- જૂનાગઢ જિલ્લામાં ભારે વરસાદ
- ભારે વરસાદના કારણે ખેતરોમાં પાણી ફરી વળ્યા
- લોકોની દુકાનો અને ઘરોમાં ભરાયા પાણી
- અનેક ગામો બન્યા સંપર્ક વિહોણા
રાજ્યમાં બરાબરનો વરસાદી માહોલ જામ્યો છે. ગઈકાલે ગીર સોમનાથમાં તોફાની બેટિંગ કર્યા બાદ આજે મેઘરાજા જૂનાગઢમાં ધડબડાટી બોલાવી રહ્યા છે. જૂનાગઢ જિલ્લામાં ભારે વરસાદ વરસી રહ્યો છે. આજે જૂનાગઢના માંગરોળમાં 11 ઈંચથી વધુ વરસાદ નોંધાયો છે. ભારે વરસાદના કારણે માંગરોળમાં જળબંબાકારની સ્થિતિ સર્જાઈ છે. ભારે વરસાદના કારણે નીચાણવાળા વિસ્તારોમાં વરસાદી પાણી ભરાયા છે. જ્યાં જોવો ત્યાં પાણી-પાણી જ જોવા મળી રહ્યું છે. મુશળધાર વરસાદના કારણે ખેતરો પણ બેટમાં ફેરવાઈ ગયા છે. અવિરત વરસાદથી લોકોને મુશ્કેલીમાં મુકાઈ ગયા છે. ધોધમાર વરસાદ પડતાં અનેક ગામનો સંપર્ક કપાયો છે.
માંગરોળથી કેશોદ હાઈવે પર ટ્રાફિક જામ
આજ સવારથી જ જૂનાગઢમાં ભારે વરસાદ વરસી રહ્યો છે. જૂનાગઢના માંગરોળમાં ધોધમાર વરસાદ પડતા માંગરોળથી કેશોદ હાઈવે પર ટ્રાફિક જામ થઈ ગયો છે. માંગરોળ-કેશોદ બાયપાસ પર ભરાયા કમરસમા પાણી ભરાયા છે. જેના કારણે મોટી સંખ્યામાં વાહન ચાલકો અટવાઈ ગયા છે. ભારે વરસાદને કારણે હાઈવે પર પાણી ભરાતા ટ્રાફિક જામની સ્થિતિ સર્જાઈ છે. ભારે વરસાદથી વાહન ચાલકોને હાલાકી વેઠવાનો વારો આવ્યો છે. જૂનાગઢ જિલ્લાનો માંગરોળ-ચોરવાડ હાઈવે બંધ કરાયો છે. અરેણા ગામે વરસાદી પાણી રોડ પર ફરી વળતાં હાઈવે બંધ કરાયો છે.
સોસાયટીમાં પાણી ભરાયા
માંગરોળની ગાયત્રીનગર સોસાયટીમાં લોકોના ઘરોમાં પાણી ભરાયા છે. જેથી તંત્ર દ્વારા કોઈ કામગીરી નહીં થઇ હોવાના લોકો આક્ષેપો કરી રહ્યા છે. વહેલી સવારથી પાણીના નિકાલ માટે લોકો મહેનત કરી રહ્યા છે.
બામણવાળા ગામ બેટમાં ફેરવાયું
માંગરોળમાં ભારે વરસાદના કારણે કારેજ ગામમાં પાણી ભરાયા છે. કારેજ ગામના ખેતરોમાં પણ પાણી ફરી વળ્યા છે. જ્યારે માંગરોળ તાલુકાનું બામણવાળા ગામ બેટમાં ફેરવાયું છે. ભારે વરસાદથી ઘરો અને ખેતરોમાં પાણી ભરાયાં છે. વરસાદનાં લીધે વીજ સમસ્યાથી લોકો પરેશાન બન્યા છે. અનેક ગામમાં લાઈટો જતી રહી છે.
જામવાડી ગામમાં વીજ પુરવઠો ખોરવાયો
જૂનાગઢના માળિયા તાલુકામાં ધોધમાર વરસાદ વરસી રહ્યો છે. વરસાદને પગલે માધવનગર, જલારામ મિલ સહિતના વિસ્તારોમાં પાણી ભરાયા છે. નીંચાણવાળા વિસ્તારોમાં આવેલી કેટલીક દુકાનોમાં પાણી ઘૂસ્યાં છે. ભારે વરસાદને કારણે જામવાડી ગામ બેટમાં ફેરવાયું છે. ધોધમાર વરસાદ પડતાં જામવાડી ગામનો સંપર્ક કપાયો છે. જામવાડી ગામમાં પાણી ભરાતા લોકોને મુશ્કેલીમાં મુકાયા છે. વરસાદને કારણે જામવાડી ગામમાં વીજ પુરવઠો પણ ખોરવાયો છે.
