- દેશમાં બદલાતા હવામાન સાથે કમોસમી વરસાદ ત્રાટક્યો છે
- આગામી 24 કલાકમાં ગુજરાતમાં ભારે વરસાદ પડી શકે છે
- આવનાર સમયમાં ઠંડીનું જોર વધશે - હવામાન વિભાગ
દેશમાં આજે બદલાતા હવામાન સાથે કમોસમી વરસાદ ત્રાટક્યો છે. સાથે જ આજથી આગામી 24 કલાકમાં હવામાન વિભાગે આગાહી કરી છે કે મધ્યપ્રદેશ, રાજસ્થાન, મહારાષ્ટ્રમાં વરસાદ અને આગામી 24 કલાકમાં ગુજરાતમાં ભારે વરસાદ પડી શકે છે. આ સાથે જ ઘણા રાજ્યોમાં ઠંડીનું પ્રમાણ વધ્યું છે અને હજુ આવનાર સમયમાં ઠંડીનું જોર વધશે.
બે-ત્રણ દિવસમાં આ રાજ્યોમાં ભારે વરસાદ થઈ શકે છે
ભારતીય હવામાન વિભાગના જણાવ્યા અનુસાર, ઘણા રાજ્યોમાં ભારે વરસાદ થઈ શકે છે, જ્યારે આગામી બે-ત્રણ દિવસમાં દિલ્હી, યુપી, ઉત્તરાખંડ અને દેશના દક્ષિણી રાજ્યોમાં વરસાદની સંભાવના છે. ગુજરાતના અનેક વિસ્તારોમાં ભારે વરસાદની સાથે કરા પણ પડ્યા છે. અહીં વીજળી પડવાથી લગભગ 20 લોકોના મોત થયા છે. તો જમ્મુ-કાશ્મીરના શ્રીનગરમાં રવિવારે તાપમાન શૂન્ય ડિગ્રી નોંધાયું હતું.
ગુજરાતમાં ભારે વરસાદ, ગાજવીજ અને કરા પડવાની સંભાવના
Skymet Weather ના અહેવાલ મુજબ નવીનતમ વેસ્ટર્ન ડિસ્ટર્બન્સ હિમાલયની નજીક પહોંચી ગયું છે. જેના કારણે ગુજરાત, દક્ષિણ-પૂર્વ રાજસ્થાન, દક્ષિણ-પશ્ચિમ મધ્ય પ્રદેશ, ઉત્તર કોંકણ, ઉત્તર મધ્ય મહારાષ્ટ્ર, મરાઠવાડામાં ભારે વરસાદ, ગાજવીજ અને કરા પડવાની સંભાવના છે. આ સિવાય આવતીકાલે એટલે કે મંગળવાર, 28 નવેમ્બર સુધી પશ્ચિમ હિમાલય ક્ષેત્ર અને ઉત્તર-પશ્ચિમ ભારતના મેદાની વિસ્તારોમાં હળવો વરસાદ પડી શકે છે.
આજે આ જગ્યા પર માવઠાની આગાહી
ભારતીય હવામાન વિભાગ (IMD) એ સોમવારે (27 નવેમ્બર) ઉત્તર મધ્ય મહારાષ્ટ્ર, ઉત્તર કોંકણ ગોવા, ગુજરાત, રાજસ્થાનના ભાગો અને દક્ષિણ-પશ્ચિમ મધ્ય પ્રદેશમાં મધ્યમથી ભારે વરસાદની ચેતવણી જારી કરી છે. આંદામાન અને નિકોબાર ટાપુઓમાં કેટલાક સ્થળોએ હળવાથી મધ્યમ વરસાદની શક્યતા છે. આ સાથે તમિલનાડુ, કેરળ, કર્ણાટક, લક્ષદ્વીપ અને તેલંગાણામાં હળવોથી મધ્યમ વરસાદ પડી શકે છે.
દિલ્હીમાં આજનું હવામાન
તે જ સમયે, જો આપણે દિલ્હીમાં આજના હવામાનની વાત કરીએ તો હળવા વરસાદની સંભાવના છે, જે હવામાનનો મૂડ બદલશે. આ સંભવિત વરસાદને કારણે 28 નવેમ્બરે દિલ્હીમાં તાપમાનમાં બે ડિગ્રીનો ઘટાડો થઈ શકે છે.
એક સાથે ચાર વેધર સિસ્ટમ સક્રિય
હવામાન વિભાગના જણાવ્યા અનુસાર, હવામાનમાં આ ફેરફાર એક સાથે ચાર વેધર સિસ્ટમ સક્રિય થવાને કારણે થયો છે. દેશના ઉત્તર ભાગમાં દરિયાની સપાટીથી 5.8 કિમીની ઊંચાઈએ વેસ્ટર્ન ડિસ્ટર્બન્સ છે. આ ઉપરાંત ઉત્તર-પૂર્વ અરબી સમુદ્ર, સૌરાષ્ટ્ર અને કચ્છના દરિયાકાંઠે પણ સાયક્લોનિક સરક્યુલેશન યથાવત છે. જેથી આગામી દિવસોમાં ઠંડીમાં વધારો થઈ શકે છે.
