રાજનીતિ / શું ખરેખર વસુંધરા રાજે 1 વર્ષ માટે બનવા ઇચ્છે છે રાજસ્થાનના CM? ઘુમાવ્યો ભાજપ અધ્યક્ષને ફોન!

• શું વસુંધરા રાજે બનશે રાજસ્થાનનાં નવા CM?
• વસુંધરા રાજેએ જે.પી નડ્ડા સાથે ફોન પર વાતચીત કરી
• સીએમ પદ તેમને સોંપવા અંગે વાતચીત કરી હોવાની માહિતી

ભારતીય જનતા પાર્ટીની નેતા અને રાજસ્થાનની પૂર્વ મુખ્યમંત્રી વસુંધરા રાજે સિંધિયાએ ભાજપ પાસે અનોખી માંગ કરી છે. સૂત્રો અનુસાર વસુંધરા રાજે સિંધિયાએ પાર્ટીનાં નેતૃત્વ પાસે 1 વર્ષ માટે રાજસ્થાનનાં CM બનાવવાની માંગ કરી છે. આ બાદ તેઓ પોતે જ પદ છોડી દેશે. જો કે આ સાથે જ સૂત્રો પાસેથી માહિતી મળી આવી છે કે પાર્ટી નેતૃત્વે તેમને સ્પીકર બનાવવા અંગે વાત કરી હતી. જો કે તેમણે સ્પીકર બનવાનાં પાર્ટીનાં પ્રસ્તાવનો સ્વીકાર નથી કર્યો.

જે.પી. નડ્ડા સાથે ફોન પર વાતચીત?
સૂત્રો અનુસાર રાજસ્થાનની પૂર્વ મુખ્યમંત્રી વસુંધરા રાજેએ ભાજપ અધ્યક્ષ જે.પી.નડ્ડાને વિનંતી કરી છે કે તેમને એક વર્ષ માટે મુખ્યમંત્રી પદ આપવામાં આવે. આ સાથે જ વસુંધરા રાજેએ નડ્ડાને અન્ય ધારાસભ્યો સાથે અલગથી મુલાકાત ન કરવા સલાહ આપી છે. માહિતી અનુસાર ગઈકાલે રવિવારે વસુંધરા રાજેએ જે.પી.નડ્ડા સાથે ફોન પર વાતચીત કરી હતી. ત્યારે નડ્ડાએ તેમને સ્પીકર બનાવવાની વાતનો પ્રસ્તાવ મુક્યો હતો જેને વસુંધરાએ નકાર્યો હતો.

CMની જાહેરાતમાં આટલો વિલંબ શા માટે?
રાજસ્થાન વિધાનસભા ચૂંટણીમાં ભારતીય જનતા પાર્ટીએ 115 સીટ મેળવી અને બહુમતનો આંકડો મેળવ્યો હતો.  ચૂંટણીનાં પરિણામોનાં એક અઠવાડિયા બાદ પણ ભાજપે મુખ્યમંત્રીનાં નામનું એલાન નથી કર્યું. કદાચ ભાજપને ભય છે કે નામનાં એલાનની સાથે પાર્ટીની અંદર ઝઘડા થઈ શકે છે જેના પરિણામો પાર્ટીએ ભોગવવા પડી શકે છે.