આપઘાત / સુરતમાં હનીટ્રેપનો શૉકિંગ કેસ: આપઘાત કરનાર યુવકનો મોબાઈલ તપાસ્યો તો પરિવારના ઊડી ગયા હોશ, પોલીસ તપાસ શરૂ

• કતારગામમાં ધો.12ના વિદ્યાર્થીનો આપઘાત
• હનીટ્રેપના કારણે કંટાળી વિદ્યાર્થીનો આપઘાત
• આરોપીએ વિદ્યાર્થી પાસેથી પડાવ્યા 9 હજાર 600 રૂપિયા

સુરતના કતારગામના ધોરણ 12ના વિદ્યાર્થીનો વીડિયો ઉતારી સોશિયલ મીડિયા પર વાયરલ કરવાની ટોળકીએ ધમકી આપતા વિદ્યાર્થીએ એપાર્ટમેન્ટના ધાબા ઉપરથી પડતું મૂકી આપઘાત કરી લીધો છે. આ ઘટનામાં ચોકબજાર પોલીસે આપઘાતની દુષ્પ્રેરણાનો ગુનો નોંધ્યો છે.

17 વર્ષીય વિદ્યાર્થીએ લગાવી મોતની છલાંગ
મળતી માહિતી અનુસાર, સુરત શહેરના કતારગામના ઘનમોરા પાસે રહેતા 17 વર્ષીય વિદ્યાર્થી ધો-12 કોમર્સમાં અભ્યાસ કરતો હતો. પહેલી માર્ચે તેણે એપાર્ટમેન્ટના ધાબા પરથી છલાંગ મારી દીધી હતી. જે બાદ માતા-પિતા 108 એમ્બ્યુલન્સમાં સારવાર માટે લઈ ગયા હતા. તેને માથામાં ગંભીર ઈજાઓ થઈ હોવાથી હોસ્પિટલમાં સર્જરી કરવામાં આવી હતી. સર્જરી કર્યા બાદ વિદ્યાર્થીનું 3 માર્ચએ મોડીરાતે મોત થયું હતું. જે તે સમયે ચોક બજાર પોલીસે અકસ્માત મોત નોંધ કરી તપાસ હાથ ધરી હતી. 

આરોપીએ વિદ્યાર્થીનો બનાવ્યો હતો અશ્લીલ વીડિયો
વિદ્યાર્થીની અંતિમવિધિ પૂર્ણ કર્યા બાદ પરિવારે જ્યારે તેનો મોબાઈલ તપાસ્યો હતો. આ દરમિયાન ફોનમાંથી જે મળી આવ્યું તે જોઈને મૃતક વિદ્યાર્થીના માતા-પિતા ધ્રુજી ઉઠ્યા હતા. તેઓ સીધા ચોકબજાર પોલીસ સ્ટેશન ખાતે પહોંચ્યા હતા. પોલીસે વિદ્યાર્થીનો ફોન તપાસતા સામે આવ્યું હતું કે, આરોપીઓ દ્વારા વિદ્યાર્થીને વીડિયો કોલ કરી અશ્લીલ હરકતો કરવા મજબૂર કરાયો હતો. સ્ક્રીન રેકોર્ડિંગ કરી વિદ્યાર્થીનો અશ્લીલ વીડિયો ઉતારી લેવાયો હતો. વીડિયો વાયરલ કરવાની ધમકી આપી બ્લેકમેલ કરાયો હતો. આરોપીઓએ ટુકડે ટુકડે વિદ્યાર્થી પાસેથી 9,600 પડાવી લીધા હતા. ફોન પે એકાઉન્ટન્ટમાં પણ ટ્રાન્જેક્શનની વિગતો મળી આવી હતી. સાથે જ વિદ્યાર્થીને અલગ-અલગ 4 ફોન નંબરો પરથી સતત કોલ આવ્યા હતા. 

મોબાઈલ ચેક કરતા સમગ્ર હકીકત આવી સામે
આ ટોળકીએ વધુ રૂપિયાની માંગણી કરતા કંટાળીને વિદ્યાર્થીએ મોતને વ્હાલું કરી લીધું હોવાનું તપાસમાં સામે આવ્યું હતું. હાલ ચોક બજાર પોલીસે હનીટ્રેપ ગેંગ વિરુદ્ધ આત્મહત્યાની દુષ્પ્રેરણાનો ગુનો નોંધી તપાસ હાથ ધરી છે.