- ગાઝિયાબાદમાં એક ચોંકાવનારી ઘટના
- બાળકને હડકવાની અસર થયા બાદ બાળકનું મોત
- શ્વાન કરડ્યા બાદ તાત્કાલિક રસી લેવી જોઈએ
તાજેતરમાં ગાઝિયાબાદમાં એક ચોંકાવનારી ઘટના સામે આવી છે..જેમાં બાળકને હડકવાની અસર થયા બાદ બાળકનું કમકમાટીભર્યું મોત નીપજ્યું હોવાનું સામે આવ્યુ છે. આ કિસ્સાને પગલે બાળકના પરિજનોમાં કાળો કલ્પાંત ફેલાયો છે. રિપોર્ટ અનુસાર બાળકને થોડા દિવસ પહેલા હડકવાની અસર ભોગવતો શ્વાન કરડ્યો હતો. જોકે આ કિસ્સાને છુપાવી રાખી કોઈને જાણ કરવામાં આવી ન હતી. જેને લઈને બાળકને હડકવા વિરોધી રસી પણ અપાઈ ન હતી. જેને લઈને થોડા દિવસોમાં બાળકને હડકવાનો ચેપ લાગી ગયો હતો.
હડકવા 4500 વર્ષ જૂનો રોગ માનવામાં આવે છે
જે ચેપ જીવલેણ નિવડતા બાળકે આખરી શ્વાસ ખેંચ્યા હતા. આ કરુણ ઘટનાને લઈ અરેરાટી મચી ગઇ છે. નોંધનિય છે કે વર્લ્ડ હેલ્થ ઓર્ગેનાઈઝેશન મુજબ, હડકવા 4500 વર્ષ જૂનો રોગ માનવામાં આવે છે. અત્યાર સુધીમાં મેડિકલ જગતની અનેક મથામણ છતાં આ રોગ નાબૂત કરવામાં સફળતા મળી નથી. આજ સુધી તેનો કોઈ ઈલાજ નથી. આથી હડકવાની અસર થાય તે પહેલા ચકાસણી કરવી જોઈએ. કારણ કે હડકવાનો ચેપ મગજ સુધી પહોંચે તો દર્દીનું મૃત્યુ થાય છે.
24 કલાકની અંદર રસી લેવાનું રાખવું જોઈએ
એક અંદાજ અનુસાર હડકવાના 95 ટકા કેસ કૂતરાના કરડવાથી થાય છે. ઘણા કિસ્સાઓમાં, લોકો કૂતરા કરડવા પછી ઘરેલું ઉપચારનો આશરો લે છે. પરંતુ આ રોગના વાયરસને કોઈપણ પ્રકારના ઘરગથ્થુ ઉપચારથી ખતમ કરી શકાતા નથી. જેથી વિલંબ કર્યા વગર 24 કલાકની અંદર રસી લેવાનું રાખવું જોઈએ. કૂતરો કરડ્યા પછી પહેલા ઘા ધોઈ લેવો જોઈએ. આ સમયગાળા દરમિયાન, કોઈપણ ઘરેલું ઉપચારનો આશરો ન લેવો. તાત્કાલિક ડૉક્ટરની સલાહ લેવી જોઈએ. બાદમાં હડકવા વિરોધી રસી લેવી જરૂરી છે. આનું કારણ એ છે કે હડકવાના વાયરસ કૂતરાની લાળમાં હોય છે. જો આ લાળ વ્યક્તિની ત્વચામાંથી લોહીમાં ભળે તો બાદમા ચેપ લગાડે છે.
