- મહેસાણાના કડીની નર્મદા કેનાલમાં 3 કિશોરી ડૂબી
- વરખાડિયા ગામ પાસે નર્મદા કેનાલમાં ડૂબી ત્રણ કિશોરીઓ
- સ્થાનિક તરવૈયાઓએ એક કિશોરીને જીવિત પાણીમાંથી બચાવી લીધી
મહેસાણાના કડી પંથકમાં ચકચારી ઘટના સામે આવી છે. જેમાં મામાના ઘરે વેકેશન કરવા આવેલ 3 કિશોરીઓ વરખડીયા ગામે નર્મદાની કેનલમાં કપડા ધોવવા ગઈ હતી. આ દરમિયાન પગ લપસતા ત્રણેય અકસ્માતે કેનાલમાં ખાબકી હતી. જે મામલે જાણ થતા સ્થાનિક પોલીસ કાફલો અને લોકો તથા રેસ્ક્યુ ટીમ દોડી આવી હતી. જ્યા બચાવ કાર્ય હાથ ધરી એક સગીરાને બચાવી લીધી હતી. જ્યારે બે સગીરાની શોધખોળ ચાલુ હોવાનું જાણવા મળી રહ્યું છે.
ફાયર વિભાગની ટીમ અને સ્થાનિકોએ હાથ ધરી શોધખોળ
કડીના વરખડીયા ગામે બે વિરમગામ તાલુકાની અને એક માંડલ તાલુકાની કિશોરી ડૂબી ગયાનો ચકચારી કિસ્સો સામે આવ્યો છે. વિરમગામના નીલકી ગામની પૂજા નાનુભાઈ ભરવાડ (ઉં.વ.18) પોતાના માસા માતમ ભાઈના ઘરે તથા પિંકી સેનાભાઈ ભરવાડ (ઉં.વ.14) મામા મનુભાઈ ભરવાડના ઘરે અને ભરવાડ કિસાબેન કનુભાઈ પોતાના મામા ભરવાડ કિરણભાઈના ઘરે વેકેશન કરવા આવી હતી. આ દરમિયાન આજે બપોરે નર્મદા કેનાલમાં કપડાં ધોવા ગઈ હતી. જ્યા ત્રણેયના પગ લપશી જતા ત્રણેય પાણીમાં પડી ગઈ હતી. આ વેળાએ તરતા આવડતું હોવાથી કિસા ભરવાડ તાત્કાલિક બહાર આવી ગઈ હતી. જેને અવાજ કરતા આજુબાજુના લોકો દોડી ગયા હતા.
બે કિશોરીઓ નર્મદાના પાણીમાં થઇ ગરકાવ
બાદમાં હકીકત જાણી સ્થાનિક પોલીસને જાણ કરતા બાવલુ પોલીસ અને ફાયર ફાઈટરના તરવૈયાઓ વરખડિયા નર્મદા કેનાલ ખાતે આવી પહોંચ્યા હતા. જ્યા તરવૈયાઓ સહિતનાઓએ કિશોરીઓની શોધખોળ હાથ ધરી હતી. જો કે બે દીકરીઓની હજુ કોઈ ભાળ ન મળતા પરિવારજનોના જીવ ઉચ્ચક થયા છે.
