અમદાવાદ / પોલીસને બાથરૂમમાં લોહીના ડાઘ દેખાયા અને થયો મોટો ખુલાસો: 9માં માળેથી તાજા જન્મેલા બાળકને નીચે ફેંકનાર યુવતીએ જુઓ શું કહ્યું

• અમદાવાદના ચાંદખેડામાં નવજાત બાળકની હત્યા કેસ
• 9માં માળની છત ઉપરથી તાજા જનમેલા બાળકને ફેંકી દેવાયો
• આરોપી મહિલાની સારવાર બાદ ધરપકડ કરાશે

અમદાવાદના ચાંદખેડામાં નવજાત બાળકની હત્યા મામલે આરોપી મહિલાની સારવાર બાદ ધરપકડ કરાશે. તો સાથે જ વિદેશમાં રહેતા તેના પ્રેમીની પણ વીડિયો કોલથી પ્રાથમિક પૂછપરછ કરી પોલીસ ઘટનાના મૂળ સુધી પહોંચવા પ્રયાસ કરશે. તો આરોપી યુવતીને ગર્ભ હતો તેની જાણ તેના પરિવાર કે અન્ય કોને કોને હતી તે બાબતે પણ વિગતવાર પૂછપરછ હાથ ધરાશે..

નવજાત બાળકની હત્યાનો બનાવ
બે દિવસ પહેલા અમદાવાદના ચાંદખેડા વિસ્તારમાં આવેલ સ્કાય વોક એપાર્ટમેન્ટમાં નવજાત બાળકની હત્યાનો બનાવ સામે આવ્યો હતો. આ સોસાયટીના સિકયુરિટી ગાર્ડ દ્વારા પોલીસને મેસેજ અપાયો હતો કે એક નવજાત બાળકને બિલ્ડીંગ પરથી નીચે ફેંકી દેવાયુ છે. મેસેજ મળતા પોલીસ ઘટના સ્થળે પહોંચી તપાસ શરૂ કરી અને જાણવા મળ્યું કે કોઈ અજાણ્યા વ્યક્તિએ 9માં કે 10માં માળની છત ઉપરથી તાજું જનમેલું બાળકને ફેંકી દઈ હત્યા કરી છે. પોલીસને તપાસમાં સામે આવ્યું કે, 9માં માળેથી બાથરૂમ માંથી કોઈએ જન્મેલા બાળકને નીચે ફેંકી દીધું છે જેના આધારે તપાસ કરતા એક ફ્લેટનાં બાથરૂમમાં લોહીના ડાઘ મળી આવતા તપાસ કરતા હકીકત સામે આવી હતી કે ત્યાં રહેતી યુવતીએ બાળકને બાથરૂમમાં જન્મ આપ્યો હતો અને બાદમાં તેને બાથરૂમ માંથી જ નીચે ફેંકી દીધું હતું. જોકે એફએસએલ દ્વારા તપાસ કરવામાં આવી રહી છે કે બાળક મૃત જન્મ્યું હતું કે જીવીત. આ ઉપરાંત મહિલાની પણ તપાસ માટે એફએસએલ રીપોર્ટની રાહ જોવાઈ રહી છે. બીજી તરફ મહિલા હાલ સારવારમાં હોવાથી તેની તબિયત સ્થ્વસ્થ થયા બાદ પોલીસ મહિલાની ધરપકડ કરશે. 

પરિવારથી સમગ્ર હકીકત છૂપાવી હતી
મહત્વનું છે કે પોલીસની પ્રાથમિક તપાસમાં સામે આવ્યું છે કે મહિલાના પ્રેમી દ્વારા ગર્ભ રાખવામાં આવ્યું છે. પણ યુવતીએ તેના પરિવારથી સમગ્ર હકીકત છૂપાવી હતી. યુવતી અન્ય દેશમાં ટુર્સ એન્ડ ટ્રાવેલ્સ કંપનીમાં નોકરી કરતી હતી અને થોડા સમય પહેલા જ અમદાવાદ આવી હતી. યુવતીનો પ્રેમી પણ હાલમાં અન્ય દેશમાં ટુર્સ એન્ડ ટ્રાવેલ્સ કંપનીમાં નોકરી કરે છે અને અવાર નવાર અમદાવાદ આવતો હોય છે. જેથી હવે ગર્ભ બાબતે કેટલા લોકો જાણતા હતા જેવી માહિતીઓ મેળવીને  પોલીસ દ્વારા તપાસમાં શરૂ કરાઇ છે

પ્રેમીની પણ પૂછપરછ કરવામાં આવશે
પોલીસ હાલ મહિલાના સ્વસ્થ થવાની અને એફએસએલ રીપોર્ટની રાહ જોઈ રહી છે. મહિલાની ધરપકડ બાદ તેના પ્રેમીની પણ પૂછપરછ કરવામાં આવશે. હાલ તેનો પ્રેમી ભારતમાં છે કે કેમ, તેને કોઈ વાતની જાણ છે કે કેમ તેવા અનેક સવાલોના જવાબો પોલીસ મેળવશે. આ ઉપરાંત પ્રેમીને ખ્યાલ હોવા છતાં પણ તેને યુવતીને ડિલિવરી કરવા કે લગ્ન કરવા મનાઈ કરી હોય તો પોલીસ યુવતીના પ્રેમી પર પણ કાર્યવાહી કરશે.