ઇલેક્શન-2022 / 2 એપ્રિલે અમદાવાદમાં AAPનું શક્તિપ્રદર્શન, જાણો કયા નેતાઓ રહેશે ઉપસ્થિતિ

• અરવિંદ કેજરીવાલ અને ભગવંત માન આવશે ગુજરાત 
• અમદાવાદમાં AAP કરશે શક્તિ પ્રદર્શન
• નિકોલમાં ખોડિયાર મંદિરથી યોજાશે રોડ શો

પંજાબ વિધાનસભાની ચૂંટણીમાં આમ આદમી પાર્ટીએ પોતાનો પરચમ બતાવ્યા બાદ હવે ગુજરાત પર નજર મંડરાઇ રહી છે. ગુજરાતમાં વિધાનસભાની ચૂંટણી આવનાર છે જેને લઇને આમ આદમી પાર્ટી પણ એક્ટિવ મોડમાં જોવા મળી રહી છે. ગુજરાતની રાજનીતિમાં ભાજપ અને આમ આદમી પાર્ટી વચ્ચે ટ્વિટર વૉર તો ચાલી જ રહ્યુ છે પરંતુ હવે ચૂંટણી ટાણે જનતાનું દિલ જીતવાનો આપ દ્વારા કોઇ મોકો છોડવામાં આવશે નહી તેમ લાગી રહ્યું છે.  ત્યારે આપના નેતા અને દિલ્હીના મુખ્યમંત્રી અરવિંદ કેજરીવાલ તથા પંજાબના મુખ્યમંત્રી  ભગવંત માન પણ પીએમ મોદીના પગલે ચાલી રહ્યા હોય તેમ લાગી રહ્યુ છે. જેમ પીએમ મોદીએ રોડ શૉ યોજ્યો હતો તેવી જ રીતે કેજરીવાલ અને ભગવંત માન પણ ગુજરાતમાં આવીને શક્તિપ્રદર્શન કરશે.

2એપ્રિલે કેજરીવાલ-ભગવંતમાન ગુજરાતમાં

 હવે પંજાબ બાદ AAPની નજર દેશમાં આવનારી વિધાનસભા ચૂંટણી પર રહેશે. જેમાં ગુજરાત વિધાનસભા ચૂંટણીનો પણ સમાવેશ થાય છે. ત્યારે આવનારી ગુજરાત વિધાનસભા ચૂંટણી પહેલા ગુજરાતમાં આમ આદમી પાર્ટી પોતાને મજબૂત કરવા કવાયત હાથ ધરી છે. આગામી 2 એપ્રિલના રોજ કેજરીવાલ અને ભગવંત માન અમદાવાદ આવશે.  અમદાવાદમાં AAP દ્વારા શક્તિ પ્રદર્શન યોજવામાં આવશે. 

અમદાવાદમાં  AAPનો રોડ શૉ

અમદાવાદમાં આમ આદમી પાર્ટીનો રોડ શૉ યોજાશે. જેની શરુઆત નિકોલના ખોડીયાર મંદિરથી થશે.. જે બાદમાં બાપુનગર એપ્રોચર થઈને સરદાર મોલ સુધી જશે.. આ રોડ શો બપોરે 2 વાગે યોજાશે.. અને રોડ શો માટે AAPએ તમામ તૈયારીઓ પણ શરૂ કરી દીધી છે.  મહત્વનું છે કે ઉત્તર પ્રદેશ સહિત ચાર રાજ્યોની વિધાનસભાની ચૂંટણીમાં ભાજપનો ભગવો લહેરાતા પીએમ મોદીએ પણ ગુજરાતની મુલાકાત લીધી હતી. અમદાવાદમાં રોડ શૉ યોજ્યો હતો. જેને જનતાનો ભારે પ્રતિસાદ મળ્યો હતો. ત્યારે આગામી દિવસોમાં અમદાવાદના લોકો આમ આદમી પાર્ટીના રોડશોમાં કેવો પ્રતિસાદ આપશે તે જોવુ રહ્યું.