ઉત્તરપ્રદેશ / માતા-પિતા માટે ચેતવણીરૂપ કેસ: ફોનમાં Reels જોઈને સુસાઇડ પ્રેન્ક કરવા ગયો પાંચમા ધોરણનો છોકરો, થઈ ગયું મૃત્યુ

• 11 વર્ષનો બાળક રીલ્સ અને યૂટ્યૂબ શોર્ટસ જોતો હતો
• બાળકે યૂટ્યૂબ પર સ્યુસાઈડ પ્રેન્ક જોયો
• પ્રેન્કની નકલ કરવા જતા થયુ મોત

ઉત્તરપ્રદેશના હમીરપુર જિલ્લામાંથી એક કેસ સામે આવ્યો છે. 11 વર્ષનો બાળક સોશિયલ મીડિયા પર રીલ્સ અને યૂટ્યૂબ શોર્ટસ જોતો હતો. બાળકે યૂટ્યૂબ પર સ્યુસાઈડ પ્રેન્ક જોયો અને તેની નકલ કરવાની કોશિશ કરી. આ પ્રેન્ક 11 વર્ષના બાળક પર ઉલ્ટો પડી ગયો અને બાળકનું મૃત્યુ થઈ ગયું. પોલીસ આ સમગ્ર મામલે તપાસ કરી રહી છે. 

પાંચમાં ધોરણમાં ભણતા વિદ્યાર્થીનું નામ નિખિલ સાહૂ છે, જે સુમેરપુર પોલીસ સ્ટેશન વિસ્તારમાં રહેતો હતો. આ બાળકે 21 ડિસેમ્બરે પ્રેન્ક જોઈને રૂમની છત પર લાગેલ હુક સાથે ટુવાલ બાંધ્યો અને તે ફંદો ગળામાં પહેરી લીધો. બાળક કંઈપણ સમજે તે પહેલા ટુવાલ બાળકના ગળામાં ફસાઈ ગયો અને તેનું મોત થઈ ગયું. 

નિખિલના પિતા અવધેશ સાહૂએ જણાવ્યું કે, તેના દીકરાએ સોશિયલ મીડિયા પર જોઈને આ બધુ કર્યું છે. ત્યાર પછી પોલીસે પરિવારના ફોનની તપાસ કરી. વોચ હિસ્ટ્રીમાં સ્યુસાઈડ પ્રેન્કનો વિડીયો મળ્યો. મીડિયા રિપોર્ટ અનુસાર નિખિલ 21 ડિસેમ્બરે સ્કૂલેથી ઘરે આવીને રીલ્સ જોતો હતો. નિખિલના પિતાએ જણાવ્યું કે, ‘નિખિલે રીલ્સ જોયા પછી સ્યુસાઈડ પ્રેન્ક કરવાની કોશિશ કરી. ફંદો તેના ગળામાં ફસાઈ ગયો અમે તેને હોસ્પિટલ લઈને ગયા. ડોકટરે નિખિલને મૃત જાહેર કરી દીધો. નિખિલ તેના બે ભાઈઓ અને એક બહેનમાં સૌથી મોટો હતો.’

હમીરપુરના SP દીક્ષા શર્માએ જાણકારી આપી છે કે, ‘આ સમગ્ર મામલે તપાસ કરવામાં આવી રહી છે. નિખિલ જે શાળામાં ભણતો હતો, તે શાળાને મેનેજરે કહ્યું કે, નિખિલ એક પ્રતિભાશાળી વિદ્યાર્થી હતો. ઘરના એક ફોનના વોચ લિસ્ટમાં સ્યુસાઈડ પ્રેન્કનો વિડીયો મળ્યો છે. અમે તમામ માતા પિતાને અપીલ કરીએ છીએ કે, તમારા બાળકો પર ધ્યાન આપો. જેથી બાળકો આ પ્રકારની વસ્તુ ના જોઈ શકે.’