર ચડાવી દીધી હતી. 
આ ભયાનક અકસ્માતમાં પોલીસ કોન્સ્ટેબલ સહિત 10 લોકોના મૃત્યુ નિપજ્યાં છે. જ્યારે આ અકસ્માતમાં 10થી વધુ લોકોને ઈજાઓ પહોંચી છે. ઈજાગ્રસ્તોને સારવાર અર્થે સોલા સિવિલ લઈ જવામાં આવ્યા છે. તથ્ય પટેલ નામના કાર ચાલકે અકસ્માત સર્જ્યો હોવાનું સામે આવ્યું છે. અકસ્માત સર્જનાર જગુઆર ચાલક પણ ઘાયલ થતા સિમ્સ હોસ્પિટલમાં ખસેડવામાં આવ્યો હતો.