હવામાન / ગુજરાતમાં ફરી હિટવેવ સાથે માવઠાની આગાહી: રાજ્યના આ વિસ્તારના ખેડૂતો રહે ઍલર્ટ! અહીં તાપમાનનો પારો જશે આસમાને

• રાજ્યમાં ગરમી અને કમોસમી વરસાદને લઈને આગાહી
• હવામાન વિભાગ દ્વારા કરવામાં આવી આગાહી 
• દક્ષિણ ગુજરાતમાં કમોસમી વરસાદ થવાની આાગાહી
• અમદાવાદ,ગાંધીનગર સહિત અનેક જિલ્લામાં ગરમી વધશે
• રાજ્યમાં મોટા ભાગના વિસ્તારમાં  40 ડિગ્રી તાપમાન રહેશે

ગુજરાત રાજ્યમાં માર્ચ અને એપ્રિલની શરૂઆતમાં કમોસમી વરસાદ વરસ્યા બાદ એપ્રિલ માસના મધ્યમા રાજ્યમાં ગરમીનો પારો 40 ડિગ્રીને પાર પહોંચી ગયો હતો. ત્યારબાદ હમણાં બે દિવસ અગાઉ દક્ષિણ ગુજરાતમાં કમોસમી વરસાદ વરસ્યો હતો. રાજ્યમાં છેલ્લા ઘણા દિવસોથી તાપમાનમાં સતત વધારો થઈ રહ્યો છે ત્યારે અમદાવાદ સહિત અન્ય વિસ્તારમાં હવામાન વિભાગ દ્વારા યલો એલર્ટ જાહેર કરવામાં આવ્યું હતું. આગામી સમયમાં પણ યલો એલર્ટ જાહેર કરવામાં આવે તેવી શક્યતાઓ દેખાઈ રહી છે. તો સાથે સાથે હવે હવામાન વિભાગ દ્વારા ગુજરાત ગરમી  અને કમોસમી વરસાદને લઈને આગાહી કરવામાં આવી છે. 

દક્ષિણ ગુજરાતમાં કમોસમી વરસાદ થવાની આગાહી

હવામાન વિભાગ દ્વારા કરવામાં આવેલ આગાહી પ્રમાણે દક્ષિણ ગુજરાતમાં કમોસમી વરસાદ વરસી શકે છે. વેસ્ટર્ન ડિસ્ટર્બન્સના પગલે કેટલાક વિસ્તારમાં કમોસમી વરસાદ થવાની આગાહી કરવામાં આવી છે. તો બીજી તરફ અમદાવાદ, ગાંધીનગર, વડોદરા સહિત અનેક જિલ્લામાં ગરમીને લઈને આગાહી કરવામાં આવી છે. જેમાં આ જિલ્લાઓમાં ગરમીમાંથી રાહત મળવાની કોઈ શક્યતા નથી. આ શહેરોમાં ગરમીના પ્રમાણમાં વધારો થવાની શક્યતા વ્યક્ત કરવામાં આવી છે. હવામાન વિભાગ દ્વારા આગાહી કરવામાં આવી છે કે ગાંધીનગર, અમદાવાદ, વડોદરા સહિતના જિલ્લાઓમાં તાપમાન 40થી 41 ડિગ્રી રહેવાની સંભાવના છે. 

જગતના તાતને હાલાકી

ઉલીખનીય છે કે રાજ્યમાં વર્ષની શરૂઆતથી જ કમોસમી વરસાદને પગલે જગતના તાતને હાલાકીનો સામનો કરવો પડ્યો હતો. રાજ્યના અનેક વિસ્તારમાં કમોસમી વરસાદની લીધે ખેડૂતોને મોટું નુકસાન થયું હતું. ત્યારે ફરી દક્ષિણ ગુજરાતમાં કમોસમી વરસાદની આગાહી કરવામાં આવી છે જેને લઈને ખેડૂતોમાં ચિંતા પ્રવર્તી ગઈ છે.